Alkitab Mobile SABDA
[VER] : [SANGIR]     [PL]  [PB] 
 <<  1 Korintus 12 >> 

1Arawe kal᷊awọu laonggọ mararohkẹ̌ e. Manga anạ u sěmbaụ, iạ mapulu tadeạu i kamene makakasingkạ kahěngang-hěngang.

2Pẹ̌tahěndungke watụ u su tempong i kamene wẹ̌dawen tanakạkiral᷊a Mawu e, i kamene kai kẹ̌kawọdaitangu tumol᷊e mahan duata mou e.

3I kamene harusẹ̌be masingkạ u taumata lẹ̌ahakengu Rohkẹ̌ u Ruata e, tawe makawera u, "Kai wontogẹ̌ su Mawu Yesus!" Kerene lai tawẹu sarang sěngkatau makawerau, "i Yesus e kai Mawu!" kereu taumata ene e tawe ahakengu Rohkẹ̌ u Ruata.

4Kai mẹ̌dẹ̌dal᷊ahaghi laonggọ Marohkẹ̌ e, kai kěbị e mang laonggọ u Rohkẹ̌ mang sěmbaụ.

5Dingangu kai mẹ̌dẹ̌dal᷊ahaghi hal᷊ẹ̌u mẹ̌tangkiang Mawu e, kai Mawu tẹ̌tangkianeng ene e, kai mang Mawu sěmbaụ ene lai!

6Kai mẹ̌dẹ̌dal᷊ahaghi kakakoạu měkoạ munaran Mawu e, kai arawe měgaghěllị u katatoghasẹ̌ baugu ene suapan taumata e ute mal᷊aing Mawu mang sěmbaụ.

7Rohkẹ̌ u Ruata e nẹ̌karadiahang su pẹ̌sěngkatau tuhụewe kakakoạe.

8Su sěngkatau e Rohkẹ̌ e mang mangonggọu kapelesane su hal᷊ẹ̌ u mahumbisara matatahimadẹ̌. Su wal᷊inẹete wue Rohkẹ̌ ene e mal᷊aing mạngonggọu kapelesa mạanun hal᷊ẹ̌u manualagu Ruata.

9Rohkẹ̌ ene e mal᷊aing mạngonggọ su pẹ̌sěngkatau e kapělěsawe limembo tawẹ sihinge e waụgu mangimang su Mawu Yesus Kristus; arawe kawe su wal᷊ine ute Rohkẹ̌ e mạngonggọu kawasa mapạkapian taumata wọu sakịe.

10Su pẹ̌sěngkatau e lẹ̌onggotangu kawasa mẹ̌koạ munara makạdal᷊inaụ dingangu su wal᷊ine ute kẹ̌kawahageaneng u kapelesa měnẹ̌bal᷊u manga haghing karaking Mawu Ruata. Su pẹ̌sěngkataụ ete wal᷊ine e Rohkẹ̌ ene e mạngonggọu kapelesa mapẹ̌dal᷊ahaedu sude laonggọ bọu Rohkẹ̌ u Ruata e ringangu sude wal᷊ine wọu Rohkẹ̌ u Ruata e. Piạbeng kẹ̌kaonggotangu kapelesa mẹ̌bisara su haghim bisara, ringangu piạbeng nionggotangu kapelesa měnanualagu mangal᷊eng haghim manga wisara.

11Kěbị-kěbị e ikẹ̌karạdiahangu Rohkẹ̌ mal᷊aing sěmbaụ ene; su pẹ̌sěngkatau-sěngkatau e semben nipẹ̌dal᷊ahaedewe timuhụ kapulun Rohkẹ̌ e sẹ̌sane.

12I Kristus e kai mẹ̌sul᷊ungu wadangu taumata; badang ene sěmbaụ, kaiso kawe lawọ l᷊aese. Patikụ l᷊aese ene maningbe mal᷊awọ kaiso nakoạ sěmbaụ.

13Kerene lai i kitẹ kěbị e, baẹbe tau Yahudi arau lai wal᷊ine Yahudi, manga ěllang arau wal᷊ine ěllang; i kitẹ kěbị e seng nisahaning Rohkẹ̌ sěmbaụ ene tadeạu i kitẹ niapakasěmbaụ su wadang i Kristus e. I kitẹ kěbị e mal᷊aing nakahombang Rohkẹ̌ sěmbaụ ene nasahiangkung.

14Batụu wadang hětubẹ̌ e tawe tumbạeng nariadi wọu laese sěmbaụ, kaiso kawe wọu l᷊aese mal᷊awọ.

15Kereu laedẹ̌ e nẹ̌bera, "Iạ e wal᷊inewe l᷊ima, hakịu ene iạ e wal᷊inewe wahageangu wadang," kụ ene wal᷊inewe maul᷊ịu laedẹ̌ e wal᷊inewe laesu wadange.

16Kụ kereu tul᷊i mẹ̌bera, "U iạ e wal᷊inewe mata, hakịu iạ e wal᷊inewe laesu wadang," ene wal᷊inewe lai mạul᷊ịu tul᷊i e kai wal᷊inewe laesu wadang.

17Mangawe andene kạguwạu wadange tumbạeng mata e ute kereapa wue wadange makaringihẹ̌? Arau kereu kạguwạu wadange tumbạeng tul᷊i, ute kereapa wue wadange makaimbu?

18I kitẹ nakasilo u Mawu Ruata e seng napẹ̌tatal᷊ahinong manga laese ene e su wadang. Sěmbaụ-sěmbaụ pinělọ su pěmamělokange kahian Mawu Ruata e timuhụewe kapulune.

19Kereu kěbị e kẹ̌tạeweng laese sěmbaụ, ute kai sude isẹ̌sẹ̌ba badang?

20Kụ mambeng mal᷊awọ laese, kai wadange mang sěmbaụ.

21Ual᷊ingu ene ute mata e tawe makawera su l᷊ima, "Iạ e tawe mẹ̌gausẹ̌ si kau!" arau těmbọe mẹ̌bera su l᷊aedẹ̌, "Iạ e tawe mẹ̌gausẹ̌ si kau!"

22Su sěmběkane manga laesu wadang kụ lẹ̌ěnnaěng karal᷊omeěnge kawe limembong gẹ̌gausang i kitẹ e,

23ringangu manga laese lẹ̌ěnnaěng i kitẹ e riọ mal᷊ahina e ute kawe ene limemboweng arẹ̌gaěng. Manga laesu wadang tạ kal᷊aholẹ e kaiso kawe limembong kakěllaěng i kitẹ e.

24Arawe manga laesu wadang kụ seng kẹ̌kasilo mal᷊ěnggihẹ̌ e, semben tawe wahal᷊uasu naungang i kitẹ e. Mawu Ruata e seng něhundugẹ̌ badang i kitẹ e kereng kapiane hakịu manga laesu wadang apan diọ tawe laarẹ̌gaěnge kai sauneng mahuntinambang lẹ̌arěgaěng.

25Ual᷊ingu ene tangu wadange tawe mapapahiạ; apan laese tangu mahang pandaěng sěmbaụ dingangu wal᷊ine.

26Kereu piạ laese sěmbaụ matědu e, tangu kěbị laese wal᷊ine e ute mal᷊aing matědụ; kereu piạ laese sěmbaụ daloěnge ute, kěbị laese lai wal᷊ine e ute mal᷊aing mahul᷊uasẹ̌.

27I kamene kěbị ute kai lawọ badangi Kristus mase i kamene sěngkatau-sěngkatau e mal᷊aing laesu wadang ene.

28Kerene lai su ral᷊ung u jamaatẹ̌, Mawu Ruata e sen něnilakehu tampạ baug'u kal᷊awọu haghin taumata: Kahumotongange manga rarolohang; karuane manga nabi, katěllune manga mananěntiro, mase i sire apam měmpẹ̌kẹ̌koạ tanda makạdal᷊inaụ, bọu ene i sire apan nionggotang'u al᷊amatẹ̌ baugu mapakạpiam masasakị, arau waug'u mẹ̌tulung'u taumata wal᷊ine, arau waug'u měngangahạ e, arau lai waug'u mẹ̌bisara ringangu kal᷊awọu haghim bawera makạdal᷊inaụ.

29I sire ene wal᷊inewe kěbị manga rarolohange, arau nabi arau lai mananěntiro. Wal᷊inewe kěbị piạ tilakehu mẹ̌koạ munara makạdal᷊inaụ,

30arau waugu mapạkapian masasakị, arau waugu mẹ̌bisara ringangu haghim bera makạdal᷊inaụ, arau waugu měnungkangu kěbị bera e.

31Ual᷊ingu ene ute, kěnangko i kamene pẹ̌tawakal᷊i sěngapam botonge tadeạu makahombang laonggọ u tatal᷊ěntụ kasěllahenge. Mase iạ manodẹu ral᷊eng delaing měmal᷊iun ene si kamene.


  Share Facebook  |  Share Twitter

 <<  1 Korintus 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran