Dual Panel1Mase Mawu Yesus něhengetang su taumata l᷊awọ dingangu su manga murit'E angkuěng,
2"Manga mananěntirong agama ringangu tau Farisi e nakahombang kawasa waụg'u mělahẹ u tita'm Musa.
3Batụ u ene ute pěmpẹ̌sěmpị bue ringangu pěmpẹ̌tuhụ bue waug'u patikụ apang ipẹ̌parentan sire. Kai kumbahangbe měmpẹ̌těno kakanoạ i sire, u i sire tawe mẹ̌kakoạ apang itẹ̌těntiron sire.
4I sire měmpạnuntụewe manga hal᷊ẹ̌ mawawěhạ dingangu měmpangonggọu atorẹ̌ mawawěhạ, kai mang ta kadiongeng mẹ̌tul᷊ungu taumata tadeạu měmpẹ̌děndal᷊engu ene.
5Patikụ apang kẹ̌koateng i sire kětạeweng mědeạu pakịpandai su taumata. I sire mětẹ̌tatudẹ měpẹ̌pakẹ u wawěkise mawawěnahẹ̌ kereu měmpẹ̌kal᷊iomaneng dingangu mapakanandụ u humbung lakụ i sire.
6I sire papuluang su tampạ kahoroěnge su manga sal᷊iwang dingangu su manga kal᷊aianeng su těngone su ral᷊ungu manga wal᷊en pẹ̌kakal᷊ioamanengang.
7I sire puluang makịadatẹ̌ su manga pasarẹ̌, dingangu mal᷊uasẹ̌ kuiang 'Tuang Guru'.
8Arawe i kamene, abe kapulu kuiang 'i Tuang Guru', u gurunu e mang sěmbaụ kụ i kamene kěbịe kai anạ u sěmbaụ.
9Dingangu kumbahang i kamene kumui su sěngkatau su dunia ini 'Amang', u i Amang i kamene e mang sěmbaụ kụ kai i Amang su Sorga.
10Dingangu abe kapulu i kamene kuiang 'Měngangahạ', batụ u měngangahạ i kamene mang sěmbaụ kụ kai Ratu Mananal᷊amatẹ̌ seng nikẹ̌don Duata.
11I saing kasěllahenge su tal᷊oarang kamene, hinong kakoạ mẹ̌tatangkiang si kamene.
12I sai mẹ̌těngkarangẹu watangenge sarung iapakasanạ; arawe i saịewe mẹ̌těngkasanạ, sarung iapakarange."
13"Kaěngkěhang i kamene manga mananěntiro agama ringangu tau Farisi! I kamene taumata mẹ̌mělle. I kamene mạnahaghe taumata mědeạu makoạ dal᷊ohong jamạat'u Mawu. I kamene hala mạdiri makoạ dal᷊ohong jamạat'u Mawu, arawe wal᷊ine apam mapulu e, kahian kamene sahagheěng.
14[Kaěngkěhang i kamene manga mananěntiro agama ringangu tau Farisi: I kamene kai měmpẹ̌mělle. I kamene měngẹ̌ngakal᷊ẹ̌ manga wawine wal᷊u ringangu měmpělẹ̌hampasẹ̌ bal᷊en sire kụ mědeạu ipangambung kararal᷊aịe tangu i kamene měkẹ̌kal᷊iomaneng manandu-nandu. Suwụ u ene ute hukumang i kamene e sarung limembong kawěhạe!]
15Kaěngkěhang i kamene manga mananěntirong agama ringangu tau Farisi! I kamene kai tahapěmělle! I kamene rụdal᷊eng mararau mạmotọ l᷊audẹ̌, dingangu měmpạměpidẹ̌ banua mědeạu reng makasahionge sěngkatau makakasuẹ̌ agamanu. Kụ sarạeng tau e simuẹ̌ agamanu e ute i sie koateng i kamene ral᷊ohon naraka ruan sul᷊e limembong karal᷊akịe wọu'i kamene!
16Kạěngkěhang i kamene manga měngangahạ buta! I kamene měmpạněntirong ini, 'Kereu i sai mẹ̌salu su Wal᷊em Mawu e ute, saluwe tawẹ mangal᷊ene; kai kereu i sie mẹ̌salu su wul᷊aeng su ral᷊ungu Wal᷊em Mawu e ute i sie kạkakaịu salune ene.'
17I kamene taumata e wodokẹ̌ o kawe lai wuta! Sude l᷊imembong kapiane: bul᷊aenge arau Wal᷊em Mawu e makasusi wul᷊aenge?
18I kamene mạněntirong ini lai, 'Kereu sěngkatau mẹ̌salu ual᷊ingu pananěmbaěng, taumata ene tawe naikị su salune; arawe kereu i sie mẹ̌salu ual᷊ingu sasěmba su wowom pananěmbaěnge, i sie naikị kahian sasalune ene.'
19Kai wuta kaěllị i kamene! Sude limembong kapiange? Sasěmbane arau pananěmbaěng kụ makakoạ sasěmba ene masusi?
20Batụ u ene, kereu piạ u mẹ̌salu su pananěmbaěng, ene mangal᷊ene i sie nẹ̌salu ual᷊ingu kai su pananěmbaěng, měbẹ̌bawa kěbị apạewen mạpapěllọ su wowone.
21Kụ kereu piạ u mẹ̌salu su Wal᷊em Mawu, ene mangal᷊ene i sie měsẹ̌salu kurai su Wal᷊em Mawu e, kurai su Ruata mětẹ̌tumanạ sene.
22Dingangu kereu piạ u sěngkatau mẹ̌salu ual᷊ingu sorga, ene mangal᷊ene i sie měsẹ̌salu ual᷊ingu kararatuang u Mawu, dingangu ual᷊ingu Ruata kụ mạiang su kal᷊aianeng'E.
23Kạěngkěhang i kamene manga mananěntiro agama ringangu tau Farisi! I kamene kai tahapěmělle. I kamene měmpạngonggọu katahạpul᷊ong kapahiakengu salasi, pingkilẹ̌, dingangu pempasẹ̌ e su Mawu. Arawe manga hal᷊ẹ̌ kaghaghuwakenge su ral᷊ungu atorang u agama, kere manga: Kạadilẹ̌, pẹ̌kakakěndagẹ̌, katatuhụe tawe sasěmpikang i kamene. Sěmbal᷊iau kai ene harusẹ̌ koateng i kamene kal᷊amona, su sěmbẹ̌kang ene tamai lai mapakawalan hal᷊ẹ̌ bal᷊ine.
24I kamene e kawe mangangahạu wuta lai! Lango su inumang sahikang i kamene, arawe onta e kawe ělukangbeng kamene!
25Kạěngkěhang i kamene mananěntiro agama ringangu tau Farisi! I kamene e tahapěmělle! Manga l᷊ainumang dingangu manga lamạ i kamene lẹ̌uhasengbeng kamene l᷊ikude pakawurẹ̌si, arawe ral᷊unge měngkate apa mal᷊amuhụ kahiạewen hal᷊ẹ̌ kẹ̌kaěbakeng i kamene ual᷊ingu pěmamul᷊aho ringangu pẹ̌bawawusa.
26I kamene tau Farisi wuta! Uhasẹ̌ko kal᷊amona pakawurẹ̌si ral᷊ungu manga l᷊ainumang dingangu manga l᷊amạ, tadeạu l᷊ikude mal᷊aing burěsi!
27Kạěngkěhang i kamene mananěntiro agama ringangu tau Farisi! I kamene e tahapěmělle! I kamene kerẹ e manga kubul᷊ẹ̌ nilaburẹ̌ pinakawira, su l᷊ikude ikẹ̌kasilo mal᷊ěnggihẹ̌, arawe su ral᷊unge napenẹu ruhi ringangu kěbịewe apam mawawuhụ.
28Kerene lai i kamene. Wọu l᷊ikude i kamene kakěllaěng mapia su taumata; arawe su ral᷊unge ute i kamene kawe napenẹ u konti ringangu kararal᷊akị."
29"Kaěngkěhang i kamene mananěntiro agama ringangu tau Farisi! I kamene e tahapěmělle! I kamene němpangěndụ u watung kubul᷊ẹ̌ maral᷊ěnggihẹ̌ baugu manga nabi e, ringangu lělẹ̌gahengu palẹ̌ tatialạen taumata kakanoạe mapia.
30Kụ i kamene němpẹ̌bera u, 'Mangawe i kami nẹ̌biahẹ̌ su tempong manga i upung i kami e nạung ute, i kami e tawe timuhụ dingang i sire němpamate manga nabi!
31Kụ i kamene němpangaku hala u i kamene e kai hiten taumata němpamate manga nabi.'
32Mạeng kerene ute, pěmpanurusẹ̌ e ringangu měngkate pakasuẹ e kal᷊awọu rosa kụ seng niwahětang i upung i kamene e!
33I kamene e kai raral᷊aị dingangu kawe hiten taumata raral᷊aị! Kereapa ngae i kamene mapakasal᷊amat'u watangeng bọu hukumangu naraka?
34Daringihẹ̌ko pakapia-pia: Iạ e sarung měndoloh'u manga nabi, taumata matatahuěnna, ringangu manga mananěntiro; kụ sěnggạ bọ'i sire sarung pateěng i kamene, ringangu sěnggạewe lai wal᷊ine sarung kuruisang i kamene. Piạbe lai sarung pahangeng i kamene su ral᷊ungu wal᷊eng pẹ̌kakal᷊iomanengang, mase saghegheěng i kamene bọu soa sěmbaụ sarang soa wal᷊ine.
35Batụ u ene i kamene sarung ihukung ual᷊ingu pěmamate kụ nịkakoạ su kal᷊awọu taumata tawẹ sal᷊ane -- nanětạ bọu pěmamate si Habel kụ tawẹ sal᷊ane sarang pěmamate si Zakharia anạ i Berekhya, kụ pinateng kamene su tal᷊oaram Wal᷊em Mawu ringangu pananěmbaěng.
36Pangimangke: patikụ ene sarung tumuhung su taumata orasẹ̌ ini!"
37"Yerusalem, Yerusalem! Manga nabi e kawe nịpapatenu. Manga rarolohang u Ruata e niěntungangu watu sarang nate. Seng kapirang sul᷊ẹ e Iạ mapulu mangomol᷊'u patikụ mẹ̌tatumanạu, tabidạeng iněngen manụ mạngokọ manga anạe sual᷊ung u panide, kutẹu i kau e kawe mạdiri!
38Ual᷊ingu ene Mawu Ruata e tawe lai mahundingang i kamene.
39Kasingkạko: Manětạ bọu orasẹ̌ ini e i kau seng tawe makasilo Siạ saụ sarang i kau mẹ̌bera, 'Al᷊amatẹ̌ e mahundingang si Sie kụ diměnta su arengu Mawu.'"