Dual Panel1Manofu ndra'o umane: Hadia no Itibo'õ mbanua-Nia Lowalangi? Tatu lõ'õ! Ya'odo samõsa no niha Gizera'eli nga'õtõ Gaberahamo, moroi ba nga'õtõ Mbeniami.
2Lõ'õ! Lõ nitibo'õ Lowalangi mbanua-Nia si no Ifili i'otarai mbõrõta. No aboto ba dõdõmi nisura bakha ba Mbuku Ni'amoni'õ sanandrõsa khõ Gelia, me i'ombakha'õ khõ Lowalangi zanandrõsa ba niha Gizera'eli andrõ. Imane Elia,
3"He So'aya, no labunu ndra sama'ele'õ khõ-U niha ba no lafakiko nahia wame'e sumange khõ-U. Ha tõ ya'o, ba omasi ira labunu ndra'odo gõi."
4Hadia wanema li nibe'e Lowalangi khõ Gelia? Itema li Lowalangi Imane, "No Usaigõ khõ-Gu fitu ribu niha. Lõ irai lafosumange Mba'ali."
5Si manõ gõi iada'e: So mato ma'ifu niha si no Ifili Lowalangi bõrõ me ahakhõ dõdõ-Nia ira.
6Ifili ira bõrõ wa'ebua dõdõ-Nia ba tenga bõrõ nilaura. Bõrõ na Ifili Lowalangi modanedane ba nilau niha, ba fa'ebua dõdõ Lowalangi andrõ tenga sa'ae fa'ebua dõdõ sindruhundruhu.
7Tobali, hewisa? Lõ lasõndra hadia ni'aluira banua Gizera'eli. Lõ ato zanõndra, ha mato ma'ifu niha si no Ifili Lowalangi. Oi abe'e hõgõ danõ bõ'õ andrõ ba wogaoni Lowalangi ya'ira.
8Bõrõ me no tesura bakha ba Mbuku Ni'amoni'õ, "Ibali'õ si lõ era'era ba si lõ tõdõ ira Lowalangi; ba irugi da'e lõ la'ila hõrõra ba lõ larongo tõgi dalingara."
9Imane gõi Dawido, "Akha tobali tandraw̃a khõra wemanga ba gowuloa andrõ, ba lõsulõsu nahia wa'ate'ala, ba fa'atekiko!
10Akha ogõmigõmi wamaigira ena'õ lõ tola la'ila; ba akha lõ mamalõ aõndrõ hulura."
11Manofu zui ndra'o. Me alau niha Yahudi, hadia, ena'õ tekiko ira wa alua da'õ? Ma'ifu tenga! Hiza bõrõ me si so horõ ira, wa soi bõ'õ ni'orifi, irege afõkhõ dõdõ niha Yahudi ba soi bõ'õ andrõ.
12Bõrõ me mosala niha Yahudi ba lõ la'o'õ zomasi Lowalangi, andrõ wa Ifahowu'õ soi bõ'õ Lowalangi. Mendrua manõ sa'ae na ifuli sõkhi mangawuli gamakhaita niha Yahudi khõ Lowalangi; tatu abõlõ ebua nasa howuhowu nibe'e Lowalangi khõra.
13Ba hiza iada'e da fahuhuo ndra'o ba dalifusõ si tenga niha Yahudi! Ba zi lalõ, no u'odõdõgõ sibai halõw̃õgu, we'amõi sinenge ba soi bõ'õ si tenga niha Yahudi.
14Utõtõna wa so wa'afõkhõ dõdõ ba soigu samõsa, ena'õ bõrõ da'õ tola u'orifi ira õsa.
15Bõrõ me no Itimba ira Lowalangi, andrõ wa ifuli sõkhi mangawuli gamakhaita niha gulidanõ khõ Lowalangi! Mendrua manõ sa'ae na Itema ira Lowalangi! Tatu hulõ niha si mate si fuli auri zi manõ!
16Na no mube'e sambua fanaba roti khõ Lowalangi, tatu fefu roti andrõ no mube'e khõ Lowalangi gõi. Ba na okhõta Lowalangi w̃a'a geu, tatu dahadaha geu andrõ no okhõta-Nia gõi.
17Ma'ifu moroi ba ndraha zaitu -- ya'ia niha Yahudi -- no mutaba. Ba ba mbalõ zi no mutaba andrõ mufalemba ndraha zaitu du'u, ya'ia ndra talifusõ soi bõ'õ si tenga niha Yahudi. Mufalemba ami ba da'õ ena'õ misõndra zi sõkhi moroi ba hogu zaitu sindruhu andrõ, ya'ia ndra niha Yahudi.
18Bõi mifayaw̃a ba ndraha andrõ! Na fayaw̃a ami, mitõrõ tõdõmi wa tenga ya'ami zanundreheni w̃a'a, no w̃a'a zanundreheni ya'ami.
19Ba õmane dania, "Ya'ia, ba hiza tetaba ndrahandraha andrõ ena'õ tola mufalemba ndra'o ba dõla geu!"
20Sindruhu da'õ. Latibo'õ ira bõrõ me lõ faduhu dõdõra, ba hiza tetema ami bõrõ me faduhu dõdõmi. Tobali bõi fayaw̃a ami bõrõ da'õ; si sõkhinia na ata'u na'i ami.
21Bõrõ na lõ alimagõ khõ Lowalangi wanibo'õ niha Yahudi hulõ ndraha sindruhu andrõ, ba bõi miw̃a'õ dõdõmi alimagõ dania khõ-Nia wanibo'õ ya'ami!
22Tobali, ba da'e ta'ila ha wa'asõkhi dõdõ Lowalangi ba ha wa'abe'e-Nia gõi. Abe'e ia ba niha si so horõ, ba hiza sõkhi dõdõ-Nia khõmi na lõ mamalõ auri ami moroi ba wa'asõkhi dõdõ Lowalangi. Na lõ'õ, ba nitibo'õ gõi dania ami.
23Ba sanandrõsa ba niha Yahudi, na labato wa lõ faduhu dõdõ andrõ, ba tetema ira mangawuli; bõrõ me so wa'abõlõ khõ Lowalangi wanema ya'ira.
24Ya'ami si tenga soi niha Yahudi hulõ ndraha zaitu du'u. Na tola mufalemba ami ba dõla zaitu sindruhu andrõ si tenga ngenolimi, mendrua manõ ndra niha Yahudi si no amaedola ndraha sindruhu andrõ. Abõlõ aoha khõ Lowalangi wamuli ya'ira ba dõla zaitu andrõ khõra.
25He ya'ami ira talifusõ! Utõtõna wa bõi hulõ mi'ila fefu hadia ia. Bõrõ me so zomasi Lowalangi, si lõ aboto ba dõdõ niha. Ba omasi ndra'o na mi'ila; ya'ia: Abe'e hõgõ õsa niha Yahudi, ba hiza tenga si'ogõtõ'õ gamuatara andrõ, irugi mo'ahonoa wa'ato niha si tenga niha Yahudi sangondrasi Lowalangi.
26Aefa da'õ te'orifi dania fefu niha Yahudi. Bõrõ me no tesura bakha ba Mbuku Ni'amoni'õ, "Tohare dania moroi ba Ziona Razo Sangorifi; Iheta fefu wa'alõsõkhi moroi ba nga'õtõ Yakobo.
27Ulau dania fawu'u li khõra na inõtõ U'efa'õ horõra."
28Bõrõ me lõ omasi latema Duria Somuso Dõdõ soroi Lowalangi, tobali udu Lowalangi ira; ba tobali haremi da'õ ya'ami si tenga niha Yahudi. Ba hiza bõrõ wamili Lowalangi, wa lõ mamalõ I'omasi'õ niha Yahudi Lowalangi ndra tuara.
29Bõrõ na Ifili niha Lowalangi ba Ifahowu'õ niha andrõ, lõ irai mangandrauli dõdõ Lowalangi ba zi no Ifalua.
30Si lõ molo'õ khõ Lowalangi ami mbõrõta. Ba iada'e no Iw̃a'õ Lowalangi wa aefa ami moroi ba zala, bõrõ me lõ molo'õ niha Yahudi.
31Si manõ gõi ba niha Yahudi andrõ, lõ molo'õ ira khõ Lowalangi iada'e, ena'õ te'efa'õ ami moroi ba zala. Ba hiza te'efa'õ moroi ba zala ira dania.
32No Itehegõ Lowalangi ba niha fefu ifatõrõ ira fa lõ molo'õ, ena'õ tola I'oroma'õ wa'ahakhõ dõdõ-Nia khõra fefu.
33Fondrege wa'akayo Lowalangi! No fondrege wa'atuatua awõ wangi'ila-Nia! Haniha zi tola mamareso angetula-Nia? Haniha zi tola aboto ba dõdõ lala halõw̃õ-Nia?
34Me no musura ba Mbuku Ni'amoni'õ, "Haniha zangila era'era dõdõ Zo'aya? Haniha zi tola mame'e menemene khõ-Nia?
35Haniha zi no irai mame'e hadia ia khõ Zo'aya irege tola i'andrõ zulõ?"
36Lowalangi zombõi fefu hadia ia. Moroi khõ-Nia hadia ia fefu ba no khõ-Nia fefu hadia ia. Nisuno Lowalangi irugi zi lõ aetu! Ya'aduhu.