Dual Panel1Anạku i Timotius! Pẹ̌těngkakuatẹ̌kon tatal᷊ěntụ nionggọ si kitẹ e, ual᷊ingkeng kasasěmbaụ i kitẹ dingang'i Kristus Yesus.
2Těntirọ e nạung seng kinaringih'u wọu iạ su těngọen lawọ e, sarakangko su taumata kapěngumbalaěng dingangu pelesa maněntiro taumata wal᷊ine.
3I kau e pẹ̌tatahangko l᷊ain sigěsạ dingang, kerẹ e sordadong Kristus Yesus masatia.
4Sěngkatau sordado kapẹ̌lẹ̌hal᷊ẹ̌ e, apawe tawe mẹ̌tatasibung hal᷊ẹ̌ u wiahẹ̌ e, u i sie měngkai mědẹ̌deạ u makapẹ̌tatahinong naungu těmbonangu mẹ̌sasekẹ.
5Sěngkatau mẹ̌tatanding tawẹu kapiange su ral᷊ungu tanding, kereu i sie tawe tumuhụ manga atorange.
6Tahapěngěntana kụ seng něhal᷊ẹ̌ masěgadẹ̌ e, seng i sie kahumotong-motongange makaual᷊i wuane.
7Sipireko apan takụ nibawera ene, batụu Mawu e sarung mangonggọ si kau katatahuěnnang kěbị ene.
8Tahěndungeko ini: Injilẹ̌ takụ ilẹ̌habarẹ̌ ene kai habarẹ̌ mạanun Yesus Kristus, hěnton Daud, kai i Sie i Kristus kụ seng nẹ̌biahẹ̌ kapia wọu kapapohonge.
9Ual᷊ingu mělẹ̌habarẹ̌ Injilẹ̌ e, iạ tangu nakapẹ̌tatahangu sigẹ̌sạ sarang l᷊ai nihapusẹ̌ kere taumata ral᷊aị. Kai arawe hengetangu Mawu e tawe ikahapusẹ̌.
10Kai ene hakịu iạ e makědang měnal᷊udẹ̌ kěbị ene baugu patikụ taumata kụ seng pinilen Duata, tadeạu i sire mal᷊aing makahombang kasasal᷊amatẹ̌ nionggọ su ral᷊ung i Kristus Yesus, rẹ̌děndinganengu kawawantugẹ̌ kakalẹ̌.
11Mamben těngadẹ̌ bawera ini, "Kereu i kitẹ e seng nate ringange, ute i kitẹ sarung mẹ̌biahẹ̌ l᷊ai ringang'E.
12Kereu i kitẹ e makẹ̌dang, i kitẹ e mal᷊aing sarung mẹ̌parenta ringang'E. Kereu i kitẹ e mẹ̌sunial᷊'i Sie, i Sie lai sarung mẹ̌sunial᷊'i kitẹ.
13Kereu i kitẹ e tawe mẹ̌těngkasatia, i Sie tatapẹ̌ satia, u tawe mariadi kụ i Sie mẹ̌darokạ dingangu watangeng'E sẹ̌sane."
14Kěnangko i kau e pẹ̌gěllịu ingate su apan taumata mạanun patikụ ini. Su těngon Duata e, sasaiko i sire tadeạu abe pěmpẹ̌bul᷊on hal᷊ẹ̌ u manga wisara. Ene tawẹ gunane, sal᷊ạanune kai makạkal᷊emboghang si sai-sain dumaringihẹ̌.
15Kěnangko i kau pěhaghu sěngapan botonge, makoạ taumata kahěnga-hěngang pangumbalaěngu Ruata e. Pẹ̌bangkuadẹ̌ko tadeạu i kau e tawe mamean hal᷊ẹ̌ u e kaiso kawe maněntiro pakatumang mangạ e těntirong katul᷊idẹ̌ e wọu anun Duata.
16Pẹ̌teghangkon manga wisara tạ gunane ringangu makahina Ruata. Kal᷊awọu wisara tamai ene tumbạeng makạkoạ taumata mangkeng kapạhuntinamban kararal᷊akise.
17Těntirong manga taumata ene nẹ̌darěkẹ kere sakị kangker nẹ̌tondaisẹ̌. Bọu tal᷊oaran sire piạko i Himeneus rẹ̌duan Filetus.
18I sire seng němpělenga wọu těntirong katěngadẹ̌ dingangu nakapẹ̌golang pěngangimangu sěnggạ. Ungkuěng i sire u pẹ̌bawangungu taumata nate e seng bọu nariadi.
19Kai laěmpahẹ̌ matoghasẹ̌ niěmpahu Ruata e tawe ikaghoghahẹ̌ baharia. Su wowone e kạbawohẹ kere ini, "Mawu e makạkiral᷊a tataghuanenge", dingangu "Taumata mẹ̌bera u i sie kai tataghuanengu Mawu, taumata ene harusẹ̌be mangědo wọu pẹ̌kakakoạ pẹ̌sasal᷊a".
20Su ral᷊ungu wal᷊e masasaria e kẹ̌kaěbakeng manga apal᷊iwụ mẹ̌dẹ̌dal᷊ahaghi. Piạben nikoạ bọu sal᷊aka arau wul᷊aeng, kaiso piạbe lai wọu kalu arau ěntana. Piạben ipẹ̌pakẹ baugu pandungangu wẹ̌bantugang, dingangu piạbe lai waụgu pandungang sen tiasane.
21Taumata kụ mẹ̌tẹ̌těngkawurẹ̌sim batangenge wọu patikụ kararal᷊akisẹ̌ e, i sie sarungbe paketang baugu apam munara mapapia. I sie nakoạbe tataghuaneng těntani ringangu mẹ̌baraguna su mawune. I sie měngkai rẹ̌diahiang baugu apam munara mapapia e.
22Pẹ̌teghangkon haghing ěnning u apan mangangudạ e. Pěhaghuko pẹ̌bawiahẹ̌ tụtuhụ kapulun Duata, satia su apan těntirone ringangu kụkěndagu sěndinganeng taumata ringangu mạnaghuang lenehẹ̌ dingangu ramenaung. Pẹ̌biahe kerene ringangi sire apang kụkui makịtul᷊ung su Mawu e ringangu naunge wurẹ̌si.
23Abe tẹ̌tol᷊e su ral᷊ungu pẹ̌dararendehu apang longong bẹ̌gaweng apa-apa. I kau masingkạu kěbị ene tumbạeng makapẹ̌bẹ̌bul᷊o.
24I saim mẹ̌munara waugu Mawu e tawe hinone mẹ̌bul᷊o; i sie harusẹ̌be mahimumu su kěbị taumata, ringangu pelesa maněntiro ringangu masabarẹ̌.
25I sie harusẹ̌be ringangu masikome naunge maněntiro apam puluang dumokạ; mal᷊owọko Mawu e mangonggọ u l᷊oahe si sire ene mẹ̌deạu měmpẹ̌tobatẹ̌ bọu kal᷊awọu rosan sire ringangu makakiral᷊a těntiro kahěngang.
26Kụ kerene i sire němpẹ̌sasěsilẹ̌ kapia, ringangu nẹ̌těngkapěllọ bọu sasaungu setang kụ měnaweng si sire ringangu měnihasa si sire apạtol᷊e kapulune.