Dual Panel1Manga anạ u sěmbaụ apan seng němpangimang mapia kere i kami! I Yesus Kristus e, kai Ruata ringangu Ratu Měnanal᷊amati kitẹ, seng něnggonggọ u pěngangimang kerene e si kitẹ batụu i Sie kai mẹ̌kẹ̌koạ apang matul᷊idẹ̌ e. Suratẹ̌ ini e kai wọu anung Simon Petrus, sěngkatau ěllang dingangu rarolohangi Yesus Kristus.
2Mal᷊owọko Mawu Ruata e měnggonggọu al᷊amatẹ̌ dingangu karal᷊unsemahẹ̌ e si kamene kụ iapẹ̌dal᷊embo, u i kamene e masingkạben Mawu Ruata ringangu i Yesus Mawung kitẹ.
3Ruata e seng nẹ̌pakẹ u kawasane manilakehu patikụ sạbarang gẹ̌gausang baụgu makawětị pẹ̌kakal᷊iomaneng. I Sie mẹ̌kẹ̌koạ ini e wọu pẹ̌kakiral᷊ang kitẹ si Sie kụ seng nẹ̌kui si kitẹ tadeạu mal᷊aing makapěndang kereapang kasěllahe ringangu kal᷊ahimumun'E.
4Ual᷊ingu kakakoạ kerene ute Ruata e mangonggọu al᷊amatẹ̌ tawẹ sihinge si kitẹ e ringangu apạ e maarěga nạung seng nikedon'E. Kụ ual᷊ingu kal᷊awọu al᷊amatẹ̌ ene tangu i kamene rembem makal᷊ẹ̌sọ bọu kapulu raral᷊akisẹ̌ e makawinasa dunia ini ringangu i kamene mal᷊aing kawuakengu kakakoạ u maruata.
5Ual᷊ingu ene, pẹ̌tatẹ̌gehẹ̌ko ringangu kaguwạu naung tadeạu pěngangimang i kamene e tẹ̌tuilangu kapiam pẹ̌bawiahẹ̌. Sul᷊iung kapiam pẹ̌bawiahẹ̌ e, i kamene hinong piạ kasingkạ e,
6kụ sul᷊iun piạ kasingkạ, ute i kamene harusẹ̌be lai piạ pẹ̌tatingkẹ̌dang. Dingangu sul᷊iun pẹ̌tatingkẹ̌dange ute kěnangko i kamene rěndinganengu l᷊ai manoghasẹ̌ dal᷊ungu naung mẹ̌tatětol᷊u patikụ sạbarang. Katoghasu naunge rěndinganengko l᷊ain tatuhụ su kapulun Duata.
7Dingangu pẹ̌bawiahẹ̌ tụtuhụ kapulun Duata harusẹ̌be lai timuengkom pẹ̌kakakěndagẹ̌ su sěndinganeng tamba pangangimang. Tuhụe pẹ̌kakakěndag'i kamene su sěndinganeng tamba pangangimang timuengkol᷊ain kakěndagẹ̌ su patikụ taumata.
8Patikụ ene ute kai kakakoạ i kamene hinong gausang. Kereu kakakoạ tamai ene kẹ̌kaěbakeng mědẹ̌dal᷊embo si kamene, ute i kamene iapakaghising dingangu makahombang lětạ e, kụ i kamene sarung makakiral᷊a si Kristus Yesus Mawung kitẹ e limembong kapiane.
9Kai arawe i sai-sain tawe kaěbakeng kakakoạ e kerene ute, silon matane e masul᷊akọ; i sie tawe makasilo ringangu i sie niwul᷊eng kal᷊awọu rosane nạung nal᷊iu e seng niapakawurẹ̌si.
10Ual᷊ingu ene, manga anạ u sěmbaụ, pẹ̌tatẹ̌gehẹ̌ko l᷊imembong katoghase tadeạu kakuin Duata e ringangu pilene nihino su watangeng i kamene e mangkeng kạpahuntinambang kasẹ̌gade. Kamageng i kamene měkẹ̌koạbe kerene, ute i kamene tawe mẹ̌tul᷊a.
11Dingangu kerene ute i kamene sarungbe ghělirangu ral᷊enge makakasuẹ̌ su Kararatuangu Mawu kakalẹ̌ dingangu Ratu Měngangambang i kitẹ i Yesus Kristus.
12Ual᷊ingu ene, iạ e měngkai masau su sul᷊ene mapẹ̌tahěndungu tamai ene manịeng i kamene semben těbe masingkạ dingangu limembowen mạngimang su hengetangu Mawu Kasěllahenge seng kinatarimạ i kamene.
13Karěngụeweng iạ deng biahẹ̌, iạ e makạpěndangu hinong mapẹ̌tahěndung i kamene su hal᷊ẹ̌ tamai ene.
14Batụu iạ masingkạ u tawẹ karěngụe iạ e sarung měněntangu dunia ini, u Mawung kitẹ i Yesus Kristus semben něhabarẹ̌ mal᷊ahẹ si siạ.
15Tangu iạ e mẹ̌tatěgehẹ̌ bue tadeạu samuring papateku e, i kamene mambeng hanesẹ̌ mẹ̌tẹ̌tahěndung kapia hal᷊ẹ̌ tamai ene.
16Su tempong i kami něhabarẹ̌ si kamene u kereapa kawantuge rarěntan Mawung kitẹ i Yesus Kristus, i kami e wal᷊inewe tụtol᷊e wio nilangingu taumata. Kawawantug'i Kristus e sembeng kinasilon matang kami hala.
17I kami e nạung paị sene piạ i Sie lẹ̌adateng dingangu wẹ̌bantugangu Ruata i Amang. Ene piạ e tingihẹ̌ bọu Kawantugange nawuntiling si Sie kere ini: "Inie kai Ahusẹ̌ku ikẹ̌kěndagẹ̌. I Sie makạl᷊ahimpulu si Siạ e!"
18I kami hala e nakaringihẹ̌ tingihẹ̌ ene e natěntung bọu sorga e piạ i kami sěngkarěnta ringange su wowom bul᷊ude susi e.
19Kai ene hakịu i kami e limembowen lai maiakingu hengetangu Mawu Ruata e nihabaru manga nabi. Kai kereng kal᷊ěnggihe kamagengu i kamene měmpạngiakingu wawera ene, u wawera ene kai kere sol᷊o sụsěnnang su tampạ marěndunge mịdatingu mal᷊ukadẹ̌ dingangu tualagu kạdaděmahẹ̌ e suměnnang su ral᷊ungu naungi kamene manga anạ u sěmbaụ.
20Kaiso něngalembọewe lai ute pẹ̌tahěndungko i kamene hal᷊ẹ̌ ini: Hengetangu Mawu e mạanung pěnaněbal᷊u apa sarung mariadị e tawe ikapituan taumata sěmatang.
21U mamben tawẹ sarang sěnsul᷊e piạ taumata kụ ual᷊ingu kapulune sẹ̌sane makapěhabaru hengetangu Mawu Ruata e mạanụeng hal᷊ẹ̌ apa sarung mariadi. I sire ene kawe wẹ̌bal᷊ẹ̌bekangu Rohkẹ̌ u Ruata e sěmatang, piạ i sie měhabaru hengetangu Mawu Ruata e.