Alkitab Mobile SABDA
[VER] : [SANGIR]     [PL]  [PB] 
 <<  Matius 21 >> 

1Kakạsandigeng Yerusalem tangu, i sire nahumpạu Betfage su Wukid'u Zaitun. Sene Mawu Yesus dimolohe murit'E ruang katau piněngal᷊imona.

2"Dakọko sol᷊ong kampong su těngone pai," tatanatan Mawu Yesus si rẹ̌dua. "I kamene apid'u makasilo kalide sěmbaụ mạl᷊aikị ringangkeweng anạe. Lukako kalide ene kụ ahạ damahi.

3Kereu piạ taumata makiwal᷊ong sạbarang ute, pẹ̌bera su tau ene, 'Kai Mawu měgẹ̌gausẹ̌ e,' tangu tau e měngkatewe lighạ napakawalang kalide ene pakiwawa."

4Kerene katataingu hal᷊ẹ̌ ene tadeạu misěhụ kere pinẹ̌beran nabi, u,

5"Pěhabarẹ̌ko su Sion, Datunu seng kạděntane su anunu. I Sie měngkate masanạ naunge kụ i Sie simake su kalide, kụ kai sěmbaụ anạ u kalide, kụ deng bědang kawuhuang."

6Bọu e murit'E rarua e němpẹ̌tamaịe kụ němpẹ̌koạe kerẹewe nioron Mawu e si rẹ̌dua.

7I rẹ̌dua němpẹ̌bawa kalide e ringangu anạe. Mase pal᷊ukang kalide e niěmpahengu kakingkaeng i rẹ̌dua e. Kụ Mawu Yesus simakẹ e.

8Taumata sěmbuntuang sene e němpamilạe manga kakingkaeng i sire su ral᷊eng, arawe sěnggạ ute měmpaněntọe manga lelang u kalu e kụ niantehe su tal᷊oaran dal᷊eng.

9Taumata měgẹ̌gapaěng kạdal᷊enge su těngo ringangu su l᷊ikud'i Yesus e kạpěbẹ̌bansage u, "Biahẹ̌ Ahus'i Daud! Al᷊amatẹ̌ e mahundingang i Sie kụ dụděnta su ral᷊ungu arengu Mawu! Pẹ̌daloko Mawu Ruata Su Marangẹ!"

10Ene, sarạeng Mawu Yesus sụsuẹ̌ e su Yerusalem, sěngkasoaěng e měngkatewe mẹ̌gẹ̌gahẹ̌, "Kai i sai ini?" angkuěngu taumata su soa ene.

11"I Sie kai Nabi i Yesus, bọu Nazaret su Galilea," angkuěngu taumata l᷊awọ měmpạhuntaking si Yesus.

12Bọu e Mawu Yesus simuẹ̌ e su Wal᷊em Mawu, kụ nanokol᷊ẹ̌ patikụ taumata apang měmpẹ̌bẹ̌bawělli sene. I Sie namal᷊intuị manga meda'm mananal᷊iu roitẹ̌ dingangu kakaianeng u mẹ̌bawal᷊ụ paluma.

13Mase i Sie něhengetang si sire u, "Su ral᷊ungu Winohẹ Susi e kạbawohẹ u Mawu Ruata e kai něhengetang, 'Bal᷊e-Ku e sarung isěbạ bal᷊e pẹ̌kakal᷊iomanengang.' Kutẹu kahiang kamene kawe nịkakoạ baes'u tahapěhampasẹ̌!"

14Ene piạ e manga tau wuta ringangu peosẹ̌ nahunděnta su anung Yesus su Wal᷊em Mawu, kụ i Sie napakapian sire.

15Arawe manga imang těmbonange ringangu mananěntirong agama němpẹ̌pědu nakasilo manga hal᷊ẹ̌ makạdal᷊inaụ kẹ̌koateng i Yesus. Naung i sire naral᷊akị lai ual᷊ingu nakaringihẹ̌ manga rariọ měmpẹ̌gẹ̌gio su Wal᷊em Mawu, "Kaumburẹ̌ Ahus'i Daud!"

16I sire němpẹ̌berạe si Yesus, "I Kau e makạdingihẹ̌ apa iwẹ̌beran sire?" "Ore, Iạ makạdingihẹ̌," ungkuěng i Yesus. "Kai wědang ta nakạbasa i kamene Winohẹ Susi ini: 'Manga rariọ dingangu anạ deng sụsusu seng takụ nitěntiroěng kereapa mẹ̌berang daralo mapia?'"

17Bọu e Mawu Yesus naněntang i sire, kụ simẹ̌bang bọu soa ene sol᷊ong Betania, kụ něhědang sene.

18Sěngkariọěllone mal᷊uka-l᷊ukadẹ̌ kạpahundal᷊enge mẹ̌sul᷊e sol᷊ong soa, Mawu Yesus kai nahutung.

19I Sie nakasilo ara sěngkalu su wiwih'u ral᷊eng. I Sie himaungke kalu ene, kutẹu kai tawe nakahombang buane sarang manga kadiongeng sěmbaụ, tumbạewen daukalune sẹ̌sane. Mase Mawu Yesus nẹ̌berạe su kalu ene, "I kau e kumbahang delaing mẹ̌bua!" Apid'u nahẹ̌guete kalu ene.

20Tangu, sarạeng manga murit'i Yesus nakasilo hal᷊ẹ̌ ene, i sire měngkatewe apa něngkaherang, "Kawe kereapa hakịu kalu ene apid'u nahěgu kěbị?" i sire nakiwal᷊o.

21"Těngadẹ̌," angkuěng i Yesus, "kereu i kamene mangimang kụ tawẹ goẹ̌ e ute, i kamene makakoạ apan seng takụ nikoạ su kalu ara ini. Dingangu wal᷊inewe tumbạ ene lai, kaiso i kamene mal᷊aing makapẹ̌bera su wul᷊udẹ̌ ini, 'Kasapuạko kụ kateledẹ̌ su l᷊audẹ̌'; tangu hal᷊ẹ̌ ene sarung mariadi.

22Kụ apạewen dẹ̌dorongang i kamene su ral᷊ungu kal᷊iomaneng i kamene e, sarungbe ikatarimạ i kamene, asal᷊u i kamene měmpangimang."

23Bọu e Mawu Yesus nẹ̌sul᷊e sol᷊ong Wal᷊em Mawu, mase simuẹ̌ e kụ naněntiro sene. Ene i Sie kạpaněntirone, manga imang těmbonange ringangu matatimad'u tau Yahudi e kai himaung si Sie ringangu nakiwal᷊o, "Kai wọu kawasang apa i Kau makapěkẹ̌koạ patikụ ini e? I sai tangu nẹ̌gěllịu kawasa ene si Kau?"

24Mawu Yesus simimbang, "Iạ e mal᷊aing mapulu makiwal᷊o si kamene. Kụ kereu i kamene sumimbang bue ute, Iạ sarung mẹ̌bera si kamene u kai ringangu kawasan sai Iạ makakoạ manga hal᷊ẹ̌ ini.

25I Yohanes něnahani e kai ual᷊ingu kawasan sai tangu? Mawu Ruata arau taumata?" Mase manga imang těmbonange ringangu matatimad'u tau Yahudi ene nanětạe němpẹ̌sasinggata su tal᷊oaran lawọ i sire, "Kereu i kitẹ sumimbah'u, 'Ringangu kawasan Duata,' i Sie sarung mẹ̌bera, 'Mạeng kerene unụe i kamene tawe mangimang si Sie?'

26Kai kereu i kitẹ mẹ̌bera, 'Dingangu kawasan taumata,' ute i kitẹ e kai matakụben taumata l᷊awọe, u su naung i sire kěbịe i Yohanes e kai nabi."

27Tangu i sire simimbangke si Yesus u, "I kami e wẹ̌ga wue." Mase Mawu Yesus něhengetangke si sire, "Mạeng kerene Iạ e tawe lai měhabarẹ̌ si kamene u kai ringangu kawasan sai Iạ makapěkẹ̌koạ kěbị ini e."

28"Kụ kerea su pěndangeng i kamene su hal᷊ẹ̌ ini?" angkuěng i Yesus tuhụe. "Piạko matimadẹ̌ esẹ piạ anạe esẹ duang katau. I sie himaungke su anạe kaiakanenge kụ nẹ̌bera, 'Amang, dakọko pamunara su wael'u anggorẹ̌ e sahěllo ini.'

29'Mạdiri iạ,' angkuěngu rariọ ene. Kai wọu e i sie nẹ̌sasaul᷊e tiněnnane kụ nakoạ sol᷊ong bael'u anggorẹ̌ e.

30Bọu e matimadẹ̌ esẹ e himaung su anạe karuane, kụ mal᷊aing nẹ̌bera kerene. 'Kerenẹ e gaghurang,' angkuěngu anạ karuane e. Kaiso i sie tawe rimal᷊eng.

31Kụ bọu tal᷊oarang anạ darua ene, sudẹ e měkẹ̌koạ kapulung amange?" "Kaiakanenge," angkuěngu manga imang těmbonange ringangu matatimad'u tau Yahudi e. Tangu Mawu Yesus něhengetangke si sire, "Pangimangke: Manga maghaghělle pajakẹ̌ dingangu manga wawine tahapẹ̌sundal᷊ẹ̌ kai sarung makal᷊imona makoạ kawanuan Duata e wọu i kamene.

32Ual᷊ingu i Yohanes Měnanahani e riměnta kụ mělahẹ si kamene u kai kereapa mẹ̌biahẹ̌ kere ikẹ̌kapulu'm Mawu, kaiso i kamene tawe mangimang těntirone arawe manga maghaghělle bea ringangu manga wawine tahapẹ̌sundal᷊ẹ̌ e měmpangimang bue si sie. Kai manịeng i kamene sembeng makạsilo kěbị ene, kai i kamene mang ta nẹ̌sasaul᷊e ringangu tawe němpangimang su Mawu."

33"Pěmpẹ̌daringihẹ̌ko l᷊ai papinintu sěmbaụ ini," angkuěng i Yesus. "Nạung kai piạ sěngkatau taghuang ěntana nẹ̌suangkeng anggorẹ̌ su waelẹ̌. Baele nitěndakenge pinakal᷊ikụ, mase němangka l᷊ohange waug'u pěmaměhaěng u anggorẹ̌, mase napararisịu měnara pěndariagateng. Bọu ene i sie nakitamangu sasuange anggorẹ̌ e su manga měmamunarane, mase namundal᷊ẹ̌ sol᷊ong banua wal᷊ine.

34Sarạeng seng masandig'u tempon pananipo wuang anggorẹ̌ e, taghuang ěntana e rimolohen manga ěllange sol᷊ong anum měmamunara sasuange mědeạu iapanarimạ buane wahageange.

35Kutẹu manga měmamunara'n sasuange kai němpěnamẹ manga ěllangu taghuang bael᷊ẹ̌ e: Kụ sěngkataue nilimadẹ̌, sěnggạ pinate, arawe sěnggạe wue ute niěntungangu watu.

36Taghuangu waelẹ̌ saụewe rimoloh'u manga ěllange wal᷊ine, něngalembong kal᷊awọe wọu humotong. Kutẹu i sire mal᷊aing nikakoạ kerene.

37Nadehọ taghuangu waelẹ̌ e rimoloheng ahusẹ̌ esẹ e niapakakoạ sol᷊ong anun sire. 'Nal᷊ahẹu anạku e sarungbe adateng i sire,' angkuěngu naunge.

38Kai sarang měmamunara nakasilọe ahus'u taghuang baelẹ̌ e, i sire němpẹ̌berạe sěmbaụ su wal᷊ine, 'Enekụ ěndaị taghuange. Mahịe pateěngkeng kitẹ i sie, tadeạu i kitẹ makapěnaghuang pusakạe!'

39Tangu rariọ e nihěgọen sire, niwahung sul᷊ikude, mase pinate."

40Mawu Yesus nakiwal᷊ọe, "Ho, kereu taghuang bael'u anggorẹ̌ e ruměnta kạpia ute, kai pẹ̌kapuraěng e ngae manga měmamunara ene?"

41I sire němpẹ̌simbang, "Nal᷊ahẹu i sie sarung měmate taumata raral᷊akị ene mase makitamangu wael'u anggorẹ̌ e su taumata wal᷊ine apang měmpạngonggọbem buane si sie su tempone."

42Tangu Mawu Yesus něhengetangke si sire, "Kai wědang ta nakạbasa ngae i kamene mạbawohẹ su ral᷊ungu Winohẹ Susi e? 'Batu niwalan tukang e seng nakoạ batu kahumotongang e. Ini e kai munara'm Mawu; kụ enẹewe makạnaniang kal᷊ěnggihe!'"

43"Kụ pěmpẹ̌tahěndung," angkuěng i Yesus, "patikụ apan tẹ̌taghuanengu kawanuan Duata e sarung al᷊akeng bọ'i kamene kụ ionggọ su umatẹ̌ měděndal᷊eng u kapulun Duata.

44[I saing kụ maěnsạ su watu ene, sarung maral᷊umadẹ̌; kụ i saing kaěnsakengu watu ene, sarung mararul᷊ẹ kere awul᷊ẹ̌.]"

45Ene, sarạeng manga imang těmbonange ringangu tau Farisi e nakaringihẹ̌ papinintun Mawu Yesus ene, i sire nakaěnnạe u i Yesus kai měbẹ̌bisara mạanun sire.

46Kụ i sire němpẹ̌deạbe měhěgo si Sie. Kaiso i sire kai mạtakụ u taumata l᷊awọe, watụ u taumata l᷊awọ měngẹ̌ngěnnau Mawu Yesus kai sěngkatau nabi.


  Share Facebook  |  Share Twitter

 <<  Matius 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran