Dual Panel1Kai iạ e hinong manahuntěngadẹ̌ u karěngụ u sěngkatau taghuang pusakạ e reng darodọ, ute hinong piạ taumata měnẹ̌nahimata si sie ringangu mangurusẹ̌ haghin pandungange sarang i sie makakaratingu umure kụ tinantung amange. I sie i kěkoạ mẹ̌sul᷊ungu sěngkatau ěllang manịeng i sie tuhụ hinone kawe taghuangu patikụ arětạ ene.
2(4:1)
3Kerene lai ringangi kitẹ: Karěngụ u i kitẹ deng ta nạtěllang, i kitẹ nịkakoạ ěllangu manga rohkẹ̌ apan mạngawasa dunia ini.
4Arawe su tempone mapia, Ruata e rimoloh'u Ahuse sarang dunia. Ahuse ene niwantelu, sěngkatau wawine kụ nẹ̌biahẹ̌ su ral᷊ungu kawasan toratẹ̌.
5Ual᷊ingu ene, i Sie napakal᷊iwiru manga taumata měbẹ̌biahẹ̌ su al᷊ungu kawasan toratẹ̌; tadeạu i kitẹ lai makoạbe manga anạ u Ruata.
6Ual᷊ingu i kamene kai manga anạ u Ruata, Mawu Ruata rimolohu Rohkẹ̌ u Ahus'E mapasuẹ̌ su ral᷊ungu naung i kamene ringangu naungku, kụ Rohkẹ̌ ete měkẹ̌kui, "Amang, oh Amangku."
7Kutẹu, i kamene semben bal᷊ine lai ěllang, kaiso kawe anạ. Kụ ual᷊ingu i kamene kawe anạ u Ruata ute Ruata e sarung měgěllị u patikụ sạbarang apan nisadian'E waugu manga anạ'E.
8Kangerẹ i kamene wẹ̌gan Duata, ene hakịu i kamene nakoạ ěllangu manga kawasa kụ lẹ̌ěnang kere mahang duata, kai tumuhụ hinone wal᷊inewe Ruata kahěnga-hěngang.
9Arawe orasẹ̌ ini e i kamene seng masingkạ u Ruata, arau limembo l᷊ain kapiange Duata e masingkạ i kamene. Kụ unụ e i kamene saụbe lai mẹ̌sul᷊e su manga rohkẹ̌ u dunia ini apan lome ringangu kasiang? Unụ e i kamene mapulu saụ ipẹ̌tahuěllangu manga rohkẹ̌ ene?
10I kamene měsẹ̌sěmpị be manga ěllo sahị, manga wul᷊ang sahị dingangu manga taung sahị.
11Iạ gụgěnggang, kiwuạ u pẹ̌tatěngkasaghedẹ̌ku waugi kamene tạ pul᷊ise apa.
12Manga anạ u sěmbaụ! Iạ mědẹ̌dorong sěngapam botonge tadeạu i kamene makoạ kere iạ. Ual᷊ingu iạ mal᷊aing seng nakoạ kere i kamene. I kamene tawe němpẹ̌koạbe sal᷊a manga apa su těngoku.
13I kamene tantu reng makạtahěndung kai apạ e nakariadi si siạ dokeng tẹ̌tạe nakapěhabaru Injilẹ̌ e si kamene. Batụu kai ual᷊ingu iạ nasakị.
14Su tempo ene i kamene tawe narěntingu iạ, maningbe kakakoạu wadangkue nakoạ sasal᷊ukạ masaria si kamene. Kaiso i kamene němpanarimạbeng iạ tabidạen němpanarimạ u malaekatu Mawu arau kere němpanarimạ i Kristus Yesus sẹ̌sane.
15I kamene měngkawe apa maral᷊uasẹ̌ kahěngang su tempo ene. Arawe ini ute kai suapạ e karal᷊uasẹ̌ ene? Iạ masingkạ u su tempo ene i kamene mambeng mapulu měmpělěsạ matang kamene hala mědeạu onggotang si siạ, kereu ene wotonge ikakoạ.
16Apa i kamene ini seng mẹ̌tẹ̌tiněnnang iạ kere sědụ, ual᷊ingu iạ mělẹ̌lahẹu katěngadẹ̌ si kamene?
17Manga taumata wal᷊ine ene měngkate makěhagẹ̌ měmpẹ̌deạ si kamene, kutẹu manga timonan sire kawe ral᷊aị. I sire kětạeng mapulu maměsụ pẹ̌kakauhi kamene ringangi kami, tadeạu i kamene tumol᷊e si sire ringangu kakakěhagẹ̌.
18Apạewe mapia, lombangeng su ral᷊ungu manga hal᷊ẹ̌ mapia, asal᷊ẹ̌ měngkate kerene kụ abe kawe kětạu kamageng iạ ene ringangi kamene.
19Manga anạku ikẹ̌kěndagẹ̌! Iạ orasẹ̌ ini nakapěndang matědụ ual᷊ingu i kamene. Iạ natatědụ kere sěngkatau wawine matědụ su tempon pamamantelu rariọ. Iạ měngkai masunsara, kereu kakakoạ i Kristus wẹ̌dang ta nạsuang su ral᷊ungu watangeng i kamene!
20Iạ měngkate měkẹ̌karimangu mapulu ene sutal᷊oarang kamene ini, mědeạu iạ makapẹ̌bisara si kamene ringangu tingihẹ̌ bal᷊ine, ual᷊ingu iạ seng běga měnsang mẹ̌koạ apa lai ringangi kamene.
21Manga anạ u sěmbaụ apan mapulu mẹ̌biahẹ̌ su al᷊ungu kawasan toratẹ̌, kěnang pẹ̌daringihẹ̌ si siạ! Iạ sarung měhabarẹ̌ si kamene apang hinone mạbawohẹ su ral᷊ungu bukẹ̌ u Torati Musa.
22Sene mạbawohẹ u i Abraham piạ anạ e ruang katau: I ninang anạ e sěmbaụ kai sěngkatau ěllang, arawe i ninangu anạ bal᷊ine e taumatawe wal᷊ine ěllang.
23Anạ u wawine nakoạ ěllange piněhěndingbe su kapulun taumata. Arawe anạ u wawine wal᷊ine ěllange, naiwantelẹ̌ ual᷊ingu nịkakědon Duata.
24Ini wotonge ipakẹ makoạ papinintu. Bawine ruang katau ene, kai tabidạu papinintun kẹ̌do rarua; sěmbaụ e wọu Wul᷊udu Sinai -- ene e kai i Hagar; manga anạ e piněhěnding kere ěllang.
25Kụ i Hagar ene kai Wul᷊udu Sinai su ěntanang Arabẹ̌. I sie mělẹ̌lahẹ u soang Yerusalem dingangu kal᷊awọu tumanạ e orasẹ̌ ini seng nakoạ ěllang.
26Arawe Yerusalem su sorga ene kai Yerusalem nal᷊iu kụ i sie kai i ninang i kitẹ.
27Batụu su ral᷊ungu Winohẹ Susi e mạbawohẹ, "Pahul᷊uasẹ̌ i kamene manga wawine kụ tawe nẹ̌hanạ! Pahul᷊iagẹ̌ dingangu pẹ̌tahimokoi ei kamene ta makapěndang kal᷊iking bawine měhěnding! U wawine tiněntangu kawinge makareạ anạ limembong kal᷊awọe wọu wawine měbẹ̌biahẹ̌ dingangu kawinge."
28Manga anạ u sěmbaụ! I kamene hala kai manga anạ u Ruata nipěhanạ ual᷊ingu kẹ̌don Duata; i kamene mẹ̌sul᷊ung'i Ishak.
29Su tempo ene anạ piněhanạ su kapulun taumata, mạnumbiagẹ̌ anạ piněhanạ ual᷊ingu kapulun Rohkẹ̌ u Ruata. Kerene lai orasẹ̌ ini.
30Kai apa wue mạbawohẹ su ral᷊ungu Winohẹ Susi? Sene mạbawohẹ kere ini: "Tokol᷊ẹ̌ko ěllang bawine ene ringangkewen anạ e, watụ u anạ u tau wawine ěndaịe sarung tawe makapěmusakạ dingangu anạ u tau wawine kụ bal᷊ine ěllange."
31Kụ manga anạ u sěmbaụ i kitẹ ini e wal᷊inewe manga anạ bọu sěngkatau ěllang bawine; i kitẹ e kai manga anạ bọu wawine nal᷊iwirẹ̌ e.