Dual Panel1Ba oroma ba mbanua si yaw̃a dandra sahõlihõli dõdõ ba sebua. Samõsa ndra alawe sangonukha luo, no muzizio yaw̃a ba mbaw̃a. Ba hõgõnia so sambua mbala hõgõ ya'ia dõfi si felendrua andrõ.
2Ba no manabina ndra alawe andrõ, ba me no irugi inõtõnia wadono, ba mangarõngarõ ia wa'afõkhõ.
3Ba oroma gõi ba mbanua si yaw̃a sambua dandra bõ'õ sahõlihõli dõdõ. So sageu naga soyo sebua sibai, fitu hõgõ ba fulu rozi dandru. Ba dozi hõgõ ba oi motakula.
4Ba faoma i'onia ibõzini zi sambua ni'otõlu ndrõfi ba mbanua si yaw̃a, itibo'õ tou ba gulidanõ. Ba no sumindro naga andrõ fõna ndra alawe sadono andrõ, ohitõ dõdõnia ba wanõlõ ono andrõ, na i'anemai'õ tumbu.
5Ba madono ndra alawe andrõ ono matua, samatõrõ fefu soi faoma si'o si'õli. Ba tefadõni nono moroi ba ndra alawe andrõ, ba te'ohe khõ Lowalangi fõna dadaoma-Nia.
6Ba moloi ndra alawe andrõ isaw̃a danõ si mate, ba naha si no Ihõnagõ Lowalangi khõnia. Ba naha da'õ terorogõ dania ia saribu a dua ngaotu a õnõ ngafulu ngaluo wa'ara.
7Ba alua wanuwõ ba zorugo. Mikhaeli fao awõ mala'ikania fasuwõ ba wolaw̃a naga andrõ. Ba naga andrõ gõi latolo ia ira mala'ikania, ba wolaw̃a Mikhaeli.
8Ba te'alani naga andrõ. Ya'ia awõ mala'ikania lõ tetehegõ sa'ae torõi ba zorugo.
9Ba tetibo'õ baero naga sebua andrõ! Ya'ia gulõ satua andrõ sotõi Afõkha ba Satana, solimo niha ba gulidanõ ma'asagõrõ. Ba tetibo'õ ia ba gulidanõ fao awõ mala'ikania fefu.
10Ba urongo li sebua ba zorugo sanguma'õ, "Iada'e ginõtõnia I'orifi mbanua-Nia Lowalangi! Iada'e no Iforoma'õ wa'abõlõ-Nia Lowalangi si mane Razo! Iada'e Razo Sangorifi, si no tefabu'u andrõ no Iforoma'õ wa'abõlõ-Nia! Bõrõ me so'angadugõ ira talifusõda andrõ fõna Lowalangi bongi ma'õkhõ, no tetibo'õ baero moroi ba zorugo.
11Ba no la'alani ia ira talifusõda ba ndro Nono Mbiribiri andrõ, ba taroma li sindruhu si otarai Lowalangi andrõ ni'ombakha'õra. Ba aoha gõlõra wanehegõ nosora irugi wa'amate.
12Bõrõ da'õ, ya owuawua dõdõ zorugo awõ zi so khõnia fefu! Ba si tekiko gulidanõ awõ nasi, bõrõ me no mõi tou Gafõkha khõmi ba wa'ebua wõnunia, me no i'ila wa ha tõ ma'ifu sa'ae ginõtõnia."
13Ba me i'ila naga andrõ wa no tetibo'õ ia ba gulidanõ, ibõrõgõ wolohi ira alawe si no mangadonogõ ono matua andrõ.
14Ba tebe'e ba ndra alawe andrõ dombua gafi moyo sebua, ena'õ muhombo ia ba nahania ba danõ si mate, ba da'õ terorogõ dania ia tõlu fakhe a matonga, aefa ia moroi ba wolohi naga andrõ.
15Ba iduwagõ naga andrõ moroi ba mbawania nidanõ sabõlõbõlõ sibai ba gamaudu ndra alawe andrõ, ba wangahanigõ ya'ia.
16Ba itolo ndra alawe andrõ tanõ; ibokai mbawania ba wanõlõ idanõ si mõi baero moroi ba mbawa naga andrõ.
17Ba mofõnu sibai naga ba ndra alawe andrõ, irege mofanõ ia ba wanuwõ nga'õtõ bõ'õ ndra alawe andrõ, ya'ia fefu niha solo'õ amakhoita Lowalangi, ba si lõ farõi ba duria sindruhu andrõ soroi Lowalangi, nifaduhu'õ Yesu.