Alkitab Mobile SABDA
[VER] : [NIAS]     [PL]  [PB] 
 <<  Matius 26 >> 

1Me no aefa Ibe'e wamahaõ andrõ Yesu, Imane khõ ndra nifahaõ-Nia,

2"No mi'ila wa dua wongi tõ Gowasa Fasa, ba Ono Niha tebe'e ba danga niha ba wamorõfa!"

3Me luo da'õ owulo ndra ere ba satua mbanua niha Yahudi ba nomo gere sebua sotõi Kayafa.

4Mamagõlõ ira ba wondra'u Yesu ba zi lõ nininini, ba wamunu Ya'ia.

5Ba lamane, "Hiza bõi talau da'õ ba ginõtõ Gowasa andrõ, bõrõ ma dania alua wehufa ba gotalua niha sato."

6Me so Yesu ba Mbetania, ba nomo Zimoni sobou auri andrõ fõna,

7samõsa ndra alawe sangondrasi Yesu. No i'ohe mbulibuli, so'õsi fanikha samohua sebua bõli. Me mangamanga na Yesu, ibayoini hõgõ Yesu ira alawe andrõ faoma fanikha samohua.

8Mofõnu ndra nifahaõ Yesu me la'ila da'õ. Lamane, "Hadia wa la'alimagõsi da'e?"

9"Tola mu'amawa wanikha samohua andrõ ba bõlinia labe'e ba niha si numana!"

10I'ila Yesu gera'erara andrõ ba Imane, "Hadia wa mibusi dõdõ ndra alawe andre? No ilau zi sõkhi khõ-Gu.

11Faofao nasa khõmi niha si numana ba Ya'o tenga si'ogõtõ'õ wefao khõmi.

12Ba wombayoini fanikha samohua andrõ õsi-Gu, no ihaogõ Ndra'o ba wogo'o Ya'o.

13Ya faduhu dõdõmi! Gofu heza teturiaigõ Duria Somuso Dõdõ soroi Lowalangi ba gulidanõ ma'asagõrõ, ba tedunõdunõ gõi nilau ndra alawe andre si tobali fanõrõ tõdõ khõnia."

14Samõsa ba gotalua nifahaõ Yesu si felendrua, sotõi Yuda banua Gariota, mõi khõ ndra ere sebua.

15Imane khõra, "Hadia nibe'emi khõgu na ube'e ba dangami Yesu?" La'erai tõlu ngafulu rufia gefe firõ, ba labe'e khõnia.

16I'otarai da'õ i'alui ginõtõ si sõkhi Yuda ba wame'e Yesu ba danga ndra ere sebua.

17Ba ngaluo si fõfõna ba Gowasa Roti Si Lõ Mu'aisõni, la'ondrasi Yesu ira nifahaõ-Nia. Lasofu khõ-Nia, "Heza zomasi Zo'aya mafa'anõ wemanga Wasa khõ-U?"

18Itema li Yesu, "Mi'ae'e ba fasa, ba mimane ba zi samõsa niha, 'No Iw̃a'õ Guru, no irugi inõtõ khõ-Gu; Omasi Ndra'o molau Gowasa Fasa ba nomou si fao ira nifahaõ-Gu.'"

19La'o'õ niw̃a'õ Yesu andrõ ira nifahaõ-Nia. Mõi ira wama'anõ õ Fasa.

20Me no bongi, manga Yesu awõ ndra nifahaõ-Nia.

21Me mangamanga ira nasa Imane khõra Yesu, "Mifondrondrongo: Samõsa ba gotaluami dania zi manga mbõli-Gu."

22Me larongo da'õ ira nifahaõ Yesu, abu sibai dõdõra. Dozi ira lasofu khõ Yesu, "Tatu, tenga ya'odo niw̃a'õ-Mõ andrõ, Guru?"

23Itema li Yesu, "Si fao khõ-Gu wo'ungugõ roti ba mako andrõ, ya'ia dania zi manga mbõli-Gu.

24Mate dania Nono Niha andrõ, itõrõ zi mane nisura bakha ba Mbuku Ni'amoni'õ. Ba hiza, alai niha si manga mbõli Nono Niha andrõ! Abõlõ sõkhi ba niha andrõ na lõ irai tumbu ia!"

25Imane Yuda si manga mbõli andrõ, "Tatu, tenga ya'odo niw̃a'õu Guru?" Itema linia Yesu, "Si manõ wanguma'õu!"

26Me manga ira, Ihalõ roti Yesu, I'aohasi gõlõ Lowalangi. Ibe'e roti andrõ khõ ndra nifahaõ-Nia ba Imane, "Mitema, ba mi'a; boto-Gu da'e."

27Aefa da'õ Ihalõ mako nagu sebua, I'aohasi gõlõ Lowalangi. Aefa da'õ Ibe'e mako andrõ khõ ndra nifahaõ-Nia, ba Imane, "Mibadu dozi ami.

28Do-Gu da'e si tobali fangaro gamabu'ula li Lowalangi. Do-Gu nifaduwa salahi zato ba wangefa'õ horõra.

29Ya faduhu dõdõmi: Lõ sa'ae ubadu na-Gu andre irugi ginõtõ wamadu-Gu agu si bohou si fao ya'ami, ba Mbanua si Bohou khõ Nama-Gu."

30Me aefa da'õ manunõ ira, ba numalõ ira we'amõi ba Hili Zaitu.

31Imane Yesu khõ ndra nifahaõ-Nia, "Bongi andre moloi ami mirõi Ndra'o; bõrõ me no tesura ba Mbuku Ni'amoni'õ: 'Ubunu dania gubalo andrõ, ba oi muzawili ngawawa mbiribiri.'

32Ba me no tesusugi Ndra'o mangawuli, ba ofõna mõi Ndra'o ba Galilea moroi khõmi."

33Ba imane Fetero khõ Yesu, "He larõi Ndra'ugõ sato andrõ, ba ma'ifu lõ urõi Ndra'ugõ!"

34Imane khõnia Yesu, "Fondrondrongo: Bongi andre, fatua lõ miwo manu, ba no tõlu kali õfaduhu'õ wa lõ õ'ila Ndra'o."

35Imane Fetero, "He mate ndra'o awõ-U, ma'ifu wa lõ uw̃a'õ wa lõ u'ila Ndra'ugõ!" Ba fefu nifahaõ bõ'õ oi zara lamanõ wanguma'õ.

36Me no aefa da'õ numalõ Yesu awõ ndra nifahaõ-Nia ba nahia sotõi Kabu Gezemane. Ba da'õ Imane khõra, "Midadao ba da'e, gasagasa we'amõi-Gu mangandrõ ba da'õ."

37Ikaoni we'amõi awõ-Nia Wetero ba darua nono Zebedai'o. Ibõrõtaigõ alangu dõdõ-Nia ba abu dõdõ.

38Imane khõ ndra nifahaõ-Nia, "Abu sibai dõdõ-Gu, hulõ na mate Ndra'odo. Mi'iagõ da'e ba bõi mifõrõ awõ-Gu."

39I'arõu'õ Ia Yesu ma'ifu, ba alau Ia tou ba danõ ba wangandrõ. Imane, "He Ama, na tola akha italu'i Ndra'odo famakao si lõ tola lõ'õ Utaõgõ andrõ. Ba bõi ya'itõrõ zomasi Ndra'o, ya'alua zomasi Ndra'ugõ."

40Me mangawuli Ia khõ ndra nifahaõ-Nia andrõ, I'ila no mõrõ ira. Imane khõ Wetero, "Hadia, tebai lõ mõrõ ami awõ-Gu he ha sambua za wa'ara?

41Mi'anaro ba mi'angandrõ fabõi gõna ami fanandraigõ. Omasi dõdõmi wamalua si sõkhi, ba hiza lõ fa'abõlõmi, me no sambõ fa'abõlõ nõsi."

42Ba Ifuli mõi samuza tõ Yesu mangandrõ. Imane, "He Ama, na lõ tola lõ'õ Utaõgõ wamakao andre ba tebai italu'i Ndra'o, ya itõrõ zomasi Ndra'ugõ."

43Aefa da'õ mangawuli zui Yesu, ba I'ila no mõrõ ndra nifahaõ-Nia. Abua sibai guli hõrõra ba wanukõu.

44Ba Irõi zui ira Yesu, mõi Ia wangandrõ, no medõlu kali. Fagõlõ gangandrõw̃a-Nia andrõ si mane si numalõ.

45Aefa da'õ mangawuli Ia zui khõ ndra nifahaõ-Nia ba Imane, "Hadia, mõrõ nasa ami ba molombase ami? Mifaigi, no irugi inõtõnia, labe'e ba danga niha si so horõ Nono Niha andrõ.

46Mifaoso, mofanõ ita. Hiza! No tohare niha si manga mbõli-Gu andrõ!"

47Me fahuhuo na Yesu, ba tohare Yuda, samõsa moroi ba gotalua nifahaõ-Nia. Ato niha si fao khõnia solohe fõda awõ wagado. Niha nifatenge ndra ere sebua awõ ndra satua mbanua niha Yahudi.

48No i'ombakha'õ khõra dandra si manga mbõli andrõ wanguma'õ, "Niha ni'agogu bawa dania, da'õ Ia. Mira'u Ia!"

49Ba me larugi naha andrõ, idõlõ ia Yuda khõ Yesu ba imane, "Ya'ahowu, Guru!" Ba i'ago mbawa Yesu.

50Imane Yesu, "He talifusõ, hana wa so'õ ba da'e!" La'ondrasi Yesu niha sato andrõ ba wondra'u Ya'ia.

51Samõsa ba gotalua nifahaõ Yesu andrõ zodõbi fõda, ba ifalisi zawuyu gere sebua andrõ faoma fõdania irege aetu dalinga.

52Imane khõnia Yesu, "Saembugõ wõdamõ andrõ, bõrõ me dozi niha sangoguna'õ fõda mate ia dania ba wõda.

53Hadia miwalinga tebai U'andrõ khõ nama-Gu ba wa'alio zi felendrua ngawawa mala'ika?

54Na si manõ, hewisa tola alua zi mane si so ba Mbuku Ni'amoni'õ, ya'ia wa lõ tola lõ'õ alua zi mane da'e?"

55Imane Yesu ba niha sato andrõ, "Mõi ami ba wondra'u Ya'o, andrõ wa mi'ohe wõda awõ wagado, hulõ na samarukhu Ndra'odo andre? Ero ma'õkhõ mamahaõ Ndra'o ba Nomo Lowalangi, ba hana wa lõ mira'u-Do?

56Fefu zalua andre, ba lõ tola lõ'õ alua, ena'õ alua nisura ndra sama'ele'õ bakha ba Mbuku Ni'amoni'õ." Me no aefa da'õ oi zara moloi ndra nifahaõ-Nia larõi Yesu.

57Me no lara'u Yesu, la'ohe Ia ba nomo Gayafa, ere sebua. Ba da'õ no owulo ndra sangila amakhoita awõ ndra satua mbanua niha Yahudi.

58Me inõtõ da'õ i'o'õ Yesu moroi ba zarõu Fetero irugi golayama gere sebua andrõ. Mõi bakha Wetero ba golayama, dumadao ia ba gotalua zanaro. Omasi ia i'ila hewisa lualua dania da'õ fefu.

59Ira ere sebua awõ zangetu'õ huku andrõ la'alui sasi sofaya ena'õ tola la'etu'õ huku famunu khõ Yesu.

60Ba sambua lõ lasõndra zi tobali lohelohe, hew̃a'ae no ato niha si tobali sasi sofaya. Ba gafuriata, darua niha si mõi fõna.

61Lamane wanguma'õ, "No iw̃a'õ niha andre, 'Tola Ududugõ Nomo Lowalangi, ba Ufuli Ufazõkhi ba zi tõlu ngaluo!'"

62Lõ manõ hedehede Yesu, "Hadia lõ Õtema li wangadura andrõ nitandrõsaigõ khõ-U?"

63Ba lõ manõ hedehede Yesu. Samuza tõ muhede gere sebua andrõ imane khõ-Nia, "Ba dõi Lowalangi sauri, w̃a'õ khõma hadia Ya'ugõ Razo Sangorifi, Ono Lowalangi?"

64Imane Yesu, "Si manõ wanguma'õu. Ba mitõngõni: I'otarai da'e ba mi'ila dania Nono Niha andrõ dumadao ba gambõlõ Lowalangi si lõ ambõ fa'abõlõ, ba tohare Ia dania ba dete lawuo!"

65Isika nukhania Ere sebua andrõ, imane, "No i'o'aya Lowalangi! Lõ moguna sa'ae sasi. No mirongo wango'aya-Nia andrõ.

66Iada'e, hewisa gera'erami?" Latema li, "No fasala Ia, lõ tola lõ nibunu Ia."

67Ladiloi mbawa Yesu, ba labõzi Ia. So gõi zamalisi bawa-Nia,

68lamane, "Tandraigõ ombakha'õ khõma, he Razo Sangorifi! Haniha zamalisi bawa-Mõ?"

69No mudadao baero ba golayama Wetero. Samõsa ba gotalua zawuyu ira alawe khõ gere sebua zangondrasi Fetero. Imane khõnia ira alawe andrõ, "Hadia, tenga gõi ya'ugõ samõsa zi faofao awõ Yesu andrõ banua Galilea?"

70Itimbagõ wehede andrõ Fetero fõnara imane, "Hadia niw̃a'õu, lõ aboto ba dõdõgu?"

71Aefa da'õ mõi ia ba mbawa ndruhõ golayama. So ndra alawe bõ'õ sangila Fetero, ba imane ba niha si so ba da'õ, "Niha andre gõi zi faofao khõ Yesu banua Nazareta andrõ."

72Ifuli itimbagõ Fetero, fahõlu ia imane, "Sindruhundruhu lõ u'ila niha andrõ!"

73Lõ ara aefa da'õ la'ondrasi Wetero niha si so ba da'õ, lamane khõnia, "Sindruhu, samõsa ndra'ugõ ba gotaluara. Oroma da'õ ba wehedeu."

74Ifuli mõi ba hõlu Wetero imane, "Sindruhundruhu, lõ u'ila niha andrõ!" Ba ginõtõ da'õ miwo manu.

75Itõrõ tõdõ Wetero niw̃a'õ Yesu khõnia, me Imane, "Fatua lõ miwo manu, tõlu kali õfaduhu'õ wa lõ õ'ila Ndra'odo." Aefa da'õ numalõ baero Wetero, mege'ege sibai ia ba wa'abu dõdõ.


  Share Facebook  |  Share Twitter

Download Audio MP3 (Matius 26):
Mobile (Low Quality) - CD (High Quality)

 <<  Matius 26 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran