Alkitab Mobile SABDA
[VER] : [NIAS]     [PL]  [PB] 
 <<  Matius 2 >> 

1Ba Mbetilekhema tumbu Yesu ba danõ Yudea; razo ba danõ Yudea ba ginõtõ da'õ ya'ia Herode. Ba ginõtõ da'õ, tohare zonekhenekhe ba ndrõfi dalu mbanua si otarai gatumbukha luo mõi ba Yeruzalema.

2Lasofu, "Heza so Nono andrõ, si tumbu si tobali Razo niha Yahudi? No ma'ila ndrõfi-Nia si tumbu ba gatumbukha luo. Ba mõi ndra'aga mangalulu khõ-Nia."

3Me irongo da'õ Razo Herode, tobali sibai dõdõnia, awõ zi sambua banua Yerusalema.

4Ifakaoni'õ fefu ndra ere sebua ba ira sangila amakhoita ba niha Yahudi. Isofu khõra, "Heza tumbu Razo andrõ si no Ifabu'u Lowalangi?"

5Latema linia, "Ba mbanua Mbetilekhema ba danõ Yudea. Si mane nisura zama'ele'õ.

6'Ya'ugõ Betilekhema, ba danõ Yehuda, tenga side'ide ndra'ugõ ba gotalua mbanua sebua ba danõ Yehuda. Bõrõ me moroi khõu tohare samõsa zondrõnia'õ, sokubaloi banua-Gu niha Gizera'eli.'"

7Me no aefa irongo wangombakhara andrõ, awena ifakaoni'o Herode ndra sonekhenekhe ba ndrõfi dalu mbanua andrõ si otarai gatumbukha luo, ena'õ falukha ira khõnia ba zi ha ya'ira. Ihaogõ sibai wanekhegõ ya'ira hamega oroma khõra ndrõfi andrõ.

8Aefa da'õ ifatenge ira we'amõi ba Mbetilekhema, ba i'oroi'õ khõra, "Mi'ae'e mihaogõ wangalui Ono andrõ. Na no misõndra Ia, mi'ombakha'õ khõgu, ena'õ mõido gõi mangalulu khõ-Nia."

9Me no aefa larongo goroisa Herode andrõ ba mofanõ ndra sonekhenekhe andrõ. Ba dalu lala, la'ila zui ndrõfi andrõ, dõfi ni'ilara mege ba gatumbukha. Mowaõwaõ ndrõfi fõnara, ba tebato gamaudu nahia Nono andrõ.

10Ha wa'omuso dõdõra me la'ila ndrõfi andrõ!

11Ba mõi ira yomo ba nomo andrõ. Ba da'õ la'ila Nono awõ nina-Nia, Maria. Labalõduhini danõ wangalulu khõ Nono andrõ. Aefa da'õ labokai nahia gokhõtara, ba mamuala ira: ana'a, kumõyõ ba emuri.

12Me mangawuli ira ba danõra, lõ lafuli latõrõ lala nitõrõra mege, bõrõ me no Ifangelama ira Lowalangi ba wangifi ena'õ bõi lafuli ira khõ Herode.

13Me no mofanõ ndra sonekhenekhe andrõ, oroma samõsa mala'ika Zo'aya khõ Yosefo ba wangifi. Imane mala'ika andrõ, "Faoso, ohe Nono andrõ awõ nina-Nia, mi'oloi ba danõ Miserai. Ba da'õ mi'iagõ irugi muhede Ndra'odo zui khõu bõrõ me omasi Herode wangalui Ono andrõ ba wamunu Ya'ia."

14Maoso Yosefo, i'ohe Nono awõ nina-Nia woloi ba danõ Miserai, ba zi bongi da'õ.

15Torõi ira ba da'õ irugi inõtõ wa'amate Herode. Alua zi manõ ena'õ itõrõ niw̃a'õ Zo'aya, nifa'ema zama'ele'õ andrõ, "Ukaoni nono-Gu moroi ba danõ Miserai."

16Me i'ila Herode no lalimo ia ira sonekhenekhe andrõ si otarai gatumbukha luo, mofõnu sibai ia. Ibe'e wareta ba wamunu fefu iraono ono matua ba Mbetilekhema awõ zi fasui banua andrõ i'otarai zi mendrua fakhe numalõ ba ndraono side'ide moroi andrõ. Faudu da'õ ba zi no ihaogõ fanofu khõ ndra sonekhenekhe sanandrõsa ba ginõtõ oroma ndrõfi Nono andrõ.

17Alua zi mane si no iw̃a'õ Yeremia sama'ele'õ, wanguma'õ,

18"Ba Rama terongo wege'ege, ba fangarõngarõ. I'e'esi ndraonia Rakhela, lõ omasi ia larara dõdõnia, me no oi mate nononia andrõ."

19Me no mate Herode, oroma zui khõ Yosefo ba wangifi samõsa mala'ika Zo'aya ba danõ Miserai.

20Imane mala'ika andrõ, "Faoso! Halõ Nono andrõ ba ina-Nia ohe ira wangawuli ba danõ niha Gizera'eli, bõrõ me niha somasi mamunu Ono andrõ no mate sa'ae."

21Maoso Yosefo, i'ohe Nono andrõ awõ Maria mangawuli ba danõ niha Gizera'eli.

22Aefa da'õ irongo Yosefo wa Arikhela'o, ono Herode no tobali Razo ba danõ Yudea fangali namania. Andrõ ata'u ia we'amõi ba da'õ. Ba bõrõ me no Ifangelama ia zui So'aya ba wangifi, andrõ wa ba Galilea mõi ia.

23Torõi ia ba da'õ ba mbanua sotõi Nazareta. Ba zi manõ alua zi no law̃a'õ ira sama'ele'õ wa: "Lafotõi Ia Niha Nazareta."


  Share Facebook  |  Share Twitter

Download Audio MP3 (Matius 2):
Mobile (Low Quality) - CD (High Quality)

 <<  Matius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran