Dual Panel1Fasugi ba dõdõ ndra niha solo'õ khõu, ena'õ lõ molaw̃a ira khõ zondrõnia'õ ba samatõrõ soi, awõ wolo'õ li ba fa'edõna ba wamalua ngawalõ zi sõkhi.
2&Wa'õ khõra ena'õ bõi la'obo'obousi niha, ena'õ lõ fa'udu'udu, hiza i so wariawõsa. Ena'õ lõ mamalõ lahaogõhaogõ ba niha fefu.
3No si bodo gõi ita fõna, selungu ba si lõ molo'õ. No i'osawuyu ita somasimasi dõdõ ba fangisõ andrõ soya ngawalõ. Auri ita ba gohitõ dõdõ si lõ sõkhi ba fa'afõkhõ dõdõ, awõ wa faoma fatiu dõdõda khõ nawõda.
4Ba Lowalangi, Sangorifi ya'ita no Ifa'ele'õ wa'omasi ba fa'asõkhi dõdõ-Nia khõda.
5No I'orifi ita, tenga me no talau zi sõkhi, ha me Ya'ia samõsa zangomasi'õ ya'ita. Ya'ia zangorifi ya'ita ba ba khõ Geheha-Nia. Eheha andrõ, zamatumbu'õ ya'ita mangawuli ba same'e khõda fa'auri si bohou me isasai ita.
6Lowalangi zanuwagõ Eheha-Nia khõda nifa'ema Yesu Keriso, Razo Sangorifi ya'ita,
7ena'õ bõrõ wa'ahakhõ dõdõ Yesu andrõ, tobali sõkhi mangawuli gamakhaitada khõ Lowalangi, ba tasõndra wa'auri si lõ aetu si no tadõnadõna.
8Hadia zi no uw̃a'õ andre ba no sindruhu. Omasi ndra'o na õhõndrõgõ ngawalõ da'e, ena'õ samati khõ Lowalangi la'oigõ dõdõra ba wamalua halõw̃õ si sõkhi ba soguna ba niha fefu.
9Arõu'õ huohuo amadõniw̃a si lõ moguna ba amatunõw̃a sanandrõsa ba mbõrõta nga'õtõ. Timbagõ wasosota ba fa'udusa sanandrõsa ba hukuhuku agama. Fefu da'õ lõ hadõi gunania ba lõ hadõi hare khõnia.
10Niha samobõrõ fa'aboto bakha ba mbanua Niha Keriso, õtegu ia sakali dua kali; aefa da'õ ba bõi sa'ae fakhõyõ khõnia.
11Ya'aboto ba dõdõu wa niha si manõ da'õ no ilau zahole, ba horõnia zangoroma'õ wa no fasala ia.
12Ba wa'alio na no aefa ufatenge Garitema ba Tikhiko khõu, alui lala ba wa'alio sibai we'amõi khõgu ba Nikofoli, bõrõ no so ba dõdõgu torõi ba da'õ sagõtõ mbaw̃a deu.
13Oigõ dõdõu sindruhundruhu ba wanolo Zena, sangila huku andrõ, ba Afolo; ena'õ tola mofanõ ira, ba lõ ambõ hadia ia.
14Dozi niha solo'õ khõda akha lafahaõ ira ba wamalua ngawalõ zi sõkhi, ena'õ tola lafõnui zoguna sibai; bõi si lõ guna wa'aurira.
15Fefu ndra talifusõ si so ba da'e, fao awõgu ba wangowai ya'ugõ. Fa'ema wangowaima khõ ndra awõ'awõda samati khõ Keriso. Ya So'aya zamahowu'õ ya'ami fefu.