Dual Panel1Manga anạ u sěmbaụ! Mawu Ruata e měngkai mapia si kitẹ. Kai ene hakịu iạ mědẹ̌dorong sěngapam botonge tadeạu i kamene měmpaněmban batangeng i kamene makoạ sěmbaụ sasěmba wiahẹ̌ kụ natěntani waugu Ruata ringangu makạl᷊uasẹ̌ naung'E. Pal᷊ahamawung kamene su Ruata e hinone kerene.
2Kumbahang měngkai tụtol᷊e kapulun dunia. Balạe Ruata mapẹ̌bal᷊uing kamene makoạ taumata wuhu, tadeạu i kamene mẹ̌bal᷊ui. Kụ ual᷊ingu i kamene makạkasingkạu kapulun Duata apang kụ mapia ringangu makạl᷊uasẹ̌ naung'E ringangu masukụ.
3Mawu Ruata e seng nangonggọu al᷊amate si siạ. Kai ene hakịu iạ manasa si kamene kěbị: Kumbahangbe watangeng mangěnna limembong karangẹ e wọu tiasa lẹ̌ěnaěng. Pěmpẹ̌pěndang batangenge ringangu kasanạu naung; pasịpěndang batangeng e tuhụ kuate nionggọu Ruata si sie kahiạen pangangimange si Yesus.
4Badang i kitẹ e lawọ laese, apan laese piạ munarane sěngkatau-sěngkatau.
5Kerene lai i kitẹ. Maning i kitẹ kěbị e mal᷊awọ, kaiso i kitẹ e mạngawẹ badan sěmbaụ ual᷊ingu i kitẹ e nasěmbaụ kụ dingangi Kristus. Dingangu i kitẹ e sěngkatau-sěngkatau piạ pěral᷊ahěmpukange sěmbaụ suwal᷊ine kere manga l᷊aese wọu wadan sěmbaụ.
6I kitẹ pẹ̌sěngkatau-pẹ̌sěngkatau e nahiạ u manga al᷊amat'u pẹ̌tatangkiang kụ mẹ̌tẹ̌tatěntang. Manga al᷊amatẹ̌ ene nionggọ u Ruata si kitẹ tinuhụewe tatal᷊ěntụ'E. Batụu ene i kitẹ harusẹ̌ mẹ̌pakẹu manga al᷊amatẹ̌ ene. I saing kụ piạ al᷊amat'u měhabarẹ̌'u Injilẹ̌ bọu Ruata harusẹ̌ maněpas'u habarẹ̌ ene tinuhụewe ikaumal᷊'u watangeng e.
7I saing kụ piạ al᷊amat'u mẹ̌tangkuang taumata wal᷊ine, harusẹ̌ sěngapam botonge mẹ̌tangkuang taumata wal᷊ine. I saing kụ piạ al᷊amat'u maněntiro, harusẹ̌ sěngapam botonge maněntiro.
8I saing kụ piạ al᷊amat'u manasa taumata wal᷊ine, harusẹ̌ sěngapam botonge manasa taumata wal᷊ine. I saim piạ al᷊amat'u mangonggọ apa-apa tẹ̌taghuaneng e su taumata wal᷊ine e, harusẹ̌ měmpẹ̌koạ ene ringangu kasěllahu ral᷊ung u naung kere hinone. I saing kụ piạ al᷊amat'u mangahạ, harusẹ̌ sěngapam botonge mangahạ. I saing kụ piạ al᷊amat'u tumal᷊ěntụ u taumata wal᷊ine ute hinong mẹ̌koạ ene ringangu karal᷊uas'u naung.
9Pẹ̌kakakěndagẹ̌ko tuhụ kapian naungu. Kěngkawěnsing u apan dal᷊akị, dingangu pěmpangumpaedẹ̌ su apang kụ mapia.
10Mapiangbe manga anạ u sěmbaụ pẹ̌kẹ̌kakěndagẹ̌ sěmbaụ su wal᷊ine pakapapia kerẹewe pẹ̌kakakěndagu pẹ̌sěntamahuariang su wal᷊e sěmbaụ, dingangu pěmpẹ̌kakal᷊imona měmpẹ̌papangadatẹ̌.
11Pakararading měmpěhal᷊ẹ̌. Abe pěmpěmalasẹ̌. Pěmpamunara waugu Mawu ringangu kuat'u Rohkẹ̌ u Ruata.
12Mapiangbe i kamene pěharapẹ̌ su Mawu ringangu ral᷊uasẹ̌, pakasasabarẹ̌ su ral᷊ungu susa ringangu pakakakědang mẹ̌kal᷊iomaneng.
13Pẹ̌papangontol᷊ẹ̌ su pandungang u manga taumatan Sahani wal᷊ine, ringangu pěmpanarimạ manga anạ u sěmbaụ tamba pangangimang kụ tawe nikakiral᷊ang kamene, ringangu naung mal᷊uasẹ̌ su ral᷊ungu wal᷊enu.
14Pěmpẹ̌gause su Mawu Ruata tadeạu i Sie měngal᷊amatẹ̌ taumata apan měmpẹ̌tẹ̌tingkaị si kamene. Ore, pẹ̌dorong tadeạu Mawu mangal᷊amatẹ̌ si sire, abe pěmpěngane.
15Pahul᷊uasẹ̌ dingangu taumata apan mạhul᷊uasẹ̌, kụ pěmpahunsangị dingang i sire apan mạhunsangị.
16Pěmpẹ̌biahẹ̌ pẹ̌sěngkanaung sěmbaụ su wal᷊ine. Abe kawe měmpanodẹu naung marangẹ, kaiso pẹ̌tarangkom batangeng u ringangu taumata masasanạ pangkate. Abe sasahingkạ bọu apang hinone.
17Kereu piạu měmpẹ̌koạ dal᷊aị si kamene abeko wal᷊ise ringangu ral᷊aị. Pěmpẹ̌koạ apang kụ lẹ̌ěnnang mapia su kěbị taumata.
18Bọu sěmběkanu, pěhingidẹ̌ko sěngapam botonge mẹ̌deạu mẹ̌biahẹ̌ marame ringangu kěbị taumata.
19Manga anạ u sěmbaụku! Kumbahang-bahang mamal᷊isẹ̌ une, balạe Mawu Ruata pěhukung. Batụu su ral᷊ungu Winohẹ Susi e mạbawohẹ, "Kai Iạ e měmal᷊isẹ̌. Iạ e sarung mělahukung e angkuěng u Mawu."
20Katewe kereu sẹ̌dụ u e nahutung, onggoteng beng kaěng e i sie; dingangu kereu narou, ute onggotengbeng inumang e i sie. Ual᷊ingu pẹ̌kakoạ i kamene kerene, ute i kamene mapakamean sie.
21Abe pěmalam batangeng u pakawatạu apan dal᷊aị, kaiso mapiangbe i kau pěmatạko ral᷊aị dingangu kapia.