Dual Panel1Me ahatõ larugi Yeruzalema, mõi ira ba Mbetifage, ba ba Mbetania, ba gahe Hili Zaitu. Ba da'õ so darua nifahaõ Yesu si no Ifadaridari'õ.
2Imane khõra, "Mi'ae'e ba mbanua andrõ fõnada. Na mirugi mbanua andrõ, mi'ila nono galide no te'amõhõgõ, si lõ irai mu'oguna'õ ba wonoro niha. Mitoto'õ wesunia ba mi'ohe ia ba da'e.
3Ba na so zanofu khõmi hana wa mi'efa'õ mbõbõ galide andrõ, ba mimane, 'I'oguna'õ sokhõ, ba wa'ali'o sa Ifangawuli.'"
4Ba mõi ndra nifahaõ Yesu andrõ si darua, la'ila nono galide no te'amõhõgõ ba mbawandruhõ ba zinga lala. Latoto'õ wesu galide andrõ.
5Lasofu khõra niha sozizio ba da'õ, "He, hadia khõmi da'õ? Hana wamitoto'õ wesu galide andrõ?"
6Latema li si mane si no I'ombakha'õ khõra Yesu. Latehegõ khõra la'ohe galide andrõ.
7Me larugi ba zi so Yesu, ba lahalõ nukhara labe'e danedane ba hulu galide, aefa da'õ mõi yaw̃a Yesu.
8Ato niha samologõ barura sebua ba lala, ba so gõi zamazawili tuturu geu nihalõra moroi ba mbenua.
9Ba dozi sowaõwaõ, he si so fõna awõ zolo'õlo'õ moroi furi, mu'ao ira, lamane, "Nisuno Lowalangi! Nifahowu'õ zi so andrõ ba dõi Zo'aya!
10Nifahowu'õ wamatõrõ-Nia si so dania -- famatõrõ Duada Dawido! Misuno Lowalangi Fondrege Zalaw̃a!"
11Irugi Yeruzalema Yesu, ba mõi Ia ba Nomo Zo'aya. Ifaigi fasui, aefa da'õ numalõ Ia ba Mbetania fao ndra nifahaõ-Nia si felendrua, bõrõ me no bongi.
12Mahemolu õ, me no larõi Mbetania, ba olofo Yesu.
13Moroi ba zarõu I'ila dõla ara sabõlõ bulu. Mõi Ia mufaigi na so mbua geu andrõ. Me Irugi narõ geu, I'ila ha bulu manõ zi so, bõrõ me tenga inõtõ wowua ara me luo da'õ.
14Imane Yesu ba ara andrõ, "I'otarai da'e ya samõsa lõ niha si manga buau sa'ae!" Larongo niw̃a'õ Yesu andrõ ira nifahaõ-Nia.
15Aefa da'õ ba larugi Yeruzalema. Mõi Yesu ba Nomo Zo'aya. Ba da'õ Ibõrõtaigõ Ifofanõ niha sogale fefu. Ibali'õ fefu meza zanukari kefe, awõ dadaoma zamawa marafadi.
16Samõsa lõ Itehe so zolohe hadia ia sanõrõ olayama Nomo Zo'aya andrõ.
17Aefa da'õ Ifahaõ niha, Imane, "Tenga no musura ba Mbuku Ni'amoni'õ si mane da'e: Imane Lowalangi, 'Omo wangandrõ dõi nomo-Gu ba niha fefu soi!' Ba ya'ami no mibali'õ nahia zorabu!"
18Ba larongo ira ere sebua awõ zangila amakhoita wehede-Nia andrõ. Labõrõtaigõ la'alui lala ba wamunu Yesu. Ata'u ira Ia, bõrõ me oi ahõlihõli dõdõ niha sato ba wamahaõ-Nia.
19Me ahatõ wa'abongi, larõi mbanua andrõ Yesu awõ ndra nifahaõ-Nia.
20Mahemolunia sahulõ wongi, me latõrõ zinga ara, la'ila wa no mate ara andrõ irugi si tou w̃a'ania.
21Itõrõ tõdõ Wetero hadia zalua menewi. Andrõ isofu Fetero khõ Yesu, "He Guru, faigi atõ! Tõla ara si no Õ'elifi andrõ no mate!"
22Itema linia Yesu, "Mi'amati khõ Lowalangi,
23Tola miw̃a'õ ba hili andre, 'Fazaw̃a'õ ba tibo'õgõ ba nasi!' ba itõrõ zi manõ khõmi; asala lõ aombõ dõdõmi, ba faduhu dõdõmi wa duhu alua niw̃a'õmi andrõ.
24Bõrõ da'õ mitõngõni: Na mangandrõ ami ba na mi'andrõ hadia ia, mifati wa no Ibe'e khõmi Lowalangi ni'andrõmi, ba lõ zi lõ mitema.
25Na mangandrõ ami, ba na fatua lõ da'õ lõ sõkhi dõdõmi ba zi samõsa niha, mi'efa'õ ua zala niha andrõ, ena'õ I'efa'õ horõmi andrõ Amami si so ba zorugo.
26[Na lõ mi'efa'õ zala niha bõ'õ, ba lõ gõi I'efa'õ horõmi andrõ Amami si so ba zorugo.]"
27Mangawuli zui ira ba Yeruzalema. Ba me mowaõwaõ Yesu ba kha ba Nomo Zo'aya, la'ondrasi Ia ira ere sebua, sangila amakhoita awõ ndra satua mbanua niha Yahudi.
28Lasofu khõ-Nia, "Hadia kuaso-U wa Õlau da'e fefu? Haniha zame'e kuaso andrõ khõ-U?"
29Itema li Yesu, "Omasi-Do gõi Usofu ua khõmi. Mitema li awena U'ombakha'õ dania khõmi bõrõ kuaso haniha wa Ufalua da'e fefu.
30Mi'ombakha'õ khõ-Gu heza moroi kuaso khõ Yohane Samayagõ Idanõ andrõ ba wamayagõ idanõ niha; hadia moroi ba Lowalangi ma zui moroi ba niha?"
31Faoma mamagõlõ ira. Lamane, "Hadia niw̃a'õda? Na taw̃a'õ, 'Moroi khõ Lowalangi,' Iw̃a'õ dania khõda, 'Hana wa lõ faduhu dõdõmi khõ Yohane?'
32Ba afõkhõ gõi wanguma'õ, 'Moroi ba niha.'" Bõrõ me ata'u ira niha sato, me fefu niha oi faduhu dõdõ wa sama'ele'õ Yohane andrõ.
33Andrõ lamane, "Lõ ma'ila." Imane khõra Yesu, "Na si manõ, lõ'õ gõi U'ombakha'õ khõmi heza moroi kuaso khõ-Gu wolau da'e fefu."