Alkitab Mobile SABDA
[VER] : [NIAS]     [PL]  [PB] 
 <<  Markus 13 >> 

1Aefa da'õ mofanõ Yesu, Irõi Nomo Zo'aya. Muhede samõsa moroi ba gotalua ndra nifahaõ-Nia imane, "He Amagu Guru, faigi atõ gosali andrõ. Faigi garania. Fondrege wa'asõkhi!"

2Itema li Yesu, "Õ'ila gosali sebua andrõ? Sambua lõ'õ dania kara gosali andrõ si te'anõ ba nahiania. Oi ladudugõ fefu."

3Me larugi Hili Zaitu, dumadao Yesu gametahõ Nomo Zo'aya. La'ondrasi Ia ira Fetero, Yakobo, Yohane ba Andrea edõna fahuhuo ira khõ-Nia ba zi lõ nihaniha.

4Lamane khõ-Nia, "Tandraigõ ombakha'õ khõma, hawa'ara alua da'e fefu? Ba hadia dandratandra wa lõ ara tõ alua ia?"

5Imane Yesu, "Mi'angenanõ, fa bõi lalimo ami niha.

6Ato dania zi so niha sangoguna'õ tõi-Gu ba lamane, 'Ya'odo Ia!' Ba ato zamaelungu niha.

7Na mirongo hõngõhõngõ wasuwõta awõ duria wanuwõ, bõi mi'ata'ufi. Lõ tola lõ'õ alua zi mane da'õ, ba tenga nasa inõtõ luo safuria da'õ.

8Soi si sambua isuwõ soi tanõ bõ'õ. Õri si sambua isuwõ nõri tanõ bõ'õ. Gofu heza misa alua ndruru danõ awõ lofo sabõlõbõlõ. Awena bõrõtania fefu da'õ, hulõ wa'afõkhõ nirasoi ndra'alawe ba wo'ono.

9Ba mi'angenanõ, bõrõ lara'u ami dania ba la'ohe fõna zanguhuku ba agama. Labõzibõzi ami ba nomo wangandrõ. La'ohe ami fõna ndra samatõrõ ba razo bõrõ Ndra'o. Ba da'õ ginõtõ si sõkhi khõmi ba wamaduhu'õ Ya'o khõra.

10Bõrõ me turia Somuso Dõdõ andrõ soroi Lowalangi lõ tola lõ la'ombakha'õ ba niha fefu soi.

11Ba na lara'u ami awõ wa la'ohe ami fõna zanguhuku, bõi mibusi dõdõmi hadia ia zinangea miw̃a'õ. Na no irugi inõtõ wehede, miw̃a'õ manõ hadia ni'ombakha'õ Zo'aya khõmi ba ginõtõ andrõ. Bõrõ me fehede niw̃a'õmi andrõ tenga fehedemi. No moroi ba Geheha Lowalangi.

12I'afõkhõi tõdõ dalifusõnia niha ba wamunu. Da'õ gõi dania zalua ba gotaluara nama nononia. La'uduni dania namara awõ ninara iraono ba labe'e ira ba zamunu niha.

13La'afõkhõi tõdõ dania ami niha bõrõ Ndra'o. Ba sanau õlõ irugi gamozua da'õ ni'orifi dania."

14"Mi'ila dania 'Wa'alõsõkhi Zamakiko andrõ,' musindro ba zi tenga sinangea nahiania. (Angombakhata ba zombaso: Ya'aboto ba dõdõmi geluaha da'e!) Ba ginõtõ da'õ akha moloi ba hili niha sowanua ba Yudea.

15Niha si so yaw̃a ba dete zagõ nomo bõi yamõi tou wanga'i hadia ia ba nomo.

16Niha si so ba nowi bõi yamangawuli ba wanga'i barura sebua.

17Alai wa'afõkhõ ngaluo andrõ ba ndra alawe sanabina ba ina si so ono sawuyu!

18Mi'angandrõ khõ Lowalangi, ena'õ bõi alua da'õ ba ginõtõ mbaw̃a deu.

19Ba ginõtõ safõkhõ andrõ so dania wa'abu dõdõ, si lõ irai alua ba gulidanõ andre, i'otarai me Iwõwõi gulidanõ Lowalangi irugi da'e, ba lõ gõi dania alua sa'ae.

20Na lõ I'adogo'õ ginõtõ andrõ Lowalangi, ba samõsa lõ sauri niha. Ba bõrõ mbanua nituyu-Nia andrõ wa I'adogo'õ ginõtõ andrõ Lowalangi.

21Ba ginõtõ da'õ, na so niha sanguma'õ khõmi, 'Hiza, razo sangorifi andrõ so Ia ba da'e!' ma zui 'Hiza, so Ia ba da'õ!' -- bõi faduhu dõdõmi ba niha andrõ.

22Bõrõ me tohare dania razo sangorifi sofaya ba sama'ele'õ sofaya. Lafazõkhi halõw̃õ sahõlihõli dõdõ awõ dandra sahõlihõli dõdõ ba wamaelungu banua Lowalangi. Ba tola lalimo mbanua Lowalangi nituyu andrõ gõi.

23Andrõ mi'angelama! No Uhõnagõ U'ombakha'õ khõmi fefu da'õ fatua lõ alua."

24"Na no aefa ginõtõ wamakao andrõ, ogõmigõmi luo, ba lõ mohaga sa'ae mbaw̃a.

25Atoru ndrõfi moroi ba mbanua, ba humeuheu wangaro mbanua si yaw̃a.

26Ba ginõtõ da'õ oroma dania wa'atohare Nono Niha andrõ ba lawuo, si fao fa'abõlõ ba lakhõmi sebua.

27Ba Ifatenge dania mala'ikania andrõ ba wangowuloi banua-Nia ba zi õfa watalinga danõ i'otarai mbalõ danõ si fõfõ irugi gahe mbanua."

28"Sõkhi mihalõ wamahaõ moroi ba dõla ara. Na owuge'e duturunia ba ombuyu, ba ibõrõgõ molehelehe, ya'aboto ba dõdõmi no ahatõ mbaw̃a lõkhõ.

29Si manõ gõi na mi'ila agalua zi manõ, ya aboto ba dõdõmi wa no ahatõ sibai ginõtõnia.

30Ya'aboto ba dõdõmi! Alua dania fefu da'õ fatua lõ mate fefu niha sauri iada'e.

31Taya mbanua si yaw̃a awõ danõ, ba lõ awu'a li-Gu."

32"Hew̃a'ae si manõ, samõsa gõi lõ sangila hadia mbaw̃a awõ ginõtõnia. Mala'ika ba zorugo lõ la'ila, Ono gõi lõ'õ, ha Ama zangila.

33Andrõ bõi mifõrõ ba mi'angenanõ, bõrõ me lõ mi'ila hawa'ara ginõtõnia.

34Salua andrõ hulõ niha sondrõi omonia ba sofanõ ba danõ sorõu. Ifaw̃a'õgõ khõ ndra sawuyunia ba wondrorogõ omonia, ba ibe'e halõw̃õ zamõsana. Ba zanaro ba mbawa ndruhõ mangoroi ia ena'õ lahaogõ wanaro.

35Bõrõ da'õ, bõi mifõrõ, me lõ mi'ila hawa'ara mangawuli zokhõ omo andrõ, ma ba zi tanõ owi, ma ba zi talu mbongi, ma ba wa lõ aratõ moluo, ma zui na no moluo.

36Na tohare ia lõ mudõnadõna, bõi ya'i'ila ami no mõrõ.

37Ba hadia niw̃a'õ-Gu andre khõmi, ba Uw̃a'õ gõi ba niha fefu: bõi mifõrõ."


  Share Facebook  |  Share Twitter

Download Audio MP3 (Markus 13):
Mobile (Low Quality) - CD (High Quality)

 <<  Markus 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel