Dual Panel1Nạung su tempo kal᷊amona masau susul᷊ene Mawu Ruata e mělẹ̌hengetang su manga i upung i kitẹ e pinakiwerane su manga nabi e ringangu haghing kakakoạ e.
2Arawe tempo samuri ini e i Sie mělẹ̌hengetang si kitẹ e limiung Ahus'E. Limiung Ahus'E ini e Ruata něndiadi langị dingangu dunia patikụ. Dingangu Mawu e seng napakasahẹ u Ahus'E ini e mal᷊aing kawasa managhuang patikụ.
3Kụ kai i Sie makạsarěnsangu kawawantug'u Ruata e sụsěnnang. I Sie kai awẹ u Ruata sẹ̌sane. Kụ kawe mal᷊aing i Sie měpẹ̌padul᷊i kal᷊ahěmpukang u dunia ini e ringangu hengetang'E makawasa. Bọuten i Sie nakakariadin taumata e mal᷊iwirẹ̌ bọu kal᷊awọu rosan sire e tangu, i Sie naintol᷊angke su kaderang paparentaěng su Sorga sěngkakaintol᷊ang dingangu Mawu Ruata, Mangangawasa Karangetange.
4Ahusẹ̌ ene nakaěbạ kal᷊aianenge limembom marangẹ bọu malạekatẹ̌, dingangu areng nionggọ u Ruata si Sie mal᷊aing limembom maadatẹ̌ bọu areng nionggọ su malạekatẹ̌.
5Tawẹu sarang sěnsul᷊e Duata e něhengetang kere ini sarang l᷊ai su sěngkatau malạekatẹ̌, "I Kau e kai Ahusẹ̌-Ku; su sěhěllo ini e Iạ makoạ i Amang'U." Tawẹ lai Mawu Ruata e něhengetang kere ini mạanun malạekatẹ̌ balạewe měnsang sude lai, "Iạ e sarung makoạ i Amang'E, dingangu i Sie sarung makoạ Anạ-Ku."
6Kai su tempon Duata e něndoloh'u Ahus'E kaiakanenge sol᷊ong dunia ini, Mawu Ruata e něhengetang kere ini, "Kal᷊awọu malạekatẹ̌ e hinong mẹ̌suba Ahusẹ̌ ene."
7Mạanụeng manga malạekatẹ̌ e Mawu Ruata e něhengetang kere ini, "Duata e napakariading manga malạekat'E e nakoạ anging, dingangu manga mẹ̌tatangkiang'E nakoạ děllị u putung."
8Arawe su Ahusẹ̌ ene Ruata něhengetang, "Kararatuang'U, e Mawu, kai kakalẹ̌ sarang karěngụe! Kararatuang'U e kai kararatuang maadilẹ̌.
9I Kau e puluang bue su kạadilẹ̌, dingangu měbẹ̌binsị u apan tawẹ katul᷊ide; kụ kai ene hakịu Ruata, Ruatan'U e, němile si Kau ringangu něngonggọ kal᷊aadatẹ̌ si Kau kụ makạkaděntan dal᷊uasẹ̌, nangělembo wọu manga hapị'U."
10Duata e mal᷊aing něhengetang, "I Kau e, Mawu, kụ nạung su tětạ e něndiadi dunia, ringangu i Kau sẹ̌sanu nẹ̌koạ l᷊angị.
11Patikụ ene sarung maparung, dingangu matěbe kere lakụ; arawe i Kau e mang tạ pěbawal᷊uine.
12Kaguwạu dunia ini e sarung ipẹ̌dal᷊ěkun'U kere lakụ, kụ hědọ e sarung i Kau pěngawengu wal᷊ine. Arawe i Kau e mang těbe kerene, ringangu pẹ̌bawiah'U e tawẹ kahěpusange."
13Mawu Ruata e tawe kadiongeng něhengetang su sarang lai sěngkatau malạekatẹ̌ u, "Kaiangke su koaneng-Ku, sarangkewe manga rumarokạ si Kau e Takụ ipakaěnsu su těngon'U."
14Mạeng kerene, kai i sai wue tangu manga malạekatẹ̌ e? I sire e kai manga rohkẹ̌ kụ mẹ̌tẹ̌tangkiang Duata, ringangu irẹ̌doloh'u Ruata tadeạu ipẹ̌tul᷊ung si sire apan sarung manarimạ u kasasal᷊amatẹ̌.