Alkitab Mobile SABDA
[VER] : [SANGIR]     [PL]  [PB] 
 <<  Markus 5 >> 

1Bọu e Mawu Yesus dingangu murit'E nawunạe su sěmbẹ̌kan Danong Galilea, su wanuan Gerasa.

2Ene Mawu Yesus natumpạe wọu sakaeng, i Sie nihaungangu sěngkatau esẹ matoghasẹ̌ simẹ̌bang bọu manga liangu kubul᷊ẹ̌.

3Tau ene seng nipẹ̌banuangu rohkẹ̌ dal᷊akị kụ i sie seng mẹ̌tẹ̌tanạ su manga pěngangubul᷊ang. I sie seng tawe ikaikị manilaing ikitangu hante.

4Seng masau wěntungang su l᷊aede ringangu su l᷊imane, kai manga hante e měngkate wẹ̌běsukange, dingangkewen uase su l᷊aede pẹ̌papẹ̌diange. I sie kerene katoghase hakịewen tawẹu makatětol᷊ẹ̌ měhẹ̌go si sie.

5Ěllo hěbi i sie měngkatewe lěgah'u manga lẹ̌bing dingangu manga wěntihe, kạpěmansage kụ mẹ̌děndal᷊esẹ badange ringangu watu.

6Ene wọu maraune i sie seng nakasilo Mawu Yesus narěnta, kụ i sie měngkatewe timal᷊ang naněnsomahẹ̌ mase nẹ̌suba su těngon Mawu Yesus.

7Dingangu tingihe maihạ i sie mạmansagẹ̌, "Yesus Ahus'u Mawu Ruata Karangetange! Kai sarung pẹ̌kapuranengu iạ ini e? Su arengu Mawu Ruata, iạ mědẹ̌dorong, abe sigěsake iạ e!"

8(Tau ene nẹ̌bera kerene batụu Mawu Yesus něhengetang si sie, "Rohkẹ̌ dal᷊akị, sěbangke wọu tau ěndaị ini!")

9Mase Mawu Yesus nakiwal᷊ọe si sie, "I sai areng u?" Tau ene simimbang, "Arengku e i 'Legiun' -- batụu i kami ini e kai mal᷊awọ-l᷊awọ!"

10Apan piran sul᷊e i sie mědẹ̌dorong sěngapang botonge tadeạu Mawu Yesus abe pěnokol᷊'u manga rohkẹ̌ dal᷊aị e wọu weọ e ene.

11Maranin tampạ ene piạ gapaěngu wawi mal᷊awọ měmpědẹ̌deạ kaěnge su lengeh'u wul᷊ude.

12Manga rohkẹ̌ dal᷊aịe němpẹ̌dorong su Mawu Yesus, "Rolohe i kami apạhunsuẹ̌ su ral᷊ungu manga wawi e."

13Kụ Mawu Yesus kimirẹ e. Tangu manga rohkẹ̌ daral᷊aị e nahunsěbangke wọu tau ene kụ němpẹ̌suẹ̌ su wawi e. Kal᷊awọu wawi e němpẹ̌tal᷊ang kụ nahuntumpa wọu wiwih'u těnggilihange kụ něngkawunsal᷊ẹ̌ su rano mase něngkawul᷊usẹ̌ -- kal᷊awọe mangawe rua hiwu su waụ e.

14Manga měndal᷊ukadẹ̌ bawi e nahuntal᷊ang kụ němpẹ̌běken hal᷊ẹ̌ ene su soa ringangu su apang kampong mạngělikụ e. Mase taumata l᷊awọ e simẹ̌bang němpamanda hal᷊ẹ̌ seng nariadi e.

15I sire němpẹ̌haungke Mawu Yesus, kụ nakasilo tau kanini niwal᷊iuangu rohkẹ̌ dal᷊akịe kụ mạiang ěndaịse. I sie seng piạ pakeange, ringangu tiněnnane seng kere wiasa. Kụ i sire kěbị e něngkatakụ.

16I sire apạewen nakasilo hala kakakoạu tau ene ringangu manga wawi e, měmpẹ̌bẹ̌běken hal᷊ẹ̌ seng nariadie.

17Mase apan tumanạu weọ e ene tangu mědẹ̌dorong tadeạu Mawu Yesus maněntangu wanua ene.

18Ene Mawu Yesus simakẹ e su sakaeng, i anu nạung niwal᷊iuangu rohkẹ̌ dal᷊aịe nẹ̌dorongke su Mawu Yesus mědeạu i sie wotonge makatol᷊e.

19Kai Mawu Yesus e tawe napakawala, angkuěng'E, "Dakọe kapul᷊ẹ, kụ paul᷊ịe su manga anạ u sěmbaụ u apan seng kinoạu Mawu si kau, ringangu kereapa kapian'E i Sie si kau!"

20Tau e apid'u napul᷊ẹ, kụ nanětạe nẹ̌běke su kạguwạu Soa Mapul᷊o apang kụ seng nikoạu Mawu Yesus si sie. Kụ kěbị taumata e měngkaherang nakaringihẹ̌ ene.

21Mawu Yesus nẹ̌sul᷊e kạpia sol᷊ong sěmběkan dano. Su wiwih'u rano e, taumata l᷊awọ němpẹ̌dahěmbung Mawu Yesus.

22Ene piạ tau narěnta arenge i Yairus. I sie kai sěngkatau těmbonangu wal᷊eng pẹ̌kakal᷊iomanengang su soa ene. Piạ i sie nakasilo Mawu Yesus, i sie nẹ̌suba su těngon'E,

23kụ mědẹ̌dorong sěngapam botonge, "Tuang, anạku wawine kai masakị matědụ. Karimạko i Tuang deng duměnta kụ makapaněllid'u liman'U, kụ i sie maul᷊e ringangu tawe mate!"

24Tangu Mawu Yesus e natamai ringang i Yairus. Mal᷊awọ taumata němpẹ̌tol᷊e si Sie měmpẹ̌sẹ̌sasěngkelẹ̌ balạewe měnsang bọu tampạ sude.

25Su tal᷊oaran sire e piạ l᷊ai sěngkatau wawine kụ seng mapul᷊o dua su taunge měngkai rẹ̌dal᷊engangu raha wọu wadange pělli.

26Patikụ darotonge seng nasuen pakẹ e waugu pinamaehẹ̌ manga mangangundang, kaiso tawẹu nakapia, kaiso kawe napahuntinambang tědụe.

27Bawine ene seng mal᷊awọ dingihe mạanun Mawu Yesus. Tangu su tal᷊oarạen taumata l᷊awọ ene, i sie himaungke Mawu Yesus bọu l᷊ikude,

28u su tiněnnane, "Kạdiongeng katewe iạ manenggehẹ̌ lakụe, tangu iạ e seng mapia!"

29I sie nanenggehẹ̌ lakụ u Mawu Yesus, kụ su tempo ene e lai raral᷊engu rahane e napontodẹ̌. I sie nakapěndangu i sie seng nul᷊e.

30Tangu su orasẹ̌ ene lai Mawu Yesus nakapěndangu piạ kuatẹ̌ siměbang bọu watangeng'E. Tangu i Sie nẹ̌bihu su taumata lawọ ene kụ něhengetang, "I sai wědị nanenggehẹ̌ lakụ-Ku e?"

31Manga muritẹ̌ e němpẹ̌bera, "I Tuang makạsilo hala u apạe mal᷊awọ taumata kụ měmpẹ̌sẹ̌sasěsẹ. Kụ i Tuang delaing makiwal᷊ou, i sai nanenggehẹ̌ si Tuang?"

32Arawe Mawu Yesus měngkate sěntiniạ, mạmanda kaihi koaneng mědẹ̌deạ tau nanenggehẹ̌ si Sie.

33Tau wawine ene kụ nasingkạeng apa nariadi su watangenge, kụ kạkendenẹeng takụ tangu i sie nẹ̌suba su těngon Mawu Yesus kụ něngakụen kěbị-kěbị.

34Tangu Mawu Yesus něhengetang su wawine ene, "Anạ-Ku, ual᷊ingu i kau nangimang si Siạ, ute i kau e naul᷊e! Dakọe kapul᷊ẹ su ral᷊ungu pẹ̌darame. I kau e seng nul᷊e kahěngang!"

35Ene Mawu Yesus bẹ̌dang kapẹ̌hengetange, piạ darolohang pirang katau, nahunděnta wọu wal᷊eng Yairus. "Ahus'i Tuang bawine e seng naněntang," angkuěng i sire si Yairus. "Tawe wahal᷊uasẹ̌ i Tuang mapakasusa Mawu Yesus e wẹ̌dang."

36Tawe nẹ̌sěmpị apang iwẹ̌berang taumata lawọ e, Mawu Yesus něhengetang si Yairus, "Abe katakụ, měngkate pangimang!"

37Mase Mawu Yesus dimal᷊eng turusẹ̌, kai i Sie tawe napakawalan sarang sěngkatau niapatol᷊e si Sie, kětạewen i Petrus, Yakobus dingangi Yohanes sire tahatuari.

38Sarạeng i sire nahumpạ su wal᷊eng Yairus, Mawu Yesus nakasilou měngkate němpẹ̌golang, dingangu nakaringihẹ̌ sasangị dingangu ral᷊ungkang maihạ.

39Bọu e Mawu Yesus simuẹ̌ dingangu nẹ̌bera si sire, "Kawe unụe měmpěgẹ̌ganohạ dingangu mạhunsangị? Dariọ ene wal᷊inewe nate, i sie kětạeng mětẹ̌tikị!"

40I sire kai nahul᷊ěgen Mawu Yesus. Tangu i Sie něndolohen sire niapasẹ̌bang kěbị. Bọu ene i Sie namaringang si ninang dingangu i amangu rariọ dingangu i sire těllungkatau murit'E simuẹ̌ su ral᷊ungu kamar'u rariọ ene.

41Mawu Yesus nangumpaedẹ̌ liman dariọ e, kụ něhengetang si sie, "Talita kum," mangal᷊ene, "Momọ, Iạ mẹ̌bera si kau: pẹ̌bangungke!"

42Dariọ mahuala e měngkatewe nẹ̌bangung, kụ dimal᷊eng. (Umure seng mapul᷊o dua su taunge.) Kěbị apan nakasilo karariading ene e měngkatewe němpẹ̌dal᷊inaụ!

43Kai Mawu Yesus e nẹ̌sěding sěngapam botonge si sire měhabar'u hal᷊ẹ̌ ene si sai-sai. Mase ungkuěng'E, "Gělikengkong kaěnge rariọ ene."


  Share Facebook  |  Share Twitter

 <<  Markus 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran