Dual Panel1Makabui na, Yesus no ana mana tunga nala losa Dano Galilea selik, fo nai nusa Garasa.
2Yesus bei kona neme ofak lain mai tutika, touk esa kalua neme lea-luak manai late sala dalek mai.
3Hataholi ndia, dula dale mangalau ka koasa nan, de ana leo ka'da nai late sala. Ala ta hapu pa'a lala fan; leomae ala pa'a lini kana namosina boe.
4Nasi'a ei liman nanalangek, tehu ana tao naketuheni namosina sila la tataas esa, ma besi manai ei na, ana tao nala'dis. Hataholi ndia balakai na seli, nalosa hataholi ta hapu ta'da nala fan.
5Lele'do le'odaen naleu-nalaak nai late sala, ma nai pupuku kala, boema ana nggasi ma ana tao nahina ao na ninik batu.
6Lelek bei nai doo ka te nita Yesus mai de nalai neu, boema ana senek neu Yesus mata na.
7Ana nggasi napane'e nae, "Yesus, Fo Manetualain Mademaina Ana na! O sanga tao au le'e ia? No Manetualain na'de na, au dokodoe fo boso tao doidoso au!"
8Hataholi ndia kokolak nae leondia nana Yesus nafa'dan nae, "Dula dale mangalau ko nei, kalua meme hataholi ia dalek mai leona!"
9Boema Yesus natanen nae, "O na'de see?" Hataholi ndia nataa nae, "Au na'de 'Legiun', nanahu ami makadotok nanseli!"
10Hataholi ndia noke fali-fali neu Yesus, fo daenga boso nadenu dula dale mangalauk sila la kalua leme nusak ndia mai.
11Ndia te bafi makadotok totofi sanga nana'ak nai pupuku ka huu na.
12Boema dula dale mangalauk sila la dokodoe neu Yesus lae, "Madenu ami meu leo bafi sila la dalek meu."
13BoemaYesus nakaheik. Dadi, dula dale mangalauk sila la kalua leme hataholi ndia mai de ala masok leo bafi sila la dalek leu. Bafi sila la lala'ena lalai de ala tee leme fela ka su'u na leo dano dale leu boema ala bolo. Bafi sila la basa-basas lala'ena, fafakama bafi lifun dua.
14Boema hataholi manamanea bafi sila la lalai de leu lafa'da manda'dik ndia neu hataholi manai kota no nggolo titia-tatai nala. Boema hataholi la mai fo ala sanga mete manda'dik beek ndia.
15Ala mai tutika lakandoo leo Yesus leu, boema lita hataholi fo na'ka sa dula dale mangalau ka nai aon dale ndia, bei nangatuuk nai ndia. Ana pake bualo'as so, ma dudu'a na boeo namaneu so. Boema basa-basas ala bii beno'u.
16Hataholi manita matan manda'dik ndia, ala tui manda'dik ndia neu basa hataholi la.
17Boema nusak ndia hataholi nala loke fo, Yesus la'oela nusak ndia.
18Lelek fo Yesus sa'e nala ofak lain boema, hataholi fo na'ka sa dula dale mangalau ka nai aon dale ndia noke Yesus, fo ana tunga Yesus.
19Tehu Yesus ta nakaheik fa de nafa'dan nae, "Fali leona, fo mafa'da o tolanoo ka'a-fa'di mala, hata fo Lamatua ka tao no'i basan neu o so, ma mafa'das, Lamatua ka dale malolen soaneu o a!"
20Boema hataholi ndia ana la'o leona, de ana mulai tui nai kota esa na'de, Kota Sanahulu, hata fo Yesus tao basan soaneu ndia. Basa hataholi la lamanene boema, ala dodoo doak ana.
21Yesus fali seluk leo dano selik neu boema, hataholi makadotok ala mai de lakamomotu lan neme boboa kaisun mai.
22Hataholi esa na'de Yairus ana mai. Hataholi ndia mauli-malangan nai uma mamasok manai kota ndia. Lelek fo nita Yesus boema, ana sene neu mata na,
23de noke nanseli nae, "Ama, au anafe'o nga namahe'di belak. Ama sue na, mu fo mafaloen fo ana lea-hai, fo daenga boso maten!"
24Boema Yesus neu sama-sama no Yairus. Hataholi makadoto kala tungan de lakaseseti Yesus neme basa boboakaisun nala mai.
25Nai hataholi makadotok sila la tala'da, hapu inak esa namahe'di po'a daak teuk sanahulu dua so. He'dis ndia bei natutik no he'di bula na.
26Nase'o basa hata-heto nala fo ana bae dote la, tehu dotel sila la esa boeo ta hapu tao nahai fan. Te he'di na boetai namabela nakandoo.
27Inak ndia namanene tutuik ba'u ka la'eneu Yesus so. Boema inak ia si'da esa-esa no hataholi makadotok sila la de neu deka no Yesus neme dea mai,
28nanahu ana dodoo nai dalen dale nae, "Sa'di au taila'e ka'da ba'du manalu na boeo, neukose au lea-hai!"
29Neu de ana taila'e Yesus ba'du manalu na boema, no hatematak ndia boe, po'a daa na nate'e tutik. Name'da nana ana hai so.
30Nai hatematak ndia boeo, Yesus name'da balakai na kalua neme aoinan dale mai. Boema Ana lipa leo hataholi makadotok sila la neu de natanes nae, "See ka nde taila'e Au ba'du manalu nga?"
31Boema ana mana tungan nala lafa'dan lae, "Ama mita matam hataholi de'u-de'u basa ia la lakaseseti. Ma Ama bei natane nae, see ka nde taila'e Ama?"
32Tehu Yesus ka'da mete nakandoo leo boboa kaisun neu.
33Inak ndia bubuluk basa, hata manda'dik neu aoina na so, boema no dedelek ma bibiik, ana senek neu Yesus mata na, de ana manaku ndia tatao-nono'in.
34Boema Yesus nafa'dan nae, "Ana ngonei, hu ka nde o mamahele Au de o lea-hai! Mu'u ma no so'da-molek leona. Te o lea-hai makandoo so!"
35Yesus bei kola-kola te, ladenu hataholi de'ubee leme Yairus uman mai de lafa'da Yairus lae, "Tuan, Tuan anafe'o na maten so, de tuan boso boe tao susa seluk Ama Mesen bai"
36Tehu Yesus ta taoafik neu hataholi sila la hala nafafa'dan ndia fa, de nafa'da Yairus nae, "Boso bii, te ka'da mamahele!"
37Boema Yesus la'ok nakandoo, tehu Ana ta nau hataholi tunga fan de no ka'da Petrus ma Yakobis boema Yohanis fo sila tolanoo kala.
38Lelek fo ala losa Yairus uman boema Yesus mete te nai uma, seek see-doto doto, ma lamanene kikii-makaleleu matuaina.
39Boema Yesus nakandoo leo uma dale neu de nafa'das nae, "Tao le'e de emi makalupu manseli ma emi kii makaleleu? Ni'iana ndia ta mate fan, te ka'da ana sungu ndia!"
40Tehu ala hika Yesus. Boema nadenu basa-basas kalua leo deak leu de no ni'iana ndia ina aman, ma ana mana tunga katelu nala masok leo ni'iana ndia kaman dale leu.
41Lala dalek boema Yesus ho'u na ni'iana ndia lima na de nafa'dan nae, "Talita kum," fo sosoa na nae, "Ana inaana konei, Au afa'da neu o, fo'a leona!"
42No hatematak ndia boe, ni'iana inaanak ndia ana fo'a de ana la'ok. Inaanak ndia teuk sanahulu dua so. Basa hataholi manita matan manda'dik ndia, ala dodoo doa kana lanseli!
43Tehu Yesus kena ka'is no mahelek, fo ala boso tui-benga dede'ak ndia neu su'di see a boen. Boema nafa'das nae, "Fe ni'iana ndia na'a-ninu leona."