Dual Panel1Manga anạ u sěmbaụku ikẹ̌kěndagẹ̌! Kai ini e suratẹ̌ku karuane si kamene. Su ral᷊ungu suratẹ̌ darua ini, iạ e mẹ̌tẹ̌tawakal᷊i mạmangung kal᷊awọu pěndangu naung i kamene matatilang.
2Iạ mapẹ̌tahěndung i kamene su manga těbal᷊u manga nabi nạung kal᷊amona e ringangu titan Mawu, Ratu Mananal᷊amatẹ̌, nihabarẹ̌ si kamene wọu manga rarolohang.
3Kahumotongange, i kamene harusẹ̌be mạsingkạ u su ěllo-ěllọ e pěhěpusange, sarung mahunsěpụ taumata apan pẹ̌bawiahe wẹ̌bal᷊ẹ̌bidangu abul᷊ing sahig'i sire. I sire e kai sarung měmpěheghesẹ̌ si kamene,
4kapẹ̌bẹ̌berane ungkuěng, "Uadewe Mawu e nẹ̌kědou sarung duměnta! Kụ ini e kawe suapa i Sie? Manga i upung i kitẹ e seng nasue něngkairị, kaiso kěbị sạbarange měngkate lai těbe kere nạung dunia e nariadi!"
5I sire semben nẹ̌tatudẹ u tawe mapulu měngaku u nạung kal᷊amona e Ruata něndiadi langị dingangu dunia ual᷊ingu hengetang'E. Dunia e niriadine wọu akẹ,
6kụ dingangu akẹ lai kụ kai wọu akẹ u ralulung masaria dunia tempo ene naelọ dingangu nawinasa.
7Arawe langị dingangu dunia orasẹ̌ ini e, pẹ̌padul᷊iangu hengetangu Mawu Kasěllahenge lai kạtatamang mẹ̌deạu sarung ipakawinasan putung. Orasẹ̌ ini langị dingangu runia wẹ̌daweng kạtatamang sarangkeweng ěllom pělahukungu taumata raral᷊akisẹ̌ e kụ iapakawinasa.
8Arawe manga anạ u sěmbaụku, hal᷊ẹ̌ sěmbaụ ini e kumbahangbe i kamene miwul᷊e: u su ral᷊ungu silom matang Mawu e, sahěllo e tawe pinẹ̌tatěntangenge ringangu sěhiwu -- su taunge irẹ̌dua e měngkate mẹ̌sul᷊ung si Sie.
9Mawu e tawe marararěnna měngonggọu apan seng bọu nikẹ̌don'E, maningbe piạu mạngiral᷊ingu al᷊ingkai kerene. Kasueěnge, i Sie měngkate mẹ̌tẹ̌těngkasabarẹ̌ su těngong kamene, batụu i Sie tawe mapulu piạu sěngkatau mawinasa. Kapulune ute kai tadeạu kěbị taumata e mẹ̌tobatẹ̌ bọu kal᷊awọu rosane.
10Arawe Ěllon darěntan Mawu e sarung kere rarěntan tahatako. Su Ěllo ene, langị sarung maparung dingangu tingihu rěllụ, masene kal᷊awọu apan su l᷊angị e masue maupung katatutung, mase dunia ringangu patikụ apan su ral᷊unge sarung maparung.
11Ual᷊ingu kěbị ene sarung masue magholọ kerene kụ kereapa wue i kamene mẹ̌biahẹ̌? I kamene harusẹ̌ mẹ̌těngkasusi waugu Mawu Ruata,
12karěngụeweng i kamene měmpạngampal᷊ẹ̌ dingangu mẹ̌kẹ̌karakin darěntang Ěllon Duata. Su Ěllo ene langị sarung masue matutung, dingangu ual᷊ingken katatětị e, ute kal᷊awọu sạbarang su l᷊angị e sarung měngkatuno.
13Arawe i kitẹ e měngampal᷊ewe apan nikẹ̌don Mawu Ruata e, kụkai langị buhu ringangu dunia wuhu, su apan sene piạ kal᷊aadilẹ̌e.
14Hakịu ene manga anạ u sěmbaụ ikẹ̌kěndagẹ̌ těntal᷊angbe i kamene reng měmpạngampal᷊ẹ̌ darěntan Ěllo ene e, pẹ̌tatẹ̌gehẹ̌kong kạguwạu naung i kamene mẹ̌těngkasusi ringangu tawẹ turạe su pẹ̌bawiahẹ̌ e su těngon Mawu Ruata.
15Pěllọ e pẹ̌kakakědangu Mawung kitẹ e tabidạu ghaghěllịu loahe si kamene, tadeạu maambang. I Paulus, anạ u sěmbaụ i kitẹ ikẹ̌kěndagẹ̌ e semben lai němohẹ kerene si kamene. I sie němohẹ suratẹ̌ ene timuhụ tahuěnna nionggọ u Ruata si sie.
16Su ral᷊ungu patikụ surate, i Paulus měngkate masau měmohẹ u ene. Mambem piạ hal᷊ẹ̌ pira-pirambaụ e masusa kaěnnaěng su ral᷊ungu suratẹ̌ ene. Mase taumata apan tawe makal᷊aěnna ringangu mal᷊ongkọ pangangimange, seng němpěmihu apan seng bọu nịbawohẹ i Paulus. Kerene lai kẹ̌koateng i sire su manga winohẹ bal᷊ine. Kěbị ene kětạeng makawinasa si sire hala.
17Arawe i kamene manga anạ u sěmbaụ ikẹ̌kěndagẹ̌ e seng masingkạ u hal᷊ẹ̌ ene. Ual᷊ingu ene tangu pakapapia wue, kumbahangbe i kamene ikataweng sarang kapapal᷊idu taumata wẹ̌gan atorange kụ i kamene měngkanawo wọu tampạ tawẹ konsange apa.
18Tangu kěnangko i kamene mangkeng makạpěndang tatal᷊ěntụ'i Yesus Kristus, Mawu ringangu Ratu Mananal᷊amat'i kitẹ e, ringangu kěnangko i kamene mal᷊aing mangkeng makạkiral᷊a si Sie. Karaloko i Sie, orasẹ̌ ini ringangu sarang marěngụ-děngụ! Aming. Adat'i kami, Petrus