Dual Panel1Fahuhuo Yesu faoma amaedola khõ ndra ere sebua, sangila amakhoita, ba ira salaw̃a niha Yahudi andrõ. Imane, "So samõsa niha sokhõ kabu nagu, i'õlini kabu andrõ. Aefa da'õ ikhao danõ nahia wamera'õ agu ba ifazõkhi sambua nose zanaro. Aefa da'õ ibe'e nisew̃a kabu nagu andrõ ba zangahalõ ba danõ, ba aefa da'õ mofanõ ia ba mbanua bõ'õ.
2Me no irugi inõtõ waneteu bua nagu, ifatenge zawuyunia khõ ndra sangahalõ ba kabu nagunia ba wamareso ha wa'ebua dana khõnia moroi ba mbua kabu nagu andrõ.
3Ba lara'u zawuyunia andrõ ira sangahalõ ba kabu nagu. Labõbõzi zawuyu andrõ, lafofanõ ia lõ noro dangania.
4Ba ifuli ifatenge zawuyunia bõ'õ sokhõ kabu nagu. I'anema'õ labõbõzi zawuyu da'õ zui, lafofanõ ba laduhugõ wolele ya'ia.
5Ifuli ifatenge zawuyu bõ'õ, ba labunu zawuyu andrõ. Simanõmanõ lalau ba zawuyu tanõ bõ'õ nasa: so nibõbõzi ba so gõi nibunu.
6Haniha tõ nasa nifatenge zokhõ kabu andrõ? Ha tõ samõsa, ya'ia nononia omasiõ dõdõnia. Ifatenge nono andrõ khõ ndra sangahalõ ba kabu nagunia. Imane dõdõnia, 'Tatu lafosumange nonogu andre.'
7Ba hiza, faoma lamane khõ nawõra sangahalõ ba kabu nagu andrõ, 'Ya'e zanema ondrõitania. Da tabunu ia, ena'õ mõi khõda gondrõita andrõ!'
8Lara'u nono andrõ, labunu. Latibo'õ baero kabu mbotonia."
9Isofu Yesu, "Hadia nilau zokhõ kabu nagu andrõ? Lõ tola lõ'õ tohare ia ba wamunu sangahalõ ba kabunia andrõ, ba ibe'e kabunia ba zangahalõ bõ'õ.
10Tatu no mibaso ayati da'e ba Mbuku Ni'amoni'õ, 'Kara si lõ lafake sotomo no tobali kara sabõlõ moguna.
11Nilau Zo'aya da'õ; no fondrege zi sõkhi!'"
12Me larongo ira salaw̃a niha Yahudi gamaedola Yesu andrõ, la'alui lala ba wondra'u Ya'ia, bõrõ me aboto ba dõdõra wa khõra Itandrõsaigõ da'õ. Ba hiza, ata'u ira niha sato. Andrõ lalau mofanõ, larõi Yesu.
13Ba lafatenge ndra Farizai'o awõ zi fao khõ Herode õsa ba wanandraw̃aisi Yesu faoma fanofu.
14Mõi ira khõ-Nia ba lamane, "He Guru, ma'ila wa niha satulõ tõdõ Ndra'ugõ ba lõ ba dõdõ-U mbua gera'era niha gofu haniha ia. Õfahaõ zindruhu somasi Lowalangi ba niha, bõrõ me lõ Õfaigi mbawa niha. Tandraigõ w̃a'õ khõma, 'Na tabu'a mbeo khõ Razo ba Roma, hadia lõ itegu amakhoita agamada? Hadia si lõ tola lõ'õ tabu'a mbeo andrõ, ma zui lõ'õ?'"
15I'ila Yesu gera'erara. Itema lira Imane, "Hana wa omasi ami mitandraw̃aisi-Do? Miforoma'õ khõ-Gu sambua gefe firõ."
16Labe'e khõ-Nia sambua gefe firõ. Aefa da'õ Isofu Yesu, "Gambara ba tõi haniha da'e?" Lamane, "Kaizaro!"
17Imane Yesu, "Na si manõ, be'e khõ Kaizaro hadia dana khõ Kaizaro, ba be'e khõ Lowalangi hadia dana khõ Lowalangi." Ahõli dõdõra wamondrongo fehede-Nia.
18Ba so õsa ndra Sadukai'o sangondrasi Yesu. (Ya'ira zanguma'õ wa lõ femaoso niha na no aefa mate.)
19Lamane khõ Yesu, "He Guru, no ibe'e goroisa khõda Moze: 'Na mate samõsa ndra matua irõi ndrongania, ba lõ ono khõra, ba lõ tola lõ ihalõ ndrongania andrõ talifusõnia; ena'õ ifonga'õtõ dalifusõnia andrõ si no mate.'
20So dafitu zi fatalifusõ. Mangowalu zia'a, ba mate ia lõ ono.
21Mangowalu ganete da'õ ba ndra'alawe andrõ, ba mate gõi lõ ono. Si manõ gõi zalua ba ganete da'õ,
22ba simanõmanõ zalua irugi zi dafitu. Ba gafuriatania mate gõi ndra alawe andrõ.
23Na ifuli auri ira dania ba ngaluo wemaoso zi mate, ha donga ndra'alawe andrõ? Bõrõ me dafitu manõ ira no oi mangowalu khõnia!"
24Imane Yesu, "No elungu sibai wangerangerami. Bõrõ me lõ aboto ba dõdõmi Mbuku Ni'amoni'õ: ba lõ gõi aboto ba dõdõmi wa'abõlõ Lowalangi.
25Bõrõ, na ifuli auri niha si mate dania, lõ mangowalu ira sa'ae, auri ira hulõ mala'ika ba zorugo.
26Ba sanandrõsa ba zi mate sauri mangawuli, hadia lõ irai mibaso ba Mbuku Moze sanandrõsa ba za'asa'a mao si hola andrõ? Bakha ba ayati andrõ muhede Lowalangi khõ Moze Imane, 'Lowalangi Gaberahamo Ndra'o, Lowalangi Giza'aki ba Lowalangi Yakobo.'
27Lowalangi andrõ tenga Lowalangi zi mate. No Lowalangi niha sauri Ia. No elungu sibai wangerangerami andrõ!"
28Tohare samõsa zangila amakhoita ba wamondrongo fahuhuosa Yesu khõ ndra Sadukai'o andrõ. I'ila wa no enahõi wanema Yesu lira. Andrõ isofu khõ Yesu, "Hadia goroisa sabõlõ moguna moroi ba goroisa fefu?"
29Itema li Yesu, "Oroisa sabõlõ moguna, ya'ia da'õ: 'Mifondrondrongo ya'ami niha Gizera'eli! Ha samõsa Zo'aya Lowalangida, ha Ya'ia Zo'aya.
30Omasi'õ Zo'aya Lowalangiu moroi si'aikõ ba dõdõu, nosou ma'asambua, ba horigõ fefu wa'abõlõu awõ gera'erau.'
31Ba oroisa sabõlõ moguna fanete da'õ: 'Omasi'õ nawõu, si mane fa'omasiu ndra'ugõ.' Lõ sabõlõ moguna ba goroisa baero zi dua mbalõ andrõ."
32Imane sangila amakhoita andrõ khõ Yesu, "Faudu sibai wanema li andrõ, Ama! Duhu niw̃a'õ-U: Ha So'aya andrõ Lowalangi. Lõ Lowalangi tanõ bõ'õ.
33Ba lõ tola lõ'õ i'omasi'õ Lowalangi andrõ niha moroi si'aikõ ba dõdõnia, awõ wa ihorigõ wa'abõlõ fefu wangerangerania. Lõ tola lõ'õ gõi i'omasi'õ niha bõ'õ si mane fa'omasinia ia samõsa. Abõlõ sõkhi da'õ moroi ba wame'e sumange urifõ awõ zumange tanõ bõ'õ khõ Lowalangi."
34I'ila Yesu wa sõkhi sibai wanema li zangila amakhoita da'õ. Andrõ Imane khõnia Yesu, "No arakhagõ tobali ono mbanua Lowalangi ndra'ugõ." Aefa da'õ samõsa lõ si barani sa'ae mame'e fanofu khõ Yesu.
35Me mamahaõ Yesu ba Nomo Zo'aya, Isofu Imane, "Hewisa wa law̃a'õ ira sangila amakhoita wa Razo Sangorifi andrõ ma'uwu Dawido?
36Ba Dawido samõsa ni'o'ou Geheha Lowalangi wanguma'õ, 'No Iw̃a'õ So'aya khõ Zo'aya ya'o: dadao ba gambõlõ-Gu irege Ube'e barõ gaheu zi fa'udu khõu.'
37Na ikaoni Razo Sangorifi andrõ Dawido, 'So'aya', hewisa wa tola ma'uwu Dawido Ia?" Niha sato si so ba Nomo Zo'aya, omasi sibai ira wamahaõ Yesu.
38Iw̃a'õ khõra Yesu, "Mi'angelama khõ ndra sangila amakhoita. Omasi mowaõwaõ ira ba lafake mbaru sanau ena'õ nifozumazumange ira ba mbanua.
39Omasi ira nahia soadu ba gosali ba he ba gowuloa.
40Lalimo ndra lakha mbanua ba larabu nomora. Ba wamini'õ fa'alõsõkhira andrõ, la'anau'õ wangandrõra. Abõlõ abua huku si gõna ya'ira dania!"
41Me dumadao Yesu fõna naha game'ela ba Nomo Zo'aya, Ifaigifaigi niha samae'e kefe ba naha andrõ. Ato niha si kayo same'e kefe sebua;
42ba so gõi lakha mbanua si numana. Ibe'e dombua gefe loga, kefe sabõlõ ide'ide.
43Ikaoni ndra nifahaõ-Nia Yesu ba Imane khõra, "Mitõngõni da'e: no abõlõ ebua gefe nibe'e lakha mbanua andrõ moroi ba nibe'e danõ bõ'õ.
44Bõrõ me tanõ bõ'õ andrõ labe'e gefe ba naha game'ela, si tõra zi so khõra. Ba lakha mbanua andrõ si numana sibai no ibe'e fefu hadia ia zi so khõnia."