Alkitab Mobile SABDA
[VER] : [SANGIR]     [PL]  [PB] 
 <<  1 Tesalonika 4 >> 

1Samurine, manga anạ u sěmbaụ, i kamie seng něngonggọu sansahẹ̌ si kamene kụ měnsang kereapa hinong mẹ̌biahẹ̌ baugu makal᷊uasẹ̌ naungu Mawu. Kahěngang, orasẹ̌ ini i kamene seng mẹ̌bẹ̌biahẹ̌be kerene. Kaiso ini e ual᷊ingu kawasan Mawu Yesus i kami e mẹ̌gẹ̌gausẹ̌ sěngapam botonge si kamene ringangu mẹ̌nẹ̌nahěsẹ tadeạu i kamene hinong lai limembo mẹ̌kul᷊eteng hal᷊ẹ̌ ene.

2U i kamene semben masingkạu kal᷊awọu sasal᷊ěntihọ kụ seng kinaonggọ i kami e si kamene ringangu kawasan Mawu Yesus.

3Ini e kai kapulun Duata: Tadeạu i kamene mẹ̌biahẹ̌ susi, mẹ̌těngkaraung patikụ pẹ̌sasasundal᷊ẹ̌.

4Apang manga esẹ sutal᷊oarang kamene e kěngkasingkạko kai kereapa tadeạu mẹ̌biahẹ̌ sěngkawingang makal᷊uasẹ̌ naungu Mawu ringangu su taumata.

5Kumbahang mẹ̌biahẹ̌ měngkai tụtol᷊e ěnning u abul᷊i sukawingu, kere kẹ̌koatengu tau kapirẹ̌ běgang Mawu.

6Ual᷊ingu ene ute, kumbahangbe piạu sěngkatau makakoạ pẹ̌sasal᷊a su anạ u sěngkataune, arau lai makaakal᷊ẹ̌. U nạungbe i kami seng něhabarẹ̌ mal᷊ahẹ si kamene u Mawu e sarungbe měhukungu taumata měmpẹ̌koạ manga pẹ̌sasal᷊a kerene.

7Mawu Ruata e seng nẹ̌kui si kitẹ, kụ bal᷊inewe i kitẹ mẹ̌biahẹ̌ su ral᷊ungu pẹ̌sasasundal᷊ẹ̌, kaiso kawe tadeạu i kitẹ mẹ̌biahẹ̌ dingangu kakanoạ makạl᷊uasẹ̌ naung'E.

8Taumata kụ mạnuhudu těntiro ini ute wal᷊inewe mạnuhudu taumata, kaiso kawe měnuhudẹ̌ Mawu Ruata kụ seng něngonggọ u Rohkẹ̌ e Ruata si kamene.

9Semben tawahal᷊uasu lai i kami měnuratẹ̌ si kamene maul᷊ịu kereapa i kamene hinong mẹ̌kakěndagẹ̌ lawọ taumata mangimang. I kamene hala e seng nitěntiroěngu Mawu hal᷊ẹ̌ u mẹ̌kakakěndagẹ̌.

10Kụ hal᷊ẹ̌ ini e seng nitodẹ i kamene su kěbị apan měmpạngimang e su kaguwạu Makedonia. Kai arawe manga anạ u sěmbaụ, i kami e mẹ̌gẹ̌gausẹ̌be sěngapam botonge, tadeạu pẹ̌bawiahi kamene e makoạbe limembong kapiane lai.

11Pěmpẹ̌biahẹ̌ko marěmasẹ̌ dingangu tawe rumal᷊aụ urusangu taumata wal᷊ine. Pěmpěmunarako mẹ̌deạ pẹ̌bawiah'i kamene hala, kerẹewe i kami e nạung kal᷊imona seng něngatorẹ̌ si kamene.

12Kereu i kamene mẹ̌bẹ̌biahẹ̌ kerene, i kamene tawe měngumbala si sai-sai, dingangu taumata apan tawe měngangimang si Kristus e sarungbe měngadatẹ̌ si kamene.

13Manga anạ u sěmbaụ, i kami mapulu tadeạu i kamene makakasingkạu kai apa tuhụ hinone taumata kụ apan seng něngkairị; tadeạu kumbahangbe měngkasusa naung i kamene kere taumata wal᷊ine tạ pělaharape.

14I kitẹ mangimangu i Yesus seng napohong kutẹu kawe nẹ̌biahẹ̌ kapia. Kai ene hakịu i kitẹ e mal᷊aing mạngimangu Mawu Kasěllahenge sarung mapẹ̌biahẹ̌ kapia patikụ taumata seng něngkairị su ral᷊ung'i Yesus, tadeạu i sire mẹ̌biahẹ̌ dingang'E.

15Su hal᷊ẹ̌ ene ute, kai ini těntiron Mawu e ipaul᷊ị i kami e si kamene: Su tempong Mawu Yesus duměnta e, i kitẹ apan bẹ̌dang biahẹ̌ e tawe makapěngal᷊imona taumata apan seng něngkairị kal᷊imona.

16Hědọewe těmbonangu malaekatẹ̌ e sarung měluntingihẹ̌ maihạ-ihạ, dingangu napirin Duata e ipahěte makoạ tatialam parenta. Bọu e Mawu Yesus hala e sarung lumintụ bọu sorga, ringangu apan taumatan Sahani e kụ seng něngkairị e sarung ipẹ̌biahẹ̌ kal᷊imona.

17Bọu ene, i kitẹewe apam bẹ̌dang biahẹ̌ su tempo ene sarung sěngkakapuạ dingangi sire su ral᷊ungu winawa tadeạu makapẹ̌sombangu Mawu e su winangaeng. Bọu ene ute i kitẹ makapẹ̌tanạbe ringangu Mawu e sarang karěngụ-děngụe.

18Hakịu ene, ute kěnangko i kamene pẹ̌tatatongka su hal᷊ẹ̌ u měmpanoghasẹ̌ pangangimang kapẹ̌pakẹen bawera ini.


  Share Facebook  |  Share Twitter

 <<  1 Tesalonika 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran