Dual Panel1Aefa da'õ, ba u'ila daõfa mala'ika si zizio ba zi õfa fatalinga danõ. Ya'ira zanaha angi andrõ si õfa ba gulidanõ, ena'õ bõi so nangi sanõrõ tanõ, ba ma ba nasi ba ma ba dõla geu fefu.
2Aefa da'õ ba u'ila samõsa mala'ika bõ'õ moroi ba gatumbukha luo. No i'ohe dandro soroi Lowalangi sauri. Ba mu'ao mala'ika andrõ ebua linia ba wogaoni mala'ika si daõfa andrõ si no manõndra fa'abõlõ moroi khõ Lowalangi ba wamakiko tanõ ba asi.
3Imane mala'ika andrõ, "Bõi ua mifakiko danõ, ba ma asi, ba he gõi eu fefu na lõ nasa mufotandro gangango genoni Lowalangi andrõ."
4Ba la'ombakha'õ khõgu wa fa'ato nifotandro angangora andrõ soroi Lowalangi, ba otu a õfa wulu a õfa ngahõnõ niha. Tehalõ niha andrõ moroi ba zi felendrua mado soi Gizera'eli;
5ero sambua mado ba felendrua ngahõnõ. Ya'ira moroi ba mado Yehuda, Rubeno, Gado,
6Aseri, Nafetali, Manase,
7Simeoni, Lewi, Isasari,
8Sebuloni, Yosefo, ba Beniami.
9Ba aefa da'õ ba u'ila nasa, hiza oroma niha sato sibai si tebai mu'erai -- samõsa lõ hadõi gõi si tola mangerai fa'atora! Ya'ira no niha moroi ba ngawalõ soi, mado, iwa, ba ngawalõ li. No la'onukha mbaru sanau safusi ba no la'ohe tanga mbulu nohi, ba niha sato andrõ no sumindro fõna dadaoma andrõ ba fõna Nono Mbiribiri andrõ.
10Ba mu'ao ira, ebua lira, lamane, "Fangorifida moroi khõ Lowalangi, si dadao ba dadaoma andrõ, ba moroi khõ Nono Mbiribiri andrõ!"
11Ba fefu mala'ika no sumindro ba no lafasui dadaoma andrõ, ba salaw̃a sondrõnia'õ andrõ awõ zaliw̃aliw̃a ba danõ andrõ si õfa nga'eu. Ba latuhi danõ lafalõgu tou ira mala'ika andrõ ba wangalulu khõ Lowalangi.
12Mu'ao ira, "Yaduhu! Lowalangida ba no Lowalangi nisuno, nifolakhõmi ba satuatua. Ya'ia Lowalangi sinangea nifõnui fangandrõ saohagõlõ ba famosumange. Ya'ia Lowalangi samatõrõ ba sabõlõ sagõtõ fa'ara! Yaduhu."
13Ba samõsa moroi ba zondrõnia'õ andrõ zanofu khõgu, "Niha sobaru sanau safusi andre, haniha ira ba heza la'otarai?"
14Ba utema li, "Lõ u'ila Tuha. Tuha samõsa zangila." Ba Iw̃a'õ khõgu, "Da'e niha si no te'orifi sanõrõ famakao sabõlõbõlõ. Ya'ira zi no manasai barura ba sangafusi'õ ba ndro Nono Mbiribiri andrõ.
15Da'õ mbõrõ wa sumindro ira fõna dadaoma Lowalangi, ba mangandrõ khõ-Nia bongi ma'õkhõ ba nomo Lowalangi ni'amoni'õ. Ba Ya'ia si dadao yaw̃a ba dadaoma andrõ so Ia dania khõra ba wolumõ'õ ya'ira.
16Lõ sa'ae dania olofo ba lõ owõkhi dõdõra; sino ba fa'aukhu hadia ia lõ sa'ae dania ikhozi ira,
17bõrõ me Ono Mbiribiri si dadao ba gotalua dadaoma andrõ zokubaloi ya'ia. Ifasao dania ira ba gumbu nidanõ fangorifi. Ba Lowalangi dania zolosi fefu taw̃a hõrõ ba hõrõra."