Alkitab Mobile SABDA
[VER] : [NIAS]     [PL]  [PB] 
 <<  Matius 22 >> 

1Ifuli fahuhuo Yesu ba niha sato faoma amaedola.

2Imane Yesu, "Na mamatõrõ Lowalangi andrõ ba hulõ gamaedola andre: Samõsa Razo samalua falõw̃a khõ nononia.

3Ifatenge zawuyunia ba wamaondragõ niha nikaoni ba walõw̃a.

4Ba hiza, lõ omasi mõi ira ba walõw̃a andrõ. Ifuli ifatenge Razo zawuyunia tanõ bõ'õ. Imane Razo khõra: Ombakha'õ ba niha nikaoni andrõ, 'No ufa'anõ zoguna ba walõw̃a andrõ. Saw̃i si matua ba saw̃i sagatabõ no utaba. No awai fefu, mitabu ba walõw̃a!'

5Ba lõ ba dõdõ nikaoni andrõ, numalõ ira ba halõw̃õra zamõsana, si samõsa mõi ba nowinia, si samõsa mõi ba waniaga.

6Ba tanõ bõ'õ lara'u zawuyu Razo andrõ, labõbõzi ba labunu.

7Me irongo Razo zi manõ, ba mofõnu sibai ia. Ifatenge zaradadunia ba wamunu niha si lõ sõkhi andrõ awõ ba wamunu banuara.

8Ifuli ikaoni ndra ngoningoninia, imane khõra, 'No tefa'anõ walõw̃a, ba tenga sinangea ya'ira nikaoni andrõ.

9Mi'ae'e iada'e ba lala. Ba gofu ha wa'ato zi falukha khõmi ba da'õ, mikaoni ira ba walõw̃a andre.'

10Mofanõ ndra enoninia. Mõi ira ba lala, la'owuloi niha, si falukha ira ba da'õ, he niha si sõkhi ba he gõi niha si lõ sõkhi. Ba afõnu walõw̃a andrõ tome, si tohare.

11Mõi Razo wamaigi si mõi ba walõw̃a. I'ila samõsa ba gotalua zi mõi andrõ zi lõ monukha nukha ba walõw̃a.

12Isofu ba niha da'õ, 'He talifusõ, hewisa wa mõi'õ ba da'e lõ õfake nukha ba walõw̃a?' Tebai itema linia niha andrõ.

13Imane Razo khõ ndra ngoningoninia, 'Mibõbõ danga awõ gahe, ba mitibõ'õ ia ba nahia sogõmigõmi. Ba ba da'õ dania fege'ege ba fa'afõkhõ.'"

14I'etu'õ gamaedola andre Yesu Imane, "Ato nikaoni, ba lõ ato nituyu."

15Ba mamagõlõ ndra Farizai'o, helawisa wamesu li-Nia ba ganofula nibe'era.

16Lafatenge niha solo'õlo'õ khõra khõ Yesu, awõ wa fao gõi zolo'õlo'õ khõ Herode. Lafatenge ndra niha da'õ wanguma'õ khõ Yesu, "He Guru, ma'ila wa niha satulõ tõdõ Ndra'ugõ. Õfahaõ niha ba zomasi Lowalangi, ba lõ ata'u Ndra'ugõ niha. Bõrõ me lõ Õfaigi mbawa niha.

17Bõrõ da'õ, ombakha'õ khõma, hewisa gera'era-U sanandrõsa ba da'e: Molo'õ amakhoita agama khõda, hadia faudu wamu'a be'elõ ba zamatõrõ Roma ma zui lõ'õ?"

18I'ila gera'era si lõ sõkhi andrõ Yesu, andrõ wa Imane, "He niha samini tõdõ! Hana wa omasi ami mitandraw̃aisi Ndra'odo?

19Miforoma'õ khõ-Gu gefe ni'oguna'õmi wamu'a be'elõ andrõ!" Ba labe'e khõ-Nia sambua gefe firõ.

20Isofu khõra Yesu, "Haniha ba ha tõi da'e?"

21Latema li, "Kaizaro!" Imane khõra Yesu, "Na si manõ, mibe'e khõ Kaizaro hadia khõ Kaizaro ba mibe'e khõ Lowalangi hadia khõ Lowalangi!"

22Me larongo wanema-Nia li andrõ, ba oi ahõli dõdõra. Lalau mofanõ larõi Yesu.

23Me luo da'õ gõi la'ondrasi Yesu ira Sadukai'o. Ya'ira andrõ zanguma'õ wa lõ ifuli auri zi no mate.

24Lamane khõ Yesu, "He Guru," "no iw̃a'õ Moze: Na mate zi samõsa ira matua, lõ ono, ba mangowalu ndrongania ira alawe khõ dalifusõ ndra matua andrõ, ena'õ ibe'e nga'õtõ khõ ga'ania andrõ si no mate.

25So dafitu zi fatalifusõ si torõi ba da'e. Mangowalu zia'a ba aefa da'õ mate ia lõ ono. Torõi ndrongania khõ dalifusõnia.

26Si manõ gõi dalifusõnia andrõ, mate lõ ono. Ba simanõmanõ irugi dafitu ira.

27Aefa da'õ mate ndra alawe andrõ.

28Ba zi mane da'e, haniha dania wo'omo ndra alawe andrõ? Bõrõ me dafitu manõ ira no irai tobali fo'omonia."

29Itema li Yesu, "Fasala sibai ami, bõrõ me lõ mi'ila Mbuku Ni'amoni'õ, ba lõ gõi aboto ba dõdõmi wa'abõlõ Lowalangi.

30Bõrõ na ifuli tesusugi zi mate, ba lõ mangowalu ira sa'ae, auri ira si mane mala'ika ba zorugo.

31Hadia lõ irai mibaso niw̃a'õ Lowalangi sanandrõsa ba wanusugi si no mate? Imane Lowalangi,

32'Lowalangi Gaberahamo ndra'o, Lowalangi Giza'aki ba Lowalangi Yakobo.' Tenga Lowalangi zi mate Lowalangi andrõ. No Lowalangi zauri!"

33Me larongo wamahaõ Yesu andrõ, oi so wa'ahõlihõli dõdõra.

34Me larongo ira Farizai'o no Ibe'e lõ hede ndra Sadukai'o Yesu, ba owulo ira.

35Samõsa ba gotaluara guru agama, ifesu li Yesu faoma fanofu.

36Imane, "He Guru, heza goroisa sabõlõ ebua bakha ba huku agama?"

37Itema linia Yesu, "Omasi'õ Zo'aya Lowalangiu, moroi si'aikõ ba dõdõu, awõ nosou ba era'erau ma'afefu.

38Da'õ goroisa sabõlõ ebua ba sabõlõ moguna!

39Oroisa si dua si fagõlõ ba da'õ: Omasi'õ nawõu si mane fangomasi'õu ya'ugõ.

40Fefu huku agama nibe'e Moze awõ wamahaõ ndra sama'ele'õ modanedane ba goroisa si dombua andrõ."

41Me owulo na ndra Farizai'o ba da'õ, Isofu khõra Yesu,

42"Hami'w̃a'õ era'erami Razo Sangorifi andrõ? Nga'õtõ haniha Ia?" Lamane, "Nga'õtõ Dawido!"

43Itohugõ wanofu Yesu, "Na si manõ, hana wa ifarou Dawido Eheha Lowalangi ba wamotõi Razo Sangorifi andrõ, 'So'aya'? Bõrõ me imane Dawido,

44'No Iw̃a'õ Lowalangi khõ Zo'aya ya'o: Dadao ba gambõlõ-Gu, Irege Ube'e barõ gahe-U zi fa'udu khõ-U.'

45Na ikaoni Dawido khõ Razo Sangorifi andrõ 'So'aya', hewisa wa tola nga'õtõ Dawido Ia?"

46Samõsa lõ si tola manema li Yesu, I'otarai luo da'õ, lõ si barani manofu hadia ia khõ-Nia.


  Share Facebook  |  Share Twitter

Download Audio MP3 (Matius 22):
Mobile (Low Quality) - CD (High Quality)

 <<  Matius 22 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran