Dual Panel1Iada'e lõ'õ sa'ae fanguhuku khõra ya'ira sauri ba khõ Yesu Keriso.
2Huku Geheha Lowalangi zangorifi ya'ita ba khõ Yesu Keriso, da'õ zangefa'õ ya'o moroi ba huku samobõrõ horõ ba fa'amate.
3Hadia zi tebai ilau huku agama, bõrõ me niha sambõ fa'abõlõ ita, no Ilau Lowalangi. I'alani wa'abõlõ horõ Lowalangi bakha ba wa'auri niha, andrõ wa Ifatenge Nono-Nia samõsa, si tohare si mane niha si so horõ, ba wangefa'õ horõ.
4Ilau da'õ Lowalangi ena'õ somasi Ia si so bakha ba huku agama Yahudi andrõ, tola alua ba wa'aurida ya'ita sauri molo'õ Eheha Lowalangi, ba tenga molo'õ amuata niha.
5Sauri solo'õ amuata wa'aniha zi lõ aetu wo'era'era somasi dõdõ wa'aniha. Ba sauri solo'õ Eheha Lowalangi zi lõ aetu wo'era'era somasi Geheha Lowalangi.
6Na ifatõrõ ndra'ugõ amuata wa'aniha, lualuania fa'amate. Ba na ifatõrõ gera'erau Eheha Lowalangi, lualuania fa'auri ba fa'ohahau dõdõ khõ Lowalangi.
7Fangerangera niha nifatõrõ gamuata wa'aniha, ba si fa'udu niha andrõ khõ Lowalangi; bõrõ me lõ i'o'õ goroisa Lowalangi; ba tebai i'o'õ goroisa Lowalangi andrõ.
8Niha sauri molo'õ amuata wa'aniha, tebai I'omusoi'õ dõdõ Lowalangi.
9Ba ya'ami, tenga sauri molo'õ amuata wa'aniha. Auri ami molo'õ Eheha Lowalangi -- na duhuduhu mohalõw̃õ Geheha Lowalangi andrõ ba wa'aurimi. Niha si lõ hadõi Eheha Keriso, no tenga tana khõ Keriso.
10Ba na auri Keriso khõmi, hew̃a'ae mate mbotomi bõrõ horõ, Ibe'e wa'auri khõmi Eheha Lowalangi, bõrõ me sõkhi gamakhaitami khõ Lowalangi.
11Na Eheha Lowalangi andrõ, sangorifi Keriso moroi ba wa'amate, auri bakha ba dõdõmi, ba Ya'ia, sangorifi Keriso moroi ba wa'amate, zangorifi gõi botomi si mate andrõ. Ilau da'õ faoma Eheha-Nia sauri ba khõmi.
12Da'õ mbõrõ ya'ami ira talifusõ, wa so noro dõdõda; ba tenga noro dõdõ ba gamuata wa'aniha; bõi solo'õ somasi ia wa'aurida.
13Bõrõ na auri ami molo'õ amuata wa'aniha, ba mate ami dania; ba hiza na ba kuaso Lowalangi, lõ mamalõ mibunu gamuatami folau horõ andrõ, ba auri ami dania.
14Niha nidõnia'õ Geheha Lowalangi no iraono Lowalangi.
15Bõrõ me Eheha nibe'e Lowalangi khõmi, tenga sombali'õ sawuyu ami, irege ba wa'ata'u auri ami. Eheha Lowalangi andrõ zombali'õ iraono Lowalangi ami. Ba bõrõ kuaso Geheha Lowalangi andrõ wa tola takaoni khõ Lowalangi tamane, "He Ama, he Amagu!"
16Eheha Lowalangi si fao ehehada zangoroma'õ wa iraono Lowalangi ita.
17Ba na iraono-Nia ita, ba sanema ondrõita-Nia ita, sanema howuhowu nihenagõ Lowalangi ba ndraono-Nia; si fao ita ba khõ Keriso andrõ wanema hadia zi no Ihenagõ Lowalangi khõ-Nia; na fao ita ba wamakao Keriso, ba tefolakhõmi gõi ita dania awõ-Nia.
18Fefu wamakao nitaõgõda iada'e, molo'õ fangerangeragu, lõ famaedonia ba lakhõmi ni'oroma'õ khõda dania.
19Ibalobaloi si fao fanõtõna banua ma'asambua hawa'ara Ifaduhu'õ ndraono-Nia Lowalangi.
20No tetehegõ wa salio tekiko nifazõkhi Lowalangi, tenga bõrõ wa'edõnania samõsa, no bõrõ Lowalangi zanehegõ si manõ. Ba hew̃a'ae si manõ so gõi wanõtõna andre:
21wa ba zi sambua inõtõ dania te'efa'õ nifazõkhi Lowalangi andrõ moroi ba zamakiko ya'ia ba si fao gõi fefu dania ba wangefa'õ ba famolakhõmi ndraono Lowalangi.
22Aboto ba dõdõda wa irugi da'e mangarõngarõ fefu nifazõkhi Lowalangi bõrõ wamakao, hulõ ndra alawe sanõrõ famakao na inõtõ tumbu ndraono.
23Ba tenga ha nifazõkhi Lowalangi zangarõngarõ; mangarõngarõ gõi ita bakha ba dõdõda. No tatema Geheha Lowalangi si no amaedola mbuala Lowalangi si fõfõna, ba hiza tabaloi nasa wangefa'õ Lowalangi ya'ita awõ wombali'õ-Nia ya'ita iraono-Nia.
24Bõrõ wanõtõna, wa te'orifi ita. Ba na no oroma khõda hadia nitõtõnada, tenga sa'ae fanõtõna da'õ. Bõrõ, haniha nasa zanõtõna ba zi no i'ila?
25Ba na tatõtõna zi lõ nasa ni'ilada, ba tabaloi da'õ si fao fa'ebolo dõdõ.
26Si manõ gõi, tohare Geheha Lowalangi wanolo ya'ita na ambõ fa'abõlõda. Bõrõ me lõ ta'ila hewisa zinangea na mangandrõ ita; ba Eheha andrõ samõsa zi mõi fõna Lowalangi ba wangandrõ khõda si fao fanõtõna si'oi dõdõ irege tebai alua baeha.
27Lowalangi andrõ sangila tõdõ niha, zangila somasi Geheha andrõ; bõrõ me Eheha andrõ zangandrõ khõ Lowalangi soguna ba mbanua Lowalangi, si faudu ba zomasi Lowalangi.
28Aboto ba dõdõda wa Lowalangi zamõfõ'õ fefu ngawalõ hadia ia, irege alua zi sõkhi ba niha sangomasi'õ Ya'ia ba nikaoni-Nia molo'õ si no I'era'era.
29Ya'ira si no Ifili Lowalangi, no Ihonogõi moroi ba mbõrõta ena'õ tobali hulõ si mane Ono-Nia, ya'ia Yesu Keriso. Ba zi manõ, tobali si fõfõna Nono-Nia andrõ ba gotalua dalifusõ sato.
30Dozi si no Ihonogõi ba mbõrõta, da'õ gõi nikaoni-Nia. Dozi si no Ikaoni, da'õ ni'atulõ'õ-Nia. Ba dozi si no I'atulõ'õ, da'õ gõi nifolakhõmi-Nia.
31Hadia zi tola muw̃a'õ iada'e ba da'õ fefu? Na fa'awõ khõda Lowalangi, haniha zi tola molaw̃a ya'ita?
32Ono-Nia samõsa lõ alimagõ khõ-Nia Ilulu soguna khõda; hewisa wa lõ Ibe'e khõda ngawalõ danõ bõ'õnia?
33Haniha zi tola manandraw̃aisi ya'ita si no Ifili Lowalangi, na Lowalangi samõsa zanguma'õ wa si lõ sala ita?
34Hadia, so niha sanguma'õ sala ita? Keriso Yesu dania zobelegõ ya'ita! Ya'ia zi no mate ba si no mu'orifi mangawuli moroi ba wa'amate, si so khõ Lowalangi ba nahia si so fa'abõlõ.
35Haniha zi tola momba'agõ Keriso ba wangomasi'õ ya'ita? Hadia, tola iba'agõ Ia famakao ma fa'afõkhõ, ma folohi, ma fa'olofo, ma fa'anumana, ma ameta'uõ, ma zui fa'amate?
36No tesura ba Mbuku Ni'amoni'õ, "Sandrohu si ma'õkhõ auri ndra'aga bakha ba gameta'uõ solohe ba wa'amate bõrõ Ndra'ugõ. Hulõ mbiribiri sedõna mutaba ndra'aga."
37Tenga! Bakha ba da'õ na'i fefu tasõndra wemõna so'ahonoa, bõrõ Ia sangomasi'õ ya'ita!
38Bõrõ faduhu sibai dõdõgu wa ba zi sagõrõ ulidanõ, he fa'amate ba he fa'auri, he mala'ika ba he samatõrõ, he ameta'uõ iada'e ba ameta'uõ dania ba he fa'abõlõ tanõ bõ'õ;
39he ngawalõ zi so ba mbanua, ba he ba gulidanõ ma zui hadia ia danõ bõ'õ, tebai iba'agõ Lowalangi ba wangomasi'õ ya'ita, si mane si no I'oroma'õ khõ Yesu Keriso So'aya ya'ita.