Dual Panel1I kamene e kai manga anạ u Mawu Ruata ikẹ̌kěndag'E, ual᷊ingu ene ute i kamene harusẹ̌be pěmpẹ̌tawakal᷊i tumol᷊e kakakoạ u Mawu e.
2Pẹ̌bawiah'i kamene ute mal᷊owọko lohoěngu pẹ̌kakakěndagẹ̌ kerẹewe i Kristus mal᷊aing kiměndag'i kitẹ. I Sie nẹ̌těngkaonggọu watangeng'E waug'i kitẹ nakoạ kere sěmbaụ sasěmba ral᷊urune mawěngi makạl᷊ahimpulu naungu Mawu Ruata e.
3I kamene kai taumatan Duata. Kụ pẹ̌sasundal᷊ẹ̌ dingangu kakanoạ tawe mẹ̌tatahino, arau anggange tawe hinong kaẹ̌bakeng sutal᷊oarang kamene. Kumbahangbe sarang taumata wal᷊ine piạ alasange mẹ̌berau i kamene měmpẹ̌kẹ̌koạ tamai ene.
4Tawe lai hinone i kamene mẹ̌bera manga wawera kotorẹ̌, beran pẹ̌sasundal᷊ẹ̌ arau bawera tạ mangal᷊ene. Kaiso mạpiangbe i kamene makitarimakasẹ su Mawu Ruata.
5Kakěllako pakapapia: taumata kụ měngkai mẹ̌sẹ̌sundal᷊ẹ̌ arau měngkai piạ kakanoạ e ta hinone, arau maanggang (piạ kakanoạ e mẹ̌sẹ̌sihing e ute měngkate lai mẹ̌sul᷊ung u mạněmba l᷊ai mahan duata), tangu i sie ene tawe makoạ laesu wadang i Kristus dingangu Mawu Ruata e.
6Kumbahangbe i kamene kaakal᷊eng u manga wawera tawẹ gěsine. Batụu kěbị-kěbị ene e makakoạ dal᷊angeh'u Mawu Ruata su taumata apan ta tumatuhụ si Sie.
7Kụ kumbahang měngkai mẹ̌dal᷊ahapị u taumata kerene.
8I kamene hala těngadẹ̌be nạung marěndung. Kai arawe orasẹ̌ ini i kamene semben nariadi umatu Mawu, kụ i kamene ene su ral᷊ungu tualagẹ̌. Ual᷊ingu ene ute i kamene harusẹ̌be pẹ̌biahẹ̌ su ral᷊ungu tualagẹ̌.
9U kai wọu tualagẹ̌ ene suměpụ patikụ kakanoạ mapapia, adilẹ̌ dingangu matěngadẹ̌ su kasingkạu Ruata.
10Pẹ̌tawakal᷊iko měnanẹ̌sui apa hinong makal᷊uasẹ̌ dal᷊ungu naungu Mawu kasěllahenge.
11Kumbahangbe mẹ̌koạ kakanoạ tawẹ kěhase kẹ̌koatengu apan sukararěndung. Susěmběkane ute, i kamene kěbị e pěmpěluạko apang kakanoạ ene.
12(Batụu kěbị apang kẹ̌koateng i sire supěnise ute ipạhumbisara e mal᷊aing makạmamea.)
13Kěbị apang kẹ̌kahinoěngu tualagẹ̌ e sarung ikasilo mal᷊ahẹ.
14Batụu kěbị apang ikasilo mal᷊ahẹ e kai tualagẹ̌. Hakịu ene kai piạ bawerau, "Kapukọ e, ei kau mẹ̌tẹ̌tikị e, ringangu pẹ̌bangungke wọu tal᷊oaran taumata nate. I Kristus sarungbe suměnnang si kau."
15Batụu ene pakapapia we kahěngang měluhudẹ̌ pẹ̌bawiah'i kamene. Ariẹbe kere pẹ̌bawiahu taumata wodo; kaiso pẹ̌biahẹ̌ko kere taumata matatahuěnna.
16Pakẹko tempo paka pia-pia suapam piạ loahi kamene, watụ u tempo ini e kai tempo ral᷊akisẹ̌.
17Abe pẹ̌těngkawodong batangeng kaiso pěnẹ̌něsuiko apang ikẹ̌kapulun Mawu.
18Kụ abe pẹ̌těngkiwukang u anggorẹ̌, batụu ene kai makasilakạ si kamene, kaiso kěngkapenẹkon Rohkẹ̌ u Ruata e i kamene.
19Pěmpẹ̌sasahandaẹkon mazmurẹ̌ dingangu kakantarị daralo ringangu kantari marohkẹ̌ su ral᷊ungu pal᷊ahumbisarang kamene. Pakaral᷊uasẹ̌ko i kamene měmpẹ̌kantarịu kakantarị daralo su Mawu.
20Pakasauko ringangu su hal᷊ẹ̌ewe lain manga apa-apa ute i kamene mang pakatatarimakasẹ su Ruata i Amang, su areng i Yesus Kristus Mawung kitẹ.
21Mědeạu makaadatẹ̌ si Kristus, ute pakasasuměllungko i kamene sěmbaụ dingangu wal᷊ine.
22Manga wawine, pakasuměllungko su kawing i kamene kerẹewe su Mawu e.
23Watụ u manga esẹ e kai těmbọu wawine e, kerẹewe lai i Kristus mal᷊aing nakoạ těmbọu jamaatẹ̌, kụ i Sie sẹ̌sane mal᷊aing Datun Sal᷊amatẹ̌ baugu jamaatẹ̌ kụ nakoạ badange.
24Kerẹewe lai jamaatẹ̌e sụsasuměllung si Kristus kerene lai su patikụ munara e manga wawine e harusẹ̌be sụsasuměllung su kawinge.
25I kamene manga esẹ e, kẹ̌kěndagẹ̌beng kawing i kamene e, kerẹwe lai i Kristus kụkěndagu jamaatẹ̌ dingangu nẹ̌těngkaonggọu watangeng'E waugu jamaatẹ̌ e.
26I Kristus nẹ̌koạ kerene e tadeạu i Sie makapamurẹ̌sing jamaatẹ̌ e ringangu těntiron'E bọu akẹ sahani e, tadeạu samurine i Sie makapěnarakangu patikụ ene su Ruata.
27Ringangu ral᷊enge kerene i Kristus e niapararisị u jamaatẹ̌ mawantugẹ̌ dingangu tawẹ sangkural᷊ange su těngon'E, tawẹ turạ e arau tawẹ sungkal᷊ene apa-apa.
28Kerene wue lai manga esẹ e harusẹ̌ kuměndagu kawinge kerẹwe lai kuměndagu wadange sẹ̌sane. Manga esẹ kụ kụkěndagu kawinge mangal᷊ene i sie kụkěndagu watangenge hala e.
29(Tawẹu sarang sěngkatau taumata měbẹ̌binsịu ghẹ̌sine sẹ̌sane. Kaiso i sie mẹ̌pẹ̌padul᷊i ringangu mẹ̌děndiagạ kerẹewe i Kristus mal᷊aing mẹ̌pẹ̌padul᷊i jamaat'E.
30I kitẹ masingkạu ene, ual᷊ingu i kitẹ e kai laesu wadang i Kristus.)
31Su ral᷊ungu Winohẹ Susi e kạbawohẹ, "Kai ene hakịu esẹ e kai měněntang i amange ringangu i ninange kụ mẹ̌těngkatakidẹ̌ dingangu kawinge kụ irẹ̌dua e makoạ sěmbaụ."
32Ayetẹ̌ ini e piạ mangal᷊ene maral᷊ung. Kụ pituaku e tangu al᷊ingkai mạanung kal᷊ahěmpukang i Kristus dingangu jamaatẹ̌.
33Arawe ayetẹ̌ ene e mal᷊aing piạ kal᷊ahěmpukange ringang i kamene: Kụ i kamene manga esẹ sěngkatau-sěngkatau e pasịkěndagu kawinge kerẹewe lai i sie kuměndagu watangenge sẹ̌sane ringangu i kamene manga wawine sěngkatau-sěngkatau e kěnangko pẹ̌tawakal᷊i měngadatẹ̌ kawinge.