Alkitab Mobile SABDA
[VER] : [NIAS]     [PL]  [PB] 
 <<  Matius 21 >> 

1Me ahatõ ira ba Yeruzalema, ba larugi Mbetifage ba Hili Zaitu. Ifadaridari'õ darua ndra nifahaõ-Nia.

2"Mitaritari ba mbanua andrõ fõnami," da'õ goroisa Yesu khõra. "I'anema'õ mi'ila galide, no mufesu si fao ononia. Mitoto'õ wesunia ba mi'ohe ba da'e.

3Na so zanofu, ba mimane khõnia, 'Moguna khõ Zo'aya', ba i'anema'õ itehegõ mi'ohe dania galide andrõ."

4Alua zi manõ ena'õ faudu ba niw̃a'õ zama'ele'õ,

5"&Wa'õ ba Ziona, iada'e tohare Razomõ. Sebolo tõdõ Ia, si so ba hulu galide, ono galide sawuyuwuyu."

6Mofanõ nifahaõ Yesu, la'o'õ niw̃a'õ-Nia khõra.

7La'ohe galide fabaya ononia. Labologõ mbarura sebua yaw̃a ba hulu galide andrõ. Aefa da'õ mõi Yesu yaw̃a.

8Niha sato si so ba da'õ labologõ mbarura ba lala, ba tanõ bõ'õ lahalõ duturu geu labe'e ba dalu lala nitõrõ Yesu.

9Niha sato si so fõna ba furi Yesu ibõrõtaigõ lalau mu'ao, "Hozana khõ ma'uwu Dawido! Ya mufahowu'õ Ia Lowalangi zi tohare ba dõi Zo'aya! Nisuno Lowalangi Fondrege Zalaw̃a!"

10Me irugi Yeruzalema Yesu, oi humufa nõsi mbanua andrõ. Oi lasofu niha, "Haniha da'e?"

11Latema li niha sato si fao khõ Yesu, "Ya'ia Yesu Sama'ele'õ, moroi ba Nazareta, banua Galilea."

12Aefa da'õ mõi Yesu ba golayama Nomo Zo'aya, Ifofanõ fefu zamawa ba da'õ. Meza ndra sanukari kefe ba bakubaku zamawa marafadi, oi Ibali'õ Yesu.

13Imane ba niha andrõ, "No tesura ba Mbuku Ni'amoni'õ wa no Iw̃a'õ Lowalangi, 'Omo wangandrõ dõi nomo-Gu.' Ba no mibali'õ nahia zanagõ!"

14Ba la'ondrasi Yesu niha sau'a awõ zombuyumbuyu ba Nomo Zo'aya andrõ, ba Ifadõhõ Yesu wõkhõra fefu.

15Ba abao dõdõ ndra ere sebua awõ ndra sangila amakhoita niha Yehuda me la'ila nilau Yesu andrõ. Monõnõ wa'abao dõdõra me larongo ndraono si'ao'ao ba Nomo Zo'aya sanguma'õ, "Hozana khõ ma'uwu Dawido!"

16Lamane khõ Yesu, "Hadia no Õrongo niw̃a'õra andrõ?" Imane Yesu, "No Urongo! Hadia lõ nibasomi ayati Mbuku Ni'amoni'õ sanguma'õ, 'No Ufahaõ ndraono awõ zi lõ mangila muhede na ba wolau fanunõ so'ahono'a'?"

17Irõi ira Yesu, mõi Ia baero mbanua, numalõ ba Mbetania. Ba da'õ mõrõ Ia.

18Mahemolu õ sahulõ wongi sibai, me mangawuli Yesu ba Yeruzalema, ba olofo Ia.

19I'ila dõla ara ba zinga lala. Mõi Ia barõ zinanõ andrõ, ba lõ ni'ila-Nia yaw̃a bua, ha bulu zi so. Imane Yesu ba dõla ara andrõ, "Ya lõ mowua ndra'ugõ sa'ae!" Ba i'anema'õ aleu dõla ara andrõ.

20Me la'ila nifahaõ Yesu zalua andrõ, ba ahõlihõli dõdõra. Lasofu ba dõdõra, "Hewisa wa tola i'anema'õ aleu dõla ara andrõ."

21Imane Yesu, "Mitõngõni. Na mamati ami, lõ fangiwa dõdõ, ba tola milau zi mane nilau-Gu ba ara andre. Ba tenga ha da'õ, tola miw̃a'õ ba hili andre, 'Ya muzaw̃a ndra'ugõ, ba tibo'õgõ ba nasi'; ba lõ tola lõ'õ alua zi manõ.

22Hadia manõ ni'andrõmi ba wangandrõ, ba lõ zi lõ mitema asala mamati ami."

23Mangawuli zui Yesu ba Nomo Zo'aya, mõi Ia mamahaõ ba da'õ. Me mamahaõ Ia nasa ba la'ondrasi Ia ira ere sebua ba salaw̃a niha Yahudi, lasofu khõ-Nia, lamane, "Hadia danedane wa Õlau da'e fefu? Haniha zanehegõ khõ-U?"

24Itema li Yesu, "So nisofu-Gu gõi khõmi. Na no mitema li-Gu dania, awena U'ombakha'õ khõmi haniha zanehegõ khõ-Gu wolau da'õ.

25Haniha zanehegõ khõ Yohane wamayagõ idanõ? Hadia Lowalangi ma zui niha?" Ba mamagõlõ ndra ere sebua awõ zalaw̃a niha Yahudi andrõ. Lamane, "Na taw̃a'õ moroi ba Lowalangi, ba Iw̃a'õ dania khõda, 'Na si manõ ba hana wa lõ faduhu dõdõmi khõ Yohane andrõ?'

26Ba na taw̃a'õ, 'Moroi ba niha,' ba ata'u ita niha sato andrõ, bõrõ me no la'ila wa sama'ele'õ Yohane andrõ."

27Andrõ latema li lamane, "Lõ ma'ila." Ba Imane khõra Yesu, "Na si manõ ba lõ'õ gõi U'ombakha'õ haniha zanehegõ khõ-Gu wamalua fefu da'e fefu."

28"Hewisa wangerangerami?" Imanõ Yesu wanohugõ fehede-Nia. "So niha si so darua ono matua. Iw̃a'õ niha andrõ khõ nononia sia'a, 'He onogu, ae'e ohalõw̃õ ba kabu nagu khõda ma'õkhõ andre.'

29Itema linia ono andrõ imane, 'Lõ mõido,' ba hiza ifuli tebulõ dõdõ nono andrõ ba numalõ ia ba kabu nagu.

30Aefa da'õ mõi niha andrõ khõ nononia si sambua, ifuli iw̃a'õ si mane niw̃a'õnia mege khõ nononia sia'a. Imane ononia andrõ siakhi, 'Lau, Ama,' ba hiza lõ sa mõi ia.

31Ba gotalua ndraono andrõ, haniha zamalua somasi namara?" Lamane ira ere sebua awõ zalaw̃a niha Yahudi, "Sia'a!" Imane khõra Yesu, "Mitõngõni da'e: Sanema beo awõ ndra alawe samawa ya'ira andrõ ofõna dania tobali ira õsi mbanua Lowalangi moroi khõmi.

32Me no mõi Yohane Samayagõ Idanõ khõmi, ba wangombakha lala wa'auri somasi Zo'aya, ba lõ sa'atõ faduhu dõdõmi ba wamahaõ-Nia; ba sanema beo awõ ndra alawe samawa ya'ira andrõ, ba no faduhu dõdõ khõnia. Ba hew̃a'ae no mi'ila da'õ fefu, ba lõ zui mibulõ'õ gera'erami awõ wa lõ faduhu dõdõmi khõ Zo'aya."

33Imane Yesu, "Mifondrondrongo gamaedola si sambua andre. So samõsa niha sokhõ tanõ sebolo, so gõi khõnia sagõrõ kabu nagu. Ifasui õli kabu andrõ, ikhao danõ nahia wamera'õ agu, ba ifazõkhi nose zanaro. Me no aefa da'õ, ibe'e niwawalõ kabu andrõ khõnia ba niha sangahalõ ba kabu nagu, ba ilau mofanõ ba mbanua bõ'õ.

34Me no irugi inõtõ wangai bua nagu, ifatenge ngoningoninia ba wanema tana khõnia moroi ba danga niha sangahalõ ba kabu nagu andrõ.

35Maoso ira lara'u ngoningoni zokhõ kabu andrõ: si samõsa labõzi, si samõsa labunu, ba si samõsa tõ latebu kara.

36Ifatenge ngoningoninia tanõ bõ'õ sokhõ kabu andrõ. Ba si manõ zui sa'atõ wolaura.

37Ba gafuriata, ifatenge khõra nononia. Imane tõdõnia, 'Tatu lafosumange nonogu andre.'

38Ba hiza, me la'ila nononia sangahalõ ba kabu nagu andrõ, ba faoma lamane khõ nawõra, 'Ya'e nono sanema ondrõitania andrõ. Da tabunu ia ena'õ mõi khõda gondrõitania!'

39Lara'u nono andrõ la'ohe ia baero ba kabu ba labunu."

40Isofu Yesu, "Na mangawuli dania zokhõ kabu andrõ, hadia nilaunia ba zangahalõ ba kabu nagunia andrõ?"

41Latema li lamane, "Tatu, ibunu dania niha si lõ sõkhi andrõ. Aefa da'õ ibe'e ba danga niha bõ'õ kabu nagu andrõ khõnia ena'õ tola itema dana khõnia na no irugi inõtõ."

42Imane Yesu khõra, "Hadia, lõ irai mibaso zi no musura bakha ba Mbuku Ni'amoni'õ? 'Gowe andrõ nitibo'õ zotomo, no tobali gowe sabõlõ moguna. Halõw̃õ Lowalangi da'õ; sahõli dõdõda wa'asõkhinia!'"

43Imane Yesu, "Mitõngõni, fefu zi so khõmi ba wa'a'ono mbanua Lowalangi, ba laheta dania moroi khõmi ba labe'e ba niha molo'õ somasi Lowalangi.

44[Haniha zanendre ba gowe andrõ, ba tekiko dania ia; ba haniha nilangõgõ gowe andrõ, tobali hulõ nawu ia.]"

45Me larongo gamaedola Yesu andrõ ira ere sebua awõ ndra Farizai'o, ba la'ila wa khõra Itandrõsaigõ da'õ.

46La'alui lala wondra'u Ya'ia. Ba hiza ata'u ira niha sato, me law̃a'õ tõdõra sama'ele'õ Yesu.


  Share Facebook  |  Share Twitter

Download Audio MP3 (Matius 21):
Mobile (Low Quality) - CD (High Quality)

 <<  Matius 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran