Alkitab Mobile SABDA
[VER] : [NIAS]     [PL]  [PB] 
 <<  Markus 1 >> 

1Turia Somuso Dõdõ sanandrõsa khõ Yesu Keriso, Ono Lowalangi da'e.

2Tebõrõtaigõ Duria Somuso Dõdõ andre si mane nisura Yesaya sama'ele'õ: Imane Lowalangi, "'Ya'e dengetenge-Gu, Ufadaridari'õ ia fõna-U, ena'õ ihaogõ lala khõ-U.'

3So niha si'ao ba danõ si mate, 'Mihaogõ lala Zo'aya, mifadaya lala nitõrõ-Nia.'"

4Si mane nisura andrõ, si manõ we'aso Yohane ba danõ si mate. Ibayagõ idanõ niha awõ wa ituriagõ duria soroi Lowalangi. Imane Yohane, "Si lõ tola lõ'õ mifalalini gera'erami ba wondrõi horõmi ba mifabayagõ'õ ami idanõ, ena'õ I'efa'õ khõmi horõmi andrõ Lowalangi."

5Fefu niha ba nõri Yudea awõ niha ba mbanua Yerusalema la'ondrasi ba wamondrongo huhuo Yohane. La'ombakha'õ horõra ba ibayagõ ira idanõ Yohane ba Nungo Nidanõ Yoridano.

6Nukha Yohane moroi ba guli gondra; uli gurifõ mbõbõ talunia ba tamo awõ w̃e w̃ani gatua gõnia.

7I'ombakha'õ duria andre, "Aefa ndra'o dania, tohare niha sabõlõ sebua moroi khõgu. Tenga sinangea ndra'o we'amõi enoni-Nia ba wamokai bõbõ mbadagahe-Nia.

8Idanõ ubayagõ khõmi, ba Eheha Lowalangi Ibayagõ khõmi dania."

9Me inõtõ da'õ, I'otarai Nazareta ba danõ Galilea Yesu, ba Ifabayagõ'õ Ia idanõ khõ Yohane ba Nungo Nidanõ Yoridano.

10Me mõi yaw̃a Yesu moroi ba nidanõ, teboka mbanua si yaw̃a ba mõi mitou Geheha Lowalangi khõ Yesu hulõ marafadi.

11Terongo li Lowalangi sanguma'õ, "Onogu Ndra'ugõ ni'omasi'õ-Gu. Sangomusoi'õ tõdõ-Gu Ndra'ugõ."

12I'anema'õ i'ohe Yesu numalõ ba danõ si mate Eheha Lowalangi andrõ.

13Õfa wulu wongi so Ia ba da'õ, itandraigõ Ia Afõkha. Fao gõi khõ-Nia gutu ndru'u safaito ba da'õ, ba tohare mala'ika we'amõi enoni-Nia.

14Me no labe'e ba gurunga Yohane, ba mõi Yesu ba Galilea, wanuriaigõ Turia Somuso Dõdõ soroi Lowalangi ba da'õ.

15Imane, "No irugi inõtõ Ibõrõtaigõ wamatõrõ-Nia Lowalangi. Mifalalini gera'erami, ba mi'amati ba Duria Somuso Dõdõ soroi Lowalangi!"

16Me mowaõwaõ Yesu ba zinga Mbaw̃a Galilea, I'ila darua zangalui i'a, ya'ia Simoni ba Andrea talifusõnia, lalau fadiala ba wangalui i'a.

17Imane khõra Yesu, "O'õ Ndra'o. Ufahaõ ami ba wama'u'u niha."

18I'anemai'õ larõi ndrialara, mõi ira ba wolo'õ Yesu.

19Ba me Itohugõ wofanõ Yesu I'ila darua zi fatalifusõ bõ'õ, Yakobo ba Yohane ono Zebedai'o. Lafazõkhizõkhi ndrialara yaw̃a ba dundraha.

20Me I'ila ira Yesu, Ikaoni ira. Ba larõi namara Sebedai'o si so ba dundraha awõ zangai halow̃õ khõra. Mõi ira ba wolo'õ Yesu.

21Aefa da'õ larugi mbanua Gafana'uma Yesu awõ zolo'õ Ya'ia. Me luo Sabato aefa da'õ, mõi Yesu ba gosali ba mamahaõ Ia ba da'õ.

22Oi ahõlihõli dõdõ niha si so ba da'õ wamondrondrongo famahaõ-Nia. Mamahaõ ia si fao fa'abõlõ, tenga si mane sangila amakhoita andrõ.

23Me inõtõ da'õ gõi mõi bakha ba gosali samõsa niha ni'u'uni geheha si lõ sõkhi. Mu'ao niha andrõ imane,

24"Hadia nilau-Mõ khõma, he Yesu, banua Nazareta? Hadia, mõi'-Õ ba wamunu ya'aga? U'ila haniha Ndra'ugõ: Tengetenge ni'amoni'õ Ndra'ugõ si otarai Lowalangi!"

25Mofõnu Yesu khõ geheha da'õ. Imane, "Honogõ'õ! Ofanõ moroi ba niha andre!"

26Abõlõbõlõ ifadõgõ niha da'õ eheha si ra'iõ andrõ, mu'ao'ao ia.

27Oi ahõlihõli dõdõ niha fefu, faoma lamane khõ nawõra, "Hadia da'e? Sambua famahaõ si bohou! Ba wa'abõlõ-Nia Ifofanõ mbekhu si lõ sõkhi, ba la'o'õ li-Nia!"

28Alio sibai tehõngõ duria Yesu andrõ ba zi sagõrõ tanõ Galilea.

29Larõi gosali andrõ Yesu awõ ndra nifahaõ-Nia, numalõ ira ba nomo Zimoni ba Andrea. Fao khõra gõi Yakobo ba Yohane.

30Ba mofõkhõ fa'aukhu nina matua Wetero, no so ia ba nahia wemõrõ. La'ombakha'õ khõ Yesu da'õ me larugi nomo.

31Ba mõi Yesu khõ nina matua Wetero, Igogohe dangania ena'õ maoso. Ba dõhõ wa'aukhunia, ba mõi ia ngoningonira.

32Me tanõ owi, me aekhu luo, ba la'ohe khõ Yesu niha sofõkhõ ba niha nira'u wa'abõlõ zi lõ sõkhi.

33Fefu nõsi mbanua da'õ, owulo ira ba golayama fõna nomo andrõ.

34Ba ato niha nifadõhõ Yesu sofõkhõ soya ngawalõ, awõ wa Ifofanõ geheha si lõ sõkhi. Lõ Itehe muhedehede geheha si lõ sõkhi andrõ, me la'ila haniha Ia.

35Mahemolu õ, me arakhagõ moluo, maoso Yesu mõi Ia ba nahia si lõ nihaniha. Mangandrõ Ia ba da'õ.

36La'alui Ia ira Simoni ba awõnia bõ'õ.

37Me lasõndra Ia ba lamane khõ-Nia, "Fefu niha oi la'alui Ndra'ugõ, Ama."

38Itema li Yesu, "Da tatohugõ wofanõda ba mbanua bõ'õ misa ba zi fasui da'e. Lõ tola lõ mangombakha Ndra'o ba da'õ gõi, bõrõ me da'õ dani-Gu we'amõi ba da'e."

39Bõrõ da'õ mõi Yesu gofu heza ba Galilea ma'asagõrõ, ba mangombakha Ia ba nomo'omo wangandrõ awõ wa Ifofanõ mbekhu si lõ sõkhi.

40So samõsa zofõkhõ bou auri sangondrasi Yesu. Ibalõduhini danõ ba wangandrõ tolo khõ Yesu imane, "Na omasi'Õ, Ama, ba tola Õfadõhõ ndra'odo."

41Ahakhõ dõdõ Yesu niha andrõ. I'oro'õ danga-Nia ba wombambaya ya'ia. Imane, "O'masi-Do, ya dõhõ ndra'ugõ!"

42I'anema'õ' aheta mbou auri andrõ khõnia ba dõhõ ia.

43Ifofanõ ia Yesu Ifaogõ goroisa-Nia,

44"Tõngõni, bõi ombakha'õ zalua andre gofu ha'õkhõ. Dõlõ'õ we'amõi khõ gere, akha ifareso ndra'ugõ. Aefa da'õ, be'e zumange khõ Lowalangi molo'õ amakhoita niw̃a'õ Moze, si tobali fangoroma ba niha wa no dõhõ ndra'ugõ."

45Mofanõ niha andrõ, ba lõ mamalõmalõ idunõdunõ zalua andrõ gofu heza, irege tebai I'oroma'õ Ia Yesu we'amõi ba mbanua. Torõi manõ Ia baero mbanua ba zi lõ nihaniha. Ba hew̃a'ae si manõ la'ondrasi sa'atõ Ia niha sato moroi ba zi fasui banua fefu.


  Share Facebook  |  Share Twitter

Download Audio MP3 (Markus 1):
Mobile (Low Quality) - CD (High Quality)

 <<  Markus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel