Alkitab Mobile SABDA
[VER] : [NIAS]     [PL]  [PB] 
 <<  Lukas 24 >> 

1Me sahulõ wongi sibai, luo Migu, mõi ndra alawe andrõ wolohe fanikha samohua si no lafa'anõ.

2Lasõndra wa no tegaõlõ gowe lagõlagõ lewatõ andrõ.

3Mõi ira bakha ba lewatõ, ba lõ lasõndra mboto Yesu ba da'õ.

4Fatua muzizio ira ba da'õ abu dõdõra wo'angeragõ salua andrõ. I'anema'õ muzizio ba ngaira darua niha sonukha si takile.

5Ata'u sibai ira, ba latuhi danõ fõna ndra niha andrõ. Lamane khõra si darua andrõ, "Hana wa mi'alui zauri ba gotalua zi mate?

6Lõ Ya'ia ba da'e; no ifuli auri Ia! Mitõrõ tõdõmi hadia zi no Iw̃a'õ khõmi me so Ia nasa ba Galilea,

7wa 'Tebe'e ba danga niha si so horõ Nono Niha, teforõfa Ia, ba ifuli auri Ia ba ngaluo si tõlu.'"

8Itõrõ tõdõ ndra alawe andrõ wehede Yesu.

9Me no mangawuli ira moroi ba lewatõ, latutunõ fefu zalua andrõ khõ ndra nifahaõ si felendrua awõ nifahaõ tanõ bõ'õ.

10Tõitõi ndra alawe sangombakha fefu da'õ khõ nifahaõ Yesu: Maria Magadala, Yohana ba Maria ina Yakobo awõ ndra alawe tanõ bõ'õ si fao khõra.

11Lawalinga teatea mbewe ni'ombakha'õ ndra alawe andrõ ira nifahaõ. Lõ faduhu dõdõra nidunõdunõra.

12Maoso Wetero ba fagohi ia numalõ ba lewatõ. Ifaõndrõ ia wamaigi bakha lewatõ, ba i'ila ha muko lohulohu mboto Yesu zi so ba da'õ. Ahõli dõdõ Wetero, mofanõ ia ba oya ngawalõ zinofu bakha ba dõdõnia ba zi no alua andrõ.

13Me luo da'õ gõi, darua nifahaõ Yesu si numalõ ba zi sambua banua sotõi Ema'usa, mato felendrua kilomete wa'arõu moroi ba Yeruzalema.

14Fatua mowaõwaõ ira lafatunõ ngawalõ zi no alua andrõ.

15Fatua fahuohuo ba mangerangera ira, tohare Yesu ba mowaõwaõ Ia awõra.

16La'ila Yesu ba hiza lõ aboto ba dõdõra wa Yesu Ia.

17Imane Yesu khõra, "Hadia nifatunõtunõmi ba dalu lala andre?" Si fao sikhala wa'abu dõdõ labatogõ ira.

18Samõsa ba gotaluara sotõi Kelofasi sanofu khõ Yesu, "Hadia ha Ya'ugõ dome si so ba Yeruzalema si lõ mangila hadia zalua ba zi ha'uga ngaluo andre?"

19Isofu Yesu Imane, "Hadia zalua?" Latema li lamane, "Salua khõ Yesu andrõ, banua Nazareta. Sama'ele'õ Ia; mofa'abõlõ sibai huhuo-Nia awõ nilau-Nia -- he fõna Lowalangi ma zui fõna niha.

20No labe'e khõ-Nia ira ere sebua awõ ndra salaw̃a huku famunu, ba no la'osõ Ia ba rõfa!

21Ba hiza no manõtõna ndra'aga wa Ya'ia andrõ zangefa'õ soi Gizera'eli! Ba no tõlu ngaluo sa'ae i'otarai me luo da'õ.

22Ba no lakea'õ ndra'aga ira alawe si fao khõma. Sahulõ wongi sibai no mõi ira ba lewatõ,

23ba hiza lõ lasõndra mboto Yesu ba da'õ. Aefa da'õ mangawuli ira ba lamane no la'ila mala'ika sangombakha wa no auri Yesu.

24So õsa ba gotaluama zi mõi ba lewatõ ba lasõndra sindruhu niw̃a'õ ndra alawe andrõ, lõ ni'ilara Yesu."

25Aefa da'õ Imane khõra Yesu, "Niha si bodo ami! Afõkhõ sibai khõmi wa'afaduhu dõdõ niw̃a'õ ndra sama'ele'õ!

26Lõ tola lõ'õ Itaõgõ fefu wamakao andrõ Razo Sangorifi nifabu'u Lowalangi, awena dania irugi lakhõmi-Nia!"

27Aefa da'õ Ihaogõ wangombakha Yesu khõra niw̃a'õ sanandrõsa khõ-Nia bakha ba Mbuku Ni'amoni'õ, i'otarai Mbuku Moze numalõ ba mbuku ndra sama'ele'õ.

28Arakha larugi mbanua andrõ si mõi ira. Hulõ na Idõlõ fofanõ Yesu,

29ba hiza lataha Ia. Lamane khõ-Nia, "Fao awõma, no arakha bongi ba no ibõrõgõ ogõmi." Ba fao awõra Yesu.

30Me fao ira wemanga, Ihalõ roti Yesu ba I'aohasi gõlõ Lowalangi, aefa da'õ Iboboto roti andrõ faoma tanga-Nia, aefa da'õ Ibe'e khõra.

31Awena teboka geragerara ba la'ila Ia. Ba hiza taya manõ Yesu fõnara.

32Faoma lamane khõ nawõra, "Isõsõ dõdõda mege me fahuhuo Ia khõda ba dalu lala, wamoboto õsi Mbuku Ni'amoni'õ khõda!"

33I'anema'õ maoso ira mangawuli ba Yeruzalema. Ba da'õ lasõndra no owulo ndra nifahaõ Yesu si felezara andrõ awõ danõ bõ'õ nasa.

34Lamane ira nifahaõ andrõ, "Sindruhu no auri mangawuli Zo'aya! No I'oroma'õ Ia khõ Zimoni!"

35Latutunõ gõi ira nifahaõ si darua andrõ hadia zalua ba dalu lala, ba hewisa me la'ila Zo'aya samoboto roti.

36Fatua latutunõ fefu da'õ, i'anema'õ muzizio Yesu ba gotaluara ba Imane, "Ya'ohahau dõdõmi!"

37Tokea ba ata'u ira, lawalinga bekhu ni'ilara.

38Ba Imane khõra Yesu, "Hana wa'ata'u ami, ba hana wa manofu dõdõmi?

39Mifaigi danga-Gu awõ gahe-Gu. Ya'odo da'e! Mibabaya ba mihaogõ wamaigi, lõ monagole ba motõla mbekhu, si mane ni'ilami khõ-Gu."

40Imanõ Yesu ba Iforoma'õ khõra danga awõ gahe-Nia.

41Fatua lõ faduhu dõdõra bõrõ wa'omuso dõdõ awõ wa'ahõli dõdõ, Isofu khõra Yesu, "Hadia so gõ khõmi ba da'e?"

42Labe'e khõ-Nia sambua fanaba gi'a nisala.

43Ihalõ gi'a andrõ Yesu, ba I'a fõnara.

44Aefa da'õ Imane khõra, "Da'e ngawalõ zi no U'ombakha'õ khõmi me so Ndra'o ba gotaluami: lõ tola lõ'õ alua fefu nisura sanandrõsa khõ-Gu bakha ba Mbuku Moze, awõ ba Mbuku ndra Sama'ele'õ, awõ Mbuku Zinunõ."

45Aefa da'õ Ibokai wangerangerara Yesu ena'õ aboto ba dõdõra gohitõ dõdõ Mbuku Ni'amoni'õ.

46Imane khõra Yesu, "No tesura bakha ba Mbuku Ni'amoni'õ wa tefakao Razo Sangorifi nifabu'u Lowalangi andrõ, ba ifuli auri moroi ba wa'amate ba ngaluo si tõlu.

47No gõi tesura wa teturiaigõ ba soi fefu wangefa'õ Lowalangi horõ, na lafalalini gera'erara niha ba larõi horõ. Ba mubõrõtaigõ duria andrõ moroi ba Yeruzalema.

48Ya'ami sasi ba da'e fefu.

49Ufatenge dania khõmi zi no Ifabu'u Ama. Ba lõ tola lõ'õ mibaloi ba mbanua andre, irege tebe'e khõmi wa'abõlõ si otarai Lowalangi."

50Aefa da'õ I'ohe ira Yesu baero mbanua irugi Mbetania. Ifazaw̃a danga-Nia ba wamahowu'õ ya'ira.

51Fatua Ifahowu'õ ira, fabali Ia khõra tefazaw̃a numalõ ba zorugo.

52Labalõduhini danõ wangalulu khõ-Nia, ba mangawuli ira ba Yeruzalema si fao fa'omuso dõdõ.

53Ba Nomo Zo'aya manõ so ira ba wanunonuno Lowalangi ba da'õ.


  Share Facebook  |  Share Twitter

Download Audio MP3 (Lukas 24):
Mobile (Low Quality) - CD (High Quality)

 <<  Lukas 24 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran