Dual Panel1Me inõtõ da'õ so Yohane Samayagõ Idanõ, ba danõ si mate ba Yudea, ba ibõrõtaigõ fahuhuo ia ba da'õ.
2Imane, "Mifalalini gera'erami ba bõi milau horõ sa'ae, bõrõ me lõ ara tõ ibõrõtaigõ wamatõrõ-Nia Lowalangi!"
3Yohane andre niw̃a'õ Yesaya sama'ele'õ ba wehedenia me imane: "So niha si'ao ba danõ si mate, 'Mihaogõ lala khõ Zo'aya, mifadaya lala khõ-Nia.'"
4Baru Yohane andrõ nifazõkhi moroi ba guli gondra. Uli gurifõ mbõbõ talunia. Tamo ba w̃e w̃ani gatua gõnia.
5Ato niha Yerusalema, ba moroi ba Yudea, awõ niha sato si otarai mbanua si fasui Yoridano, mõi mangondrasi Yohane.
6La'ombakha'õ horõra, ba ibayagõ idanõ ira Yohane ba Nungo Nidanõ Yoridano.
7Ato ndra Farizai'o ba Sadukai'o si mõi khõ Yohane ba wamayagõ'õ ya'ira idanõ. Me i'ila tohare ira, imane khõra, "He ya'ami niha si lõ sõkhi! Haniha zanguma'õ khõmi wa tola aheta ami moroi ba wõnu Lowalangi andrõ dania?
8Mifalua mbuabua sangoroma wa no mifalalini gera'erami, wa lõ mifalua horõ sa'ae.
9Bõi miwalinga tola te'atulõ'õ ami na miw̃a'õ, 'Tuama Gaberahamo.' Ya faduhu dõdõmi wa tola Ifazõkhi nga'õtõ Gaberahamo Lowalangi, moroi ba gara andre!
10No so wato ba wolobõ eu fabaya w̃a'ania. Tõla geu si lõ mowua bua si sõkhi ba mu'obõ ba mutibo'õ bakha ba galitõ.
11Ubayagõ ami idanõ ba wangoroma'õ wa no tefalalini gera'erami, lõ mifalua horõ sa'ae; ba Ya'ia, si tohare aefa ndra'odo dania zamayagõ ya'ami faoma Eheha Ni'amoni'õ ba alitõ. Abõlõ ebua Ia moroi khõgu. Ambõ solohe badagahe-Nia ndra'odo.
12So ba danga-Nia niru ba wanõri. Itafi'õ gulitõ-Nia irege sõkhi. Ifa'anõ ba halasa gulitõ, ba fefu gadaya Itunu dania ba galitõ si lõ matemate."
13Me inõtõ da'õ mofanõ Yesu i'otarai Galilea Isaw̃a Nungo Nidanõ Yoridano. Ba da'õ mõi Ia khõ Yohane ba I'andrõ khõ Yohane ena'õ ibayagõ idanõ Ia.
14Ba lõ fao dõdõ Yohane ba niw̃a'õ-Nia andrõ. Imane Yohane, "Ya'odo na'i zindruhunia nibayagõ-U idanõ. Iada'e hana wa Ya'ugõ zi mõi khõgu."
15Itema li Yesu, "Iada'e, hana na si manõ. Bõrõ me si manõ zinangea khõda ba wamalua fefu somasi Lowalangi." Awena ibayagõ idanõ Yesu Yohane.
16Me no aefa mubayagõ idanõ Yesu, mofanõ Ia moroi ba nidanõ andrõ. I'anema'õ teboka mbanua si yaw̃a ba I'ila Yesu Geheha Lowalangi, mõi mitou hulõ marafadi, manuge ia khõ Yesu.
17Aefa da'õ terongo li soroi zorugo, sanguma'õ, "Ya'e Nono-Gu omasiõ, wa'omasi-Gu Ia."