Alkitab Mobile SABDA
[VER] : [NIAS]     [PL]  [PB] 
 <<  Roma 1 >> 

1Ya'ami ira talifusõ fefu ba Roma, ni'omasi'õ Lowalangi, ba si no Ikaoni Lowalangi tobali banua-Nia. No Ifili ba Ifataro ndra'odo Lowalangi ba wangombakha Turia Somuso Dõdõ.

2Turia Somuso Dõdõ andrõ, no Ifabu'u Lowalangi ba mbõrõta khõ ndra sama'ele'õ khõ-Nia, si mane si no tesura bakha ba Mbuku Ni'amoni'õ.

3Turia Somuso Dõdõ andrõ sanandrõsa khõ Nono Lowalangi, So'aya ya'ita Yesu Keriso si no nga'õtõ Dawido molo'õ fa'aniha.

4Ba hiza, molo'õ Eheha Lowalangi, no Ono Lowalangi Ia safõnu kuaso. Oroma da'õ ba wemaoso-Nia moroi ba wa'amate.

5Moroi khõ-Nia utema halõw̃õ fa'asinenge andrõ khõ Lowalangi, ena'õ -- ba wamosumange Keriso -- u'ohe fefu niha dozi soi ba wamati ba ba wolo'õ.

6Ba gotalua soi andrõ fefu fao ami, ira talifusõ si so ba Roma; no tekaoni gõi ami wa'atobali banua Yesu Keriso.

7Da'õ mbõrõ wa ube'e khõmi zura. Ya Lowalangi Amada ba Yesu Keriso zame'e khõmi howuhowu ba fa'ohahau dõdõ.

8Si ofõna sibai ba khõ Yesu Keriso, u'andrõ saohagõlõ khõ Lowalangi bõrõ ami fefu; no larongo ba zi sagõrõ ulidanõ wa faduhu sibai dõdõmi khõ Keriso.

9Lõ aetu itõrõ tõdõgu ami ba wangandrõgu. Lowalangi zi tobali sasi wa sindruhu niw̃a'õgu. Moroi ba dõdõgu we'amõi enoni Lowalangi wangombakha Turia Somuso Dõdõ khõ Nono-Nia.

10U'andrõ sibai khõ Lowalangi ena'õ itehegõ khõgu we'amõi khõmi.

11Bõrõ me omasi sibai falukha ndra'o khõmi ena'õ tola ube'e khõmi mbuala Geheha Lowalangi sangabõlõ'õ ya'ami.

12Ohitõ dõdõgu ya'ia da'õ, bõrõ me faoma ita si faduhu tõdõ khõ Yesu Keriso, ba sinangea si faoma ita wangabõlõ'õ awõda.

13He ya'ami ira talifusõ! Omasido ena'õ mi'ila wa no auli omasido we'amõi khõmi, ba hiza so manõ dahataha. Omasido na mowua halõw̃õgu ba gotaluami si mane bua halõw̃õgu ba gotalua zi tenga niha Yahudi ba nahia tanõ bõ'õ.

14Mo'õmõ ndra'o ba soi fefu; he ba zi no so huku ma zui ba zi lõ huku nasa, he ba zi no atuatua, ma zui ba zi lõ'õ nasa.

15Da'õ mbõrõ wa omasi sibai ndra'o wangombakha Turia Somuso Dõdõ khõ ndra talifusõ si so ba Roma gõi.

16Faduhu sibai dõdõgu wa Turia Somuso Dõdõ andrõ no fa'abõlõ Lowalangi, sohalõw̃õ ba wangorifi fefu niha si faduhu tõdõ; si fõfõna niha Yahudi, ba soi bõ'õ gõi.

17Ba Duria Somuso Dõdõ andrõ I'oroma'õ Lowalangi hewisa lala ena'õ tobali sõkhi gamakhaita niha khõ Lowalangi; lala ya'ia da'õ fa'afaduhu dõdõ khõ Lowalangi, i'otarai mbõrõta irugi gamozua. Hulõ si mane nisura ba Mbuku Ni'amoni'õ, "Niha si faduhu tõdõ khõ Lowalangi irege te'a'azõkhi mangawuli gamakhaitania khõ Lowalangi, ba sauri!"

18I'oroma'õ wõnu-Nia moroi ba zorugo Lowalangi ba ngawalõ horõ fefu awõ ba wa'alõsõkhi niha, me bõrõ wa'alõsõkhi niha wa lõ aboto ba dõdõra Lowalangi.

19Hadia zi tola aboto ba dõdõ niha sanandrõsa khõ Lowalangi, no oroma ba niha, bõrõ me ifa'ele'õ da'õ Lowalangi ba niha.

20I'otarai wombõi Lowalangi ulidanõ, no aboto ba dõdõ niha gamuata Lowalangi si lõ oroma ba ngawalõ nifazõkhi-Nia. Bõrõ da'õ tebai i'osatulõ ia niha.

21Aboto ba dõdõ niha Lowalangi, ba hiza i lõ lafosumange Ia si no Lowalangi, ba lõ gõi la'andrõ saohagõlõ khõ-Nia. La'angeragõ niha zi lõ boto; no tobali ogõmigõmi dõdõra.

22Law̃a'õ tõdõra satuatua ira, ba sindruhunia no si bodo.

23Tenga Lowalangi si lõ aetu nifosumangera, no la'ali faoma famaedo si no mate, ya'ia wamaedo niha, famaedo wofo, urifõ si õfa ahe, awõ guõkuõ sanana.

24Bõrõ da'õ Itehegõ khõra Lowalangi ifatõrõ ira omasiõ dõdõra andrõ wamalua si lõ atulõ, irege lalau zira'ira'iõ ba nawõra niha.

25La'ali Lowalangi sindruhu faoma Lowalangi fayafaya. Tenga samazõkhi andrõ nifosumangera ba si mõi ira enoni, no nifazõkhi andrõ. Ba hiza sindruhunia samazõkhi andrõ zi lõ tola lõ nifosumangera irugi zi lõ aetu! Yaduhu.

26Bõrõ me lalau niha zi manõ, Itehegõ khõra Lowalangi la'o'õ wangisõra andrõ si lõ boto. Lõ adõni dõdõ ndra alawe ndra matua, si mane si to'õlõ ba niha, hiza adõni dõdõ ndra alawe khõ nawõnia ira alawe.

27Si manõ gõi ndra matua; no lõ adõni dõdõra wa'orudu ba ndra alawe si mane si to'õlõnia, la'isõ nawõra ira matua. Lalau gamuata saila ita ba nawõra ira matua, ba bõrõ da'õ latema zulõ nilaura si lõ sõkhi andrõ.

28Bõrõ me lõ omasi aboto ba dõdõ niha Lowalangi, andrõ wa Itehegõ tekiko gera'erara, irege lalau gamuata si tebai lalau ena'õ.

29Afõnu si lõ sõkhi gera'erara, si lõ atulõ; afõnu fa'olu'alu'a, fa'afaito ba fatiusa; afõnu fa'edõna ba wamunu niha, ba wasõndrata, ba walimosa ba fa'afõkhõ dõdõ. Omasi ira lafatoutou nawõra,

30La'obousi dõi nawõra; fayaw̃a ira ba lõ la'ila wetahõgõ, lõ omasi ira Lowalangi ba sebua lawukho ira. Onekhe ira wangalui lala si bohou ba wamalua si lõ sõkhi. Lalaw̃a zatuara;

31lõ ba dõdõra niha bõ'õ; salio farõi ira ba si lõ fa'ahakhõ dõdõ.

32Aboto ba dõdõra, wa molo'õ huku Lowalangi, niha solau si manõ nihuku famunu. Ba hew̃a'ae si manõ lalau sa'atõ; ba fao na'i dõdõra na lalau niha bõ'õ zi manõ.


  Share Facebook  |  Share Twitter

Download Audio MP3 (Roma 1):
Mobile (Low Quality) - CD (High Quality)

 <<  Roma 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran