Alkitab Mobile SABDA
[VER] : [SANGIR]     [PL]  [PB] 
 <<  Galatia 6 >> 

1Manga anạ u sěmbaụ kereu pẹ̌sěngkatau ikẹ̌katangkạ měkẹ̌koạ dosa ute kěnangko, i kamene apan mẹ̌bẹ̌biahẹ̌ tụtuhụ Rohkẹ̌ u Ruata, mamihing tau ene pẹ̌sul᷊e su ral᷊eng mapia. Kụ i kamene harusẹ̌ mẹ̌koạ ene ringangu kasasikome kụ diagate kumbahang sarang i kamene hala mal᷊aing kasal᷊ukateng.

2Kěnangko i kamene měmpẹ̌sasumbala měmamasaěng bawawaěngu tau, tadeạu ual᷊ingu ene ute i kamene tụtuhụbe laorong Kristus.

3Kereu pẹ̌sěngkatau mạngěnna u watangenge kawe kapiange, sěmbal᷊iau tala wue, ute tau ene mạngakal᷊ẹ̌ batangenge hala.

4Sěngkatau-sěngkatau pasịbanikạ batangenge hala měnsang kakanoạ e mapia arau ral᷊aị. Kereu mapia, i sie wotonge makapěndang lumesạ u hal᷊ẹ̌ ene. Kai semben tawahal᷊uasu isihinge su apang kẹ̌koatengu taumata wal᷊ine.

5Batụu sěngkatau-sěngkatau hinong masịpasaěng bawawaěnge hala.

6I saing manarimạ u těntirong Kristus, kěnang pamahiạ dingangu mananěntirone kěbị apan mapia si sie.

7Kumbahang be kaakal᷊eng. Duata e tawe ikapẹ̌tataghunalang! Apan niasị e ene lai ikapěnsạ e.

8Kamageng i sain měngasị tuhụ kakanoạ u taumatane, i sie sarung maměnsạ u papate wọu kakanoạ e ene. Arawe kereu i sie měngasị tuhụ l᷊aahạ u Rohkẹ̌ u Ruata, i sie sarung maměnsạu pẹ̌bawiahẹ̌ tutune wọu Rohkẹ̌ u Ruata.

9Ual᷊ingu ene, kumbahang i kitẹ masahe mẹ̌koạ manga hal᷊ẹ̌ mapia; u kamagengu i kitẹ tawe měngẹ̌do mẹ̌koạ manga hal᷊ẹ̌ ene, sěnsul᷊e tempo i kitẹ sarung maměnsạ buane.

10Kụ, karěngụewem piạ loahe si kitẹ, ute kěnangko i kitẹ mẹ̌koạ mapia su kěbị taumata, napal᷊iụ e su manga anạ u sěmbaụ i kitẹ tamba pangangimang.

11Kakěllako pakapia-pia bageang ini takụ niwohẹ sẹ̌saku ringangu hurupe gaghaghuwạ.

12Manga taumata kụ makịdarumalo ringangu manga hal᷊ẹ̌ u ghěsi, i sire e mẹ̌tẹ̌tatẹ̌tehẹ̌ manihasa si kamene tumuhụ atoru pẹ̌sasasunatẹ̌. Arawe i sire měmpẹ̌kẹ̌koạ ene kẹ̌taeng tadeạu i sire tawe tumbiagengu tau Yahudi ual᷊ingu kuruisi Kristus.

13I sire apan tụtuhụ pělatorangu sunatẹ̌ mal᷊aing tawe měndal᷊engu toratẹ̌. Kai i sire mapulu i kamene ipakisunatẹ̌, tadeạu i sire makal᷊esạ u i sire matuhụ su pělatorang ene.

14Kai iạ měngkatewe mạdiri lumesạ u apa, tumbạewen Mawung kitẹ Yesus Kristus seng napohong nikuruisẹ̌. U watụ u i Sie kawe seng napohong nikuruisẹ̌ ute dunia e tawẹ lai mangal᷊ene apa-apa si siạ. Dingangu sutěngon dunia ini, iạ mal᷊aing tabidạu seng nate.

15Nisunatẹ̌ arau tawe nisasunatẹ̌ ene wal᷊inewe kahumotongange. Kahumotongange ute kai makoạ taumata wuhu.

16Su taumata apan mẹ̌bẹ̌biahẹ̌ dingangu sipirange ene, kụ kerene lai waugu patikụ umat'u Mawu, iạ mělẹ̌harapẹ̌ Duata sarung mangonggọ u pẹ̌darame ringangu tatal᷊ẹ̌ntụ'E.

17Mase, kumbahang delaing piạ u sarang sěngkatau makasusa si siạ, batụu su wadangku piạ manga tatialan iạ kai tumatol᷊e si Kristus.

18Milumbạko Mawung kitẹ i Yesus Kristus měngal᷊amatẹ̌ manga anạ u sěmbaụ. Aming. Adat'i kami, Paulus


  Share Facebook  |  Share Twitter

 <<  Galatia 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran