Dual Panel1Abe lẹ̌hěkare taumata limembon naiakang bo'i kau kaiso ahạko i sie pararingihẹ̌ manga waweranu kere i sie i amangu. Kakoạko manga l᷊aumbaseng kere anạ u sěmbaụ,
2dingangu manga wawine matatimadẹ̌ e tabidạewen měkẹ̌koạ si ninangu. Manga wawine mal᷊ahuala e wue ute koạko kere tuarinu, kụ mangkewen pakaamumang.
3Pakaadatẹ̌ su manga wawine wal᷊u tạ mělahikinge.
4Kai kereu manga wawine wal᷊u piạbe manga anạe arau pulunge, ute i sire ene kai kakal᷊imona-monaěnge harusẹ̌be onggotangu katatahuěnna u i sire hinong kumakělla ral᷊ohon bal᷊en sire tutune, ringangu měmal᷊isẹ̌ kapian matimadẹ̌ dingangu manga i upung i sire. U kai ene makạl᷊uasẹ̌ dal᷊ungu naungu Mawu Ruata e.
5Bawine wal᷊u kụ kahěnga-hěngang sẹ̌sane, ringangu tawẹ i sai-sai makapadul᷊i si sie, kụ kětạben mělẹ̌harapẹ̌ su Mawu Kasělahenge. Ěllo hěbi i sie měngkai měkẹ̌kal᷊iomaneng su Ruata mědẹ̌dorong tul᷊umange.
6Arawe wawine wal᷊u kụ kětạben mapulu mẹ̌těngkasěnaěngu watangenge ute mẹ̌sul᷊ungu seng nate manimbe i sie wẹ̌dang biahẹ̌.
7Habarẹ̌ko manga těntiro ini e si sire, tadeạu i sire mẹ̌biahẹ̌be ta kasasěngkul᷊ang.
8Kai kereu piạ u tawe mẹ̌papadul᷊i anạ u sěngkataune, nangělembo kate ral᷊ohon bal᷊ene sẹ̌sane ute i sie nẹ̌sunial᷊u pangangimange; i sie limembong karal᷊akise wọu taumata tạ pangangimange.
9Kětạben bal᷊u makatuhụ manga kal᷊awọu atorang ini e wotonge masowa su rol᷊ẹ̌ u manga wawine wal᷊u; umure harusẹ̌ mẹ̌těngkasanạ ěnnungu pul᷊o su taunge, nạung kětạben sěnsul᷊e mẹ̌kawing,
10ikẹ̌katiwạ u kere sěngkatau wawine seng nẹ̌koạ apan mapia e, kere andene; seng nẹ̌padul᷊i napakasarian manga anạe pakapia, maral᷊uasẹ̌ mapanumpangu taumata mẹ̌tana su wal᷊ene, mẹ̌tangkiang taumata apan mạngimang, dingangu lụontol᷊ẹ̌ apan masasusa nimbụe seng nẹ̌koạ dingangu kạguwạu naung patikụ haghin munara mapapia.
11Arịebe sowa su ral᷊ungu rol᷊ẹ̌ u wawine wal᷊u mangangudạ. Batụu kamageng dẹ̌děntaěngken ěnning u mangudạ, ute i sire mapulu mẹ̌kawing kapia, kụ měmpẹ̌tal᷊ikud'i Kristus.
12Tangu i sire kai nẹ̌sal᷊a watụ u nělandang kire nionggọ si sire.
13Limembo kate lai i sire měgẹ̌gagholọu tempo ringangu masuẹ̌ masěbangu wal᷊e. Dingangu limembọewen karal᷊akị e ute kai i sire mẹ̌sẹ̌sampuhu tau wal᷊ine dingangu lụlaụ urusangu tau ringangu mạhumbisarang hal᷊ẹ̌ hinong tawe wotonge ipahumbisara.
14Hakịu ene iạ mapulu tangu tadeạu manga wal᷊u mangangudạ e pěmpẹ̌kawing kapia, makahombang anạ dingangu mangurusẹ̌ dal᷊ohom bal᷊ene, madirin makawodaị dokạ makareạ lěsạbe makapěnamedẹ̌ arengi kitẹ e.
15U kai piạ manga wawine wal᷊u seng něngkapal᷊idẹ̌ timol᷊e rohkẹ̌ dal᷊aị.
16Kai kereu sěngkatau wawine tau sahani e kụ piạ manga anạ u sěmbaụ e wawine wal᷊u, ute i sie harusẹ̌be mẹ̌tul᷊ungu manga wawine wal᷊u ene; arịebe makawěhạ jamaatẹ̌ e. Tadeạu jamaatẹ̌ e makaontol᷊ẹ̌ bue manga wawine wal᷊u sẹ̌sane kụ tawe manga anạ u sěngkataune.
17Měngangahạ jamaatẹ̌ e, kụ měmẹ̌munarawe mapapia kere sěngkatau pangahạ e ute hinong adatengu laadatẹ̌ dua haweng, nangalembọ e si sire apan maghaghising měhabaru hengetange ringangu měmpaněntiro.
18Watụ u su ral᷊ungu Winohẹ Susi, kạbawohẹ, "Sapi kapělẹ̌lindane gandung mapakạ hondosu wakị u gandung bọu wul᷊ihe, kumbahangbe hakutang mohonge." Kerene lai, "I sain masaghedẹ̌ e, i sie hinong měnarimạ tatendenge."
19Abe pěnarimạ laěnsilẹ̌ su měngangahạ jamaatẹ̌, tabeạu katewe piạ sahidine rarua arau těllung katau.
20I sain němpẹ̌sal᷊a e, pẹ̌berai su těngong kal᷊awọu jamaatẹ̌, tadeạu i sire wal᷊ine e mal᷊aing matakụ.
21Su těngon Duata, i Kristus Yesus, dingangu manga malaekatẹ̌ pinile e, iạ mědẹ̌dorong sěngapam botonge tadeạu i kau tumol᷊e kěbị těntiro ini tawẹ pěngangantang si sai-sai, ringangu tawe mẹ̌sasěmběka.
22Abe lai kasasahawụ měnělidu lima su sěngkatau waụgu ihengkẹ makoạ mẹ̌tatangkiang Mawu Kasěllahenge. Kere u wal᷊ine nẹ̌sal᷊a, ute kumbahangbe mẹ̌těngkal᷊aụ su pẹ̌sasal᷊a ene. Pakatanure watangengu e, tadeạu pẹ̌bawiahu e katatanạbe susi.
23Abe kětạung měnginung akẹ matagẹ̌, kaiso pěpakekon anggorẹ̌ pẹ̌kadodọ mědeạu makaontol᷊ẹ̌be pělahenẹ kaěng su tiang, batụu pẹ̌sěngkakuhuang i kau e kai mạsakị.
24Pẹ̌sasal᷊an taumata sěnggạe, kal᷊amonan tawe nikẹ̌kiwal᷊oěng su pěnggaghutaěnge ute seng nawualagẹ̌. Arawe pẹ̌sasal᷊an taumata wal᷊ine ute hẹ̌do kẹ̌kasingkateng samuri.
25Kerene lai apang kakanoạ mapapia e ute apidu lụlětạ. Dingangu apạewen katataingu wal᷊ine kerene ute tawe lai měngkai kạbawuni.