Dual Panel1Sẽngaq Almasih sampun menderite secare jasmani, side pade ẽndah harus kuatang diriq siq pikiran maraq nike. Sẽngaq dengan saq menderite secare jasmani, ie sampun engkah piaq dose.
2Keranaq nike, semasih araq waktu lẽq dunie niki side pade harus idup menurut pekayunan Allah, dait ndẽqne menurut kemẽlẽq manusie.
3Lẽq waktu saq laẽq, side pade sampun bẽgaq ngonẽqne ngelaksaneang napi saq demen telaksaneang siq dengan-dengan saq ndẽq kenal Allah. Lẽq waktu nike side pade idup turutang hawe napsu, bowos-bowosan, pẽste-pẽste jangke liwat bates, nginem-nginem dait nyembah berhale saq tebalaq.
4Mangkin dengan saq ndẽq kenal Allah, bengaq bahwe side pade ndẽq milu idup maraq ie pade dalem kehidupan saq bedose jangke liwat bates. Keranaq nike ie pade pitnah side pade.
5Laguq ẽraq ie pade harus bejawab tipaq Allah saq sampun siep ngadilin dengan saq idup dait saq ninggal.
6Nike lantaranne, Kabar Solah lẽman Allah sampun teberiteang ẽndah tipaq dengan-dengan ninggal. Maksutne adẽq ie pade, saq sampun teadilin dalem keadaan jasmani -- maraq halne selapuq dengan gen teadilin -- siq roh bau idup menurut pekayunan Allah.
7Selapuq hal sampun gen tutuq, keranaq nike side pade harus nguasein diriq dait tenang, adẽq side pade tao bedo'e.
8Lẽq atas selapuq nike, hal saq paling utame: Side harus pacu-pacu saling kasihin sopoq kance saq lain, sẽngaq kasih segah dengan piaq dose malik.
9Side pade harus bẽng nyodoq sopoq dengan dait saq lainne lẽq balẽnde, ndaq ngerumun.
10Sebagẽ pengurus saq setie lẽman rahmat Allah, side pade sopoq-sopoq harus kadu paice saq sampun side pade terimaq jari kepentingan side bareng-bareng.
11Lamun araq dengan saq ngeraos, ie harus ngeraos sebagẽ dengan saq nyampẽang Manik Allah. Lamun araq sopoq hambe, ie harus ngelayanin siq kekuatan saq teicanin siq Allah lẽq ie, adẽq lẽq dalem selapuq hal Allah temulieang langan Deside Isa Almasih. Ie saq bekuase dait patut temulieang selaẽq-laẽqne. Amin.
12Semeton senamian saq tiang kasihin, ndaq side pade bengaq siq siksaqan saq nimpe side pade sebagẽ ujian, maraqne sopoq hal saq luar biase telaksane lẽq side pade.
13Sebalikne, side pade harus seneng lantaran milu menderite bareng-bareng kance Almasih. Make ẽraq lamun kemuliean Almasih tenyatayang, side pade gen besukecite.
14Side pade bahagie lamun side pade tehine lantaran pesẽngan Almasih, sẽngaq Roh kemuliean, nike Roh Allah araq lẽq side.
15Keranaq nike, ndaq jangke araq sopoq dengan juaq lẽq antare side saq menderite lantaran ie tukang nyematẽq, atao maling, atao dengan jahat, atao lantaran ie turut campur urusan dengan lain.
16Laguq lamun side pade menderite lantaran side pade pengiring Almasih, ndaq ilaq lantaran hal nike, laguq side pade harus mulieang Allah siq pesẽngan Almasih nike.
17Sampun dateng waktune Allah ngadilin dunie. Dait dengan-dengan saq tehususang bagi Allah saq gen teadilin bejulu. Jari, lamun Allah gen mulai lẽman ite, berembẽ jarine laun kance dengan-dengan saq ndẽq percaye lẽq Kabar Solah lẽman Allah nike?
18"Lamun dengan-dengan saq kenaq doang sengke teselametang, lebih-lebih saq gen telaksane lẽq dengan-dengan saq bedose dait saq ndẽq kenal Tuhan."
19Keranaq nike, dengan-dengan saq menderite lantaran pekayunan Allah, harus tetep gawẽq saq solah dait nyerahang jiwe ie pade tipaq Penciptene saq setie.