Dual Panel1Heza i'otarai mbõrõta wa'udusa ba faguaguasa ba khõmi? Hadia tenga moroi ba wangisõ nõsi niha andrõ khõmi si lõ aetu fasõndra bakha ba wa'aurimi ba wanõndra fa'ohahau dõdõ ba gulidanõ?
2Omasi ami ba lõ misõndra, andrõ mange'e ami! Muhi'a dõdõmi ba lõ mikhamõ ni'aluimi, andrõ faguagua ba fasõndra ami. Ba lõ misõndra hadia ia, me lõ mangandrõ ami khõ Lowalangi.
3Ba he na'i na no mi'andrõ, ba lõ sa'atõ misõndra, me lõ sõkhi gohitõ wangandrõmi andrõ; hadia ni'andrõmi ha ena'õ ohahau dõdõmi samõsa.
4Niha si farõi ami! Hadia mi'ila wa si fahuwu ba gulidanõ ba no si fa'udu khõ Lowalangi? Dozi haniha zomasi tobali awõ gulidanõ andre, ba tobali ia udu Lowalangi.
5Bõi miw̃a'õ tõdõmi si lõ danedane na imane Buku Ni'amoni'õ, "Bakha ba wa'aurida, no Ibe'e Lowalangi geheha sabõlõ fa'edõna."
6Hew̃a'ae si manõ, fa'ebua dõdõ Lowalangi andrõ nibe'e khõda, no tohude wa'abõlõnia moroi ba wa'edõna gehehada andrõ. Andrõ wa tesura zui ba Mbuku Ni'amoni'õ, "Itimba zi fayaw̃a Lowalangi, ba I'ebua'õ dõdõ-Nia ba zangidengide'õ ya'ia."
7Bõrõ da'õ, mi'angalulu khõ Lowalangi ba milaw̃a Gafõkha, ba moloi dania Gafõkha andrõ moroi khõmi.
8Mi'ondrasi Lowalangi ba I'ondrasi ami. Misasai dangami, ya'ami si so horõ! Ba mi'ohauhau'õ dõdõmi, ya'ami si dua tõdõ!
9Ya moroi ba dõdõmi, waniasa, fe'e ba fange'esi; ya tobali fe'e wa'igimi ba fa'omuso dõdõmi ya tobali fa'abu dõdõ.
10Mi'ide'ide'õ ami fõna Zo'aya, ba I'alaw̃a'õ ami dania.
11Ya'ami ira talifusõ, bõi faoma mibali'õ si lõ sõkhi ba ma mitahigõ nawõmi si fagõlõgõlõ Niha Keriso. Sombali'õ si lõ sõkhi ma sanahigõ talifusõnia si faoma Niha Keriso, ibali'õ si lõ sõkhi ba itahigõ goroisa Lowalangi. Ba na mitahigõ goroisa Lowalangi, ba no tenga solo'õ oroisa andrõ ami, no sanguhuku ami.
12Ha samõsa zi tola mame'e oroisa ba Sanguhuku niha, ya'ia Lowalangi sangila mangorifi ba sangila mamakiko. Bõrõ da'õ, haniha ami wa omasi ami mitahigõ nawõmi?
13Ya'ami ira talifusõ sanguma'õ, "Ma'õkhõ ba mahemolu, mõiga ba mbanua misa, ba torõiga dõfi wa'ara ba da'õ, maniaga ba mangalui hare", -- mifondrondrongo menemenegu andre.
14Hadia zalua ba wa'aurimi mahemolu, lõ mi'ila! Hulõ zimbo ami, si lõ arara oroma, ba taya sa'ae.
15Si sõkhinia mimane wanguma'õ: "Na Itehe Lowalangi, ba tola auri ndra'aga, ba malau da'a, ba ma da'õ."
16Hiza iada'e, fayaw̃a ba molau faya ami. Fefu wolau faya si manõ ba fasala.
17Bõrõ da'õ, na so niha sangila hadia zi sõkhi si lõ tola lõ ifalua, ba lõ sa ifalua, no ifalua horõ niha andrõ.