Dual Panel1Tangu piạ sěngkatau esẹ arenge i Ananias. I sie ringangu kawinge arenge i Safira, nẹ̌bal᷊ụ u winal᷊aeng sěngkamonaěng bọu rarotong i rẹ̌dua.
2Doitu wọu nahumbal᷊ụ e sěnggạ e nitaghuaneng i rẹ̌dua, arawe sěnggạete wue nịtatonda su anun manga rarolohang. I sie nẹ̌koạ kerene ual᷊ingu pinẹ̌gaghighilang i rẹ̌dua sěngkawingang.
3Tangu i Petrus e nẹ̌berạ e si sie, "Ananias, unụe i kau napakawalan setang nẹ̌kawasa ral᷊ungu naungu napẹ̌konting kau su Rohkẹ̌ u Ruata e kụ němuni arěgang binal᷊aeng e sěnggạ?
4Ěntana ene tangu i kau taghuange mangawe tawe niwal᷊ụ. Kutẹu sarang ěntana ene seng nawal᷊ụ kai roite wědang i kau mananaghuange. Kai unụe piạ kapulunu nẹ̌koạ kerene? Kai wal᷊inewe taumata kẹ̌kontiangu e, kaiso kawe Mawu!"
5Sarang i Ananias nakaringihẹ̌ bawera ene tangu i sie měngkatewe nawatang apidu naminsul᷊u singongone. Kụ kěbị apạewen nakaringihẹ̌ kakakoạ e mangkewen něngkatakụ.
6Tangu manga laumbaseng nahunděnta kụ němpamikung badang i Ananias mase nịsasẹ̌bang kụ lěbingang i sire.
7Mangawe těllung kaorasẹ̌ nal᷊iung ene, kawinge nasuẹ̌. I sie wěga wue apa wuhu nariadi.
8I Petrus e nẹ̌bera si sie, "Kěnangko paul᷊i si siạ: binal᷊aeng niwal᷊ụ i rua sěngkawingang e, kere ini kal᷊awọu arěgane?" "Kahěngang, ene arěgane," angkuěngu kawing i Ananias.
9Mase i Petrus nẹ̌bera si sie, "Unụe i rua sěngkawingange němpẹ̌gaghighilẹ̌ manal᷊ukạ Rohkẹ̌ u Mawu e? Daringihẹ̌ko! I sire apang bọu němpẹ̌lěbingu kawingu e seng něngkawal᷊ị. I sire mal᷊aing sarung měhengkẹ i kau sarang l᷊ikude."
10Orasẹ̌ ene lai kawingi Ananiasẹ̌ e naěnsạ dingangu nate su těngon Petrus. Kụ piạ e manga laumbaseng e nasuẹ̌, ute i sire e nakahombangke si sie seng nate. Kụ bọu ene i sire nělintụeng bal᷊unangu wadang e sarang likude kụ nilěbing su sěndihangu kawinge.
11Tangu kěbị apan taumata mạngimang e dingangu l᷊ai taumata wal᷊ine e apan nakaringihẹ̌ hombang ene, něngkatakụ.
12Kahian pẹ̌tatangkiangu manga rarolohang e měngkai lawọ tanda makạl᷊aherang dingangu mangạ e hal᷊ẹ̌ makạdal᷊inaụ tạ sihinge mạdiadi sutal᷊oarang taumata l᷊awọ e. Kụ i sire kěbị taumata mạngimang e měngkai sěngkanaung němpẹ̌tampung su Gandaria'n Salomo su ral᷊ungu Wal᷊em Mawu.
13Dingangu taumatan l᷊ikude tawẹu wahani ruměnta mẹ̌tampung dingangi sire. Kai taumata mạngimang e měngkai lẹ̌adateng u kawanua.
14Kụ kakạděngụe kapạhuntinambane kal᷊awọu taumata mạngimang su Mawu e -- baewe esẹ arau baewe lai wawine.
15Něngalembọ e kakakoạ e seng kerene, hakịu masasakị e ipẹ̌pěllọ su manga ral᷊okaěng arau těpihẹ̌, su wěntan dal᷊eng, tadeạu i sire manịeng kětạeng kěngkaung Petrus, kai rembeng kahinoěnge kereu i Petrus sumahe sene.
16Taumata e měngkate měgẹ̌giuma mạhunděnta wọu kal᷊awọu soa mạngělikụ Yerusalem. I sire měmpẹ̌bẹ̌bawa apang masasakị dingangu apang bẹ̌bantiangu rohkẹ̌ dal᷊akisẹ̌ e kụ i sire mạsue měngkạul᷊e.
17Pěngěnsueěnge imang mawantugẹ̌ e ringangu kěbị manga wihinge wọu komol᷊angu tau Saduki e nanětạ e nẹ̌kakanoạ, ual᷊ingu sasingking.
18Manga rarolohang e nisamẹ kụ bọu e nitahungkụ su wal᷊eng tahungkụ u wanua.
19Arawe nahěbi e, piạ sěngkatau malaekatẹ̌ e nanope manga tukadu tahungkụ, kụ napasěbangu manga rarolohang ene e sol᷊ong l᷊ikude. Malạekatẹ̌ e nẹ̌bera su manga rarolohang e,
20"Dakọe pahundarisị su Wal᷊em Mawu ringangu pěhabarẹ̌ su apan taumata hal᷊ẹ̌u pẹ̌bawiahẹ̌ buhu ini e."
21Tangu manga rarolohang e mal᷊aing timuhụ tatanatang malạekatẹ̌ e. Deng mal᷊uka-l᷊ukadẹ̌ i sire něngkakoạ sol᷊ong Bal᷊em Mawu e, kụ nanětạ e naněntiro sene. Ene nạung imang mawantugẹ̌ e ringangu manga murite narěntạ e, kụ něndal᷊engkeng hal᷊ẹ̌ u pẹ̌gaghuta e ringangu manga těmbonangu tau Yahudi. Bọu ene i sire něndolohu taumata apạněbang u manga rarolohang bọu ral᷊ungu tahungkụ apětẹ̌těngon sire.
22Kai piạ i sire nirolohẹ̌ ene e nahumpạ e su tahungkụ, i sire tawe nakaěbạ manga rarolohang ene e sene. Kụ i sire němpẹ̌bal᷊ị, bọu e nělaporu hal᷊ẹ̌ ene su měnggaghuta e.
23"Su tempong i kami nasongo su tahungkụ e," ungkuěng i sire su měnggaghuta e, "kinaẹ̌bakeng i kami e sěngkakakěllane tukad'u tahungkụ e mạpapal᷊e mapia-pia, dingangu apạ eweng měndariagạ e, měmpělẹ̌lukadẹ̌ su tukadẹ̌. Ene tukadẹ̌ e nitopẹeng kami e, i kami tawe nakasilo taumata sarang kạdiongeng sěngkatau su ral᷊unge."
24Su tempọeng těmbonangu l᷊ukadu Wal᷊em Mawu ringangu manga imang těmbonange, nakaringihe habarẹ̌ ene tangu, i sire měngkatewe nẹ̌bingọ u manga rarolohang ene ringangu něngkatakụ u měnsang kai apạ e mariadi.
25Bọu ene narěntạ e sěngkatau esẹ nakawawa habarẹ̌ ini, "Daringihẹ̌ko! I sire apang nitahungkụ i kamene apang manga mawu e orasẹ̌ ini e seng kapẹ̌něntirone taumata l᷊awọ su ral᷊ungu Wal᷊em Mawu!"
26Tangu, těmbonangu měndal᷊ukadẹ̌ Bal᷊em Mawu e ringangu mangạewe lukade tamai něngal᷊ạ si sire manga rarolohange kapia. Kai i sire tawe něngal᷊ạ u wuntal᷊ẹ̌, batụu i sire kai mạtakụ u taumata l᷊awọ; mạdiring taumata l᷊awọ e měmpěngěntung u watu si sire.
27Ene manga rarolohange niapasuẹ̌ nẹ̌těngong manga měnggaghaghuta e. Bọu e imang mawantugẹ̌ e něnanẹ̌sui si sire.
28I sie nẹ̌bera, "I kami e seng nẹ̌sěding i kamene kereng kasẹ̌gade, tadeạu kumbahang bue maněntiro mẹ̌běkeng tau ene. Kaiso kakěllạ e apa nikoạ i kamene! I kamene něnawuhu těntirong kamene e napěpidẹ̌ su kaguwạu Yerusalem, kutẹu i kamene saunengke lai nanoke u kai i kami nakakoạ aị u Tau ene nate."
29I Petrus dingangu manga rarolohange wal᷊ine e simimbang, "I kami e hinong tumuhụ Duata wal᷊inewe kawe tumuhụ taumata.
30Mawu Yesus kụ nighantong i kamene e seng niapẹ̌biahẹ̌ kapia wọu kapapohonge kahian Duatang i upung i kitẹ e.
31Dingangu Mawu Ruata e sen něngonggọ si Sie kal᷊aianeng dingangu kawasa marangẹ kere Pangahạe ringangu Měnanal᷊amatẹ̌ e, tadeạu tau Israel gěllirang'u l᷊oahe mědeạu mětobatẹ̌ bọu kal᷊awọu rosan'e ringangu makahombang kal᷊aampung.
32I kami e kai mẹ̌sasahidin patikụ ene e -- kerẹewe i kami e ringangu l᷊ai Rohkẹ̌ u Ruata e kụ seng nionggọ su taumata apan tụtuhụ parentan'E."
33Ene manga Měnggaghuta Agama nakaringihe ene, i sire měngkate apa limangehẹ̌, kụ i sire sěngkanaung měmate manga rarolohang ene.
34Kaiso wọu tal᷊oarang měnggaghuta ene piạ sěngkatau Farisi isěsẹ̌ba si Gamaliel. I sie mananěntiro agama limembon lẹ̌adateng u kěbị taumata. Ene i sie rimarisị e kụ nangorọ e taumata nakisěbang u manga rarolohang e kadodọ tempo.
35Bọu e i sie nẹ̌berạ e su manga Měnggaghuta Agama e, "Manga anạ u sěmbaụ tau Israel! Pěmpẹ̌tiněnnako pakapia-pia waugu apang sarung koateng i kamene si sire ini.
36Batụ u nạung piạ u wọu liměto i Teudas, mạnodẹu uade i sie kai taumata masěllahẹ̌ hakịu kai manga ěpạ u hasụ su kataune taumata e tụtol᷊e si sie. Kutẹu i sie kai nipate ringangu patikụ bihinge němpẹ̌sal᷊iawuhẹ̌, kụ seng tawẹ kakanoạ e.
37Tuhụe su tempong pẹ̌dararol᷊ẹ̌ ene, siměpụ ko l᷊ai i Yudas tau Galilea e. Ual᷊ingu wawitauge, mal᷊aing lawọ taumata němpẹ̌tol᷊e si sie. Kaiso i sie mal᷊aing kinapate, ringangu kěbịewe apan tumatol᷊ene nasue nasal᷊iawuhẹ̌.
38Kụ ini e wue ute ual᷊ingu hombang ini, těguku tangu: abe kapurai i sire ini, balạe kere i sire. U kereu těntiro ringangu kakanoạ i sire ini e kawe wọu taumata, tangu těntiro ringangu kakanoạ ene e sarungbe mapaghohẹ̌.
39Kai kereu ene rarěntane kai wọu anun Duata e, tangu i kamene tawe makawatạ si sire. Katewe aramanung sarung mal᷊ahẹ u i kamene rumokạ Mawu Ruata e." Sasal᷊ěntihọ i Gamaliel ene e nitarimạ u měnggaghuta e.
40Tangu manga rarolohang e nikuiang, bọu e nigheserẹ̌ masene nisěding u kumbahang mẹ̌saụ maněntirong habar'u Mawu Yesus. Bọu ene wuhụewe i sire pinakipěllọ.
41Manga rarolohang e němpěněntangu Pěnggaghutaěngu Agama e kạpahul᷊uase su Mawu Ruata e seng něngěnnau i sire e hinone wue makahombang lahinakang ual᷊ingu i Yesus.
42Kụ apang kal᷊aěllo e su Wal᷊em MAWU arau su apang bal᷊eng taumata e, i sire mang těbe kạpaněntirone ringang'u mělẹ̌habar'u Injilẹ̌ mạanun Yesus u kai seng i Sie e Ratu Měnanal᷊amatẹ̌ e kụ seng nikědọ e.