Dual Panel1Mạeng kerene, kai apa untune makoạ tau Yahudi? Dingangu apa ual᷊ine tumol᷊e atorang'u sunatẹ̌?
2Kai lawọ bue gunane! Kahumotong-motongange kai ual᷊ingu su tau Yahudi e Mawu Ruata nangumbalang kal᷊awọu hengetange.
3Kai kereapa wue kereu sěnggạ tau Yahudi e kawe tạ satiane? Kụ apa ual᷊ingu ene Mawu Ruata e mariadi tạ satiane?
4Tantu tala! Batụu nal᷊ahẹu Mawu Ruata e napenẹ u katěngadẹ̌, maniweng apan taumata e kakontiang. Su ral᷊ungu Winohẹ Susi mạbawohẹ, "Tadeạu i kau matodẹbe adilẹ̌ su ral᷊ungu patikụ baweranu, ringangu makauntung kereu i kau ghẹ̌gutaěng."
5Kai kereu kạadil'u Mawu Ruata e mangkeng kakạl᷊ahẹ e, watụ u i kitẹ mẹ̌kẹ̌koạ apan tạ katul᷊ide, kụ i kitẹ e kai mẹ̌berạeng apa ngae? U Mawu Ruata e tawẹ adile kereu i Sie měhukung i kitẹ? (Těngadẹ̌ kakiwal᷊o ini su tampạ e ituhụ mạtaumata.)
6Mambeng tala! Batụu kereu Mawu Ruata e tawẹ katul᷊ide, ute kereapa wue i Sie makapěhukung u dunia ini?
7Kai kereu ual᷊ingu kakanoạ kụ tawẹ katul᷊ide, ute apang kụ matul᷊idẹ̌ e mạanun Mawu Ruata, mangkeng mạl᷊ětạ hakịeweng i Sie rẹ̌daloěng, unụe taumata kụ mẹ̌kẹ̌koạ dal᷊aị e wẹ̌dang iapẹ̌sẹ̌sal᷊a kere taumata warạdosa?
8Dingangu unụe i kitẹ tawe wotonge mẹ̌bera, "Mạpiangbe i kitẹ mẹ̌koạ dal᷊aị tadeạu l᷊uměto apam mapia?" Těngadẹ̌ piạ manga taumata kụ mělẹ̌hinakang siạ měbẹ̌bera u iạ e kai wọu nẹ̌bera kerene. Apan taumata kụ kerene su tampạ e ihukung u Mawu Ruata.
9Ho! Kereapạ e ngae i kitẹ tau Yahudi e limembong kapiane wọu bansa wal᷊ine? Mamben tala! Sen takụ niwera u baẹ tau Yahudi kerene lai taumatan bansa wal᷊ine, kěbị mang mạsasěllung su rosa.
10Kere mạbawohẹ su ral᷊ungu Winohẹ Susi, "Tawẹu sarang sěngkatau maadilẹ̌,
11tawẹu sarang sěngkatau e lai matahuěnna ringangu tawẹu sarang sěngkatau reng mẹ̌suba Mawu Ruata.
12Kěbị taumata seng nẹ̌tẹ̌ngkarau wọu Mawu Ruata; kěbị e seng nailang. Tawẹu sarang sěngkatau mẹ̌kẹ̌koạ mapia mang tạ u sarang sěngkatau.
13Tinggol᷊ang i sire mẹ̌sul᷊ungu lẹ̌bing mạtatope; akal᷊i sire lụelehẹ̌ bọu lilan sire, dingangu wiwih'i sire sụsal᷊iwẹ̌bud'u lahinakang, mẹ̌sul᷊ungu wisan těmpu.
14Mohong i sire měngkatewe mạpenẹ u l᷊aane ringangu sěngkul᷊ẹ̌.
15Lempang i sire mahawesẹ̌ kereu tamai manigěsạ dingangu měmate taumata.
16Kawawinasa ringangu kasasusa e sẹ̌sawuhang i sire suapan tampạ.
17I sire tawe makasasilo ral᷊eng u pẹ̌darame,
18ringangu tawe měngangadatẹ̌ Mawu Ruata."
19Ini e i kitẹ masingkạ u kěbị apan mạbawohẹ su ral᷊ungu torat'u Yahudi e, tumange kai si sire apan mạsasěllung su toratẹ̌ e. Kụ ual᷊ingu ene ute tawẹu sarang sěngkatau l᷊ai makakoạ manga apa ringangu patikụ dunia e kapěnuntukangu Mawu Ruata e.
20Batụu tawẹu sarang sěngkatau makạkoạ mapia ringangu Mawu Ruata ual᷊ingu tau ene mẹ̌kẹ̌koạbe apang kụ kẹ̌kaěbakeng su ral᷊ungu toratẹ̌. Kaiso toratẹ̌ ene kětạeng mẹ̌lẹ̌lahẹ su taumata u taumata e kai warạdosa.
21Arawe ini Mawu Ruata seng naněbọu ral᷊eng kereapa taumata mẹ̌sěngkapian Sie kụ dal᷊eng ene e tawẹ kal᷊ahěmpukange ringangu torat'u Yahudi. Manga bukẹ̌ i Musa ringangu bukẹ̌ u manga nabi e mělẹ̌lahẹ u hal᷊ẹ̌ ene,
22u Mawu Ruata e mělẹ̌loahu taumata e mẹ̌sěngkapian Sie, kětạeng kereu taumata měmpạngimang si Yesus Kristus. Mawu Ruata e mẹ̌kẹ̌koạ ini waụgu kěbị taumata apam mạngimang si Yesus Kristus; u kawe tawẹ pinẹ̌tatěntangenge:
23Kěbị taumata e seng nẹ̌dosa ringangu maraun Mawu Ruata kụ makasal᷊amatẹ̌ si sire.
24Kẹ̌tạeng ual᷊ingu tatal᷊ěntụ u Mawu Ruata sẹ̌sane kụ nilaonggọ matagẹ̌, pẹ̌kakauhu taumata ringangu Mawu Ruata e saụ makoạ mapia; kakakoạ e ute: taumata e niapakal᷊iwir'i Yesus Kristus.
25Duata e nanarakang i Kristus Yesus tadeạu ual᷊ingken papaten'E ute taumata e nipakal᷊iwirẹ̌ bọu pẹ̌sasal᷊a kereu i sire mangimang si Sie. Mawu Ruata e mẹ̌kẹ̌koạ kerene tadeạu mapatodẹu kaadil'E. Watụ u tempo nal᷊iu, Mawu Ruata seng nẹ̌těngkasabarẹ̌ su kal᷊awọu manga rosan taumata, hakịu i Sie tawe něhukung i sire.
26Arawe orasẹ̌ ini i Sie kimanoạ e nẹ̌teghangu rosa pělahekangu kạadil'E. Kakanoạ kerene mạnodẹu watangeng'E adilẹ̌; kụ apan taumata mạngimang si Yesus nilahẹ'E kere taumata kụ saụ nẹ̌sěngkapian Mawu Ruata.
27Ual᷊ingu ene ute semben tawẹ dal᷊enge si kitẹ baugu l᷊umesạ. Unụe kerene? Apa nikaianenge ual᷊ingu i kitẹ měkẹ̌koạbe apang kạbawohẹ su torat'u agaman Yahudi? Bal᷊ine. Kaiso ual᷊ingu i kitẹ e mạngimang.
28Batụu nimbụe kai kere ini: I sain nilahẹ saụ mẹ̌sěngkapia ringangu Ruata, bal᷊inewe ual᷊ingu i sie měkẹ̌koạ apang mạbawohẹ su ral᷊ung'u toratu agaman Yahudi, kaiso ual᷊ingu i sie mạngimang si Yesus Kristus.
29Arau Mawu Ruata ene Mawun tau Yahudi samatang? Wal᷊inewe i Sie Ruatan bansa lai wal᷊ine? Ore, těngadẹ̌ i Sie mal᷊ain Duatam bansa wal᷊ine.
30U Ruata e mang sěmbaụ. I Sie kai napakariadin tau Yahudi saụ nẹ̌sěngkapian Mawu Ruata ual᷊ingu i sire mạngimang. Dingangu i Sie lai napakariadin manga taumatam bansa wal᷊ine saụ nẹ̌sěngkapian Duata; ene mal᷊aing ual᷊ingu i sire mạngimang.
31Kai ini e mangal᷊ene ual᷊ingu i kitẹ mangimang si Kristus, i kitẹ měnděmme torat'u Yahudi? mamben tala wue! Sal᷊a anune ual᷊ingu pangangimang i kitẹ ene, i kitẹ měngarěgan toratẹ̌ ene.