Alkitab Mobile SABDA
[VER] : [NIAS]     [PL]  [PB] 
 <<  Markus 5 >> 

1Aefa da'õ larugi yefo Mbaw̃a Galilea Yesu awõ ndra nifahaõ-Nia, ba mbanua Gerasa.

2Ha mõi sibai tou Yesu moroi ba dundraha, i'ondrasi Ia samõsa niha soroi lewatõ.

3No ifa'u'u eheha si ra'iõ niha andrõ ba ba lewatõ torõi ia. No tebai mubõbõ ia sa'ae, he faoma rate si'õli.

4No asese labe'e mbilagu ba dangania awõ gahenia, ba i'etu'õ fefu rate andrõ, ba ifatõ zi'õli andrõ si so ba gahenia. Abõlõ sibai ia irege lõ hadõi niha si tola manaha ya'ia.

5Bongi ma'õkhõ ifanõrõnõrõ ia ba lewatõ awõ ba hilihili, mu'ao'ao, ba ibõzibõzi mbotonia faoma kara.

6Me i'ila moroi ba zarõu tohare Yesu, fagohi ia wangondrasi Yesu ba mangalulu ia fõna Yesu.

7Ebua linia we'ao, "He Yesu, Ono Lowalangi Fondrege Zalaw̃a! Hadia nilau-Mõ khõgu? Ba dõi Lowalangi u'andrõ bõi fakao ndra'odo!"

8(Imanõ wehede khõ Yesu bõrõ me Imane khõnia Yesu, "He bekhu si ra'iõ, ofanõ moroi ba niha andre!")

9Aefa da'õ Isofu khõnia Yesu, "Haniha dõimõ?" Itema li niha andrõ imane, "'Legiu' dõigu bõrõ me ato sibai ndra'aga."

10Aefa da'õ i'andrõ khõ Yesu ena'õ bõi Ifofanõ geheha si ra'iõ andrõ moroi ba mbanua andrõ.

11Ba so ngawawa mbawi ba zahatõ ba nahia andrõ sangalui gõ ba gahe hili.

12La'andrõ khõ Yesu eheha si ra'iõ andrõ ena'õ, "Itehegõ khõra momõi ba ngawawa mbawi andrõ."

13Ba Itehegõ khõra Yesu, ba mofanõ ira larõi niha andrõ mõi ira ba ngawawa mbawi. Ba lalau ira si tou ba mbaho bawi andrõ, numalõ ba mbaw̃a, oi alõmõ, so mato dua ribu rozi.

14Oi moloi zanaro bawi andrõ, ba la'ombakha'õ duria da'õ ba fasa ba ba mbanua misa. Numalõ baero fefu niha ba wamaigi hadia zalua andrõ.

15La'ondrasi Yesu ba la'ila niha nira'u geheha si ra'iõ andrõ no dumadao ia ba da'õ. No ilau monukha ba no ohahau gera'erania gõi. Bõrõ da'õ oi so wa'ata'ura fefu.

16Niha si no mangila samõsa zalua andrõ, da'õ zanutunutunõ hadia zi no alua ba niha nira'u wa'abõlõ si ra'iõ andrõ awõ ba mbawi andrõ.

17Bõrõ da'õ, la'andrõ khõ Yesu ena'õ irõi mbanuara.

18Me mõi yaw̃a ba dundraha Yesu, i'andrõ niha nira'u geheha si ra'iõ no mege ena'õ Itehegõ fao ia khõ Yesu.

19Ba hiza lõ Itehe Yesu. Imane khõnia Yesu, "Fuli'õ khõ ndra talifusõu. Ombakha'õ khõra fefu hadia nilau Zo'aya ba hawa'asõkhi mbõwõ-Nia khõu!"

20Mofanõ niha andrõ, ba i'ombakha'õ ba zi fulu banua hadia nilau Yesu khõnia. Oi ahõli dõdõ niha wamondrongo da'õ.

21Ifuli Ia yefo mbaw̃a Yesu. Ba ato niha sowulo no lafasui Ia.

22Tohare samõsa niha sotõi Ya'iro, ya'ia zondrõnia'õ ba gosali ba mbanua andrõ. Me i'ila Yesu, mangalulu ia fõna Yesu.

23I'andrõ sibai khõ Yesu, "He Ama, mofõkhõ sabõlõbõlõ nonogu alawe, u'andrõ ena'õ mõi Ndra'ugõ ba Õtufa tanga-U ia, ena'õ dõhõ ia ba auri!"

24Mõi Yesu fao ira Ya'iro. Ato sibai zolo'õ Ya'ia irege ladegeni Ia niha sato.

25Ba da'õ gõi so ndra alawe sofõkhõ talu si no felendrua fakhe wa'ara.

26No oi ahori zi so khõnia fefu i'oguna'õ ba wame'e bõli daludalunia, ba lõ hadõi si tola mamadõhõ ya'ia, itugu manõ monõnõ wõkhõnia.

27No oya irongo duria Yesu ira alawe andrõ. Andrõ ba gotalua niha sato, ihatõ'õ ia khõ Yesu moroi furi.

28Imane tõdõnia, "He ha ubabaya nukha-Nia andrõ, ba lõ tola lõ'õ dõhõ ndra'odo!"

29Ibabaya gahe mbaru Yesu, ba i'anema'õ dõhõ wõkhõ dalunia. Irasoi ba mbotonia wa lõ hadõi fõkhõnia sa'ae.

30Ba ginõtõ da'õ sibai gõi Irasoi Yesu wa so wa'abõlõ saheta moroi ba mboto-Nia. Ifakhõlõ Ia ba niha sato andrõ ba Isofu, "Haniha zombambaya ahe mbaru-Gu?"

31Lamane ira nifahaõ-Nia, "Õ'ila samõsa wa'ato niha andre si fadegedege khõ-U, Ama, ba Õsofu nasa, haniha zombambaya Ya'ugõ?"

32Ba lõ Ibato wamakhõlõ Ya'ia Yesu, wangalui niha si no mombambaya Ya'ia.

33Aboto ba dõdõ ndra alawe andrõ hadia zalua khõnia. Tobali si fao fanizinizi ba fa'ata'u mangalulu ia fõna Yesu ba wangombakha sindruhu.

34Imane Yesu khõ ndra alawe andrõ, "He ono-Gu, bõrõ me mamati ndra'ugõ khõ-Gu, dõhõ ndra'ugõ! Fuli'õ ya'ohahau dõdõu. No dõhõ ndra'ugõ sa'ae!"

35Me humedehede nasa Yesu, ba tohare zawuyu moroi ba nomo Ya'iro. Lamane khõ Ya'iro, "No mate nonou alawe, hadia nasa wa õbusi dõdõ namada, Guru?"

36Lõ Ibe'e dõdõ-Nia hadia niw̃a'õ ndra niha da'õ Yesu. Imane khõ Ya'iro, "Bõi ata'ufi, amati manõ!"

37Itohugõ wofanõ Yesu ba lõ Itehe la'o'õ Ia niha, baero Wetero, Yakobo ba Yohane andrõ talifusõ Yakobo.

38Larugi nomo Ya'iro, satua ba nomo wangandrõ andrõ. Ba I'ila ba da'õ waguaguasa niha, Irongo niha sege'ege bõrõ wa'abu dõdõ.

39Tohare Yesu ba Imane khõra, "Hana wa kaliru ami ba wa me'e ami si mane da'e? Lõ si mate nono andrõ, no si mõrõ ia!"

40La'igi'õ Yesu. Andrõ wa Ifofanõ ira baero Yesu. Iw̃a'õ ba zatua nono andrõ ena'õ mõi ira bakha ba mbate'e awõ ndra nifahaõ-Nia si datõlu.

41Igogohe danga nono alawe andrõ Yesu ba Imane khõnia ba li Heberai'o, "Talita kumi," eluahania, "He ono alawe, Uw̃a'õ khõu: faoso!"

42Ba maoso nono alawe andrõ, mowaõwaõ ia ba da'õ. (No felendrua fakhe ndrõfinia.) Fefu zangila salua andrõ ba oi ahõlihõli dõdõra!

43Itenaw̃a sibai ira Yesu ena'õ bõi la'ombakha'õ zalua andrõ gofu ha'õkhõ. Aefa da'õ Iw̃a'õ ena'õ labe'e gõ nono andrõ.


  Share Facebook  |  Share Twitter

Download Audio MP3 (Markus 5):
Mobile (Low Quality) - CD (High Quality)

 <<  Markus 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel