Alkitab Mobile SABDA
[VER] : [SASAK]     [PL]  [PB] 
 <<  1 Tesalonika 4 >> 

1Ahirne semeton senamian, tiang pade tunas lẽq side pade dait ngebẽng side pade nasẽhat lẽq dalem Deside Isa Almasih: Side sampun dengah lẽman tiang pade berembẽ side pade harus idup adẽq nyenengang pekayunan Allah. Hal nike mule side pade sampun turut, laguq solahan sayan pacu-pacu malik side pade ngelaksaneang.

2Sẽngaq side pade sampun nenaoq petunjuk-petunjuk saq sampun tiang pade sampẽang lẽq side siq kuase Junjungan Saq Mulie Deside Isa.

3Maraq niki pekayunan Allah, side pade harus jari suci, jaoqang diriqde lẽman perbuatan saq cabul.

4Sebilang dengan mame lẽq antare side pade harus nenaoq berembẽ idup kance seninene mẽsaq dait idup suci dait mulie.

5Ndaq idup turut hawe napsu, maraq saq tegawẽq siq dengan saq ndẽq kenal Allah.

6Dalem hal maraq nike, ndaq araq sopoq dengan juaq miaq kesalaqan tipaq semetonne, atao nipu ie. Laẽq sampun tiang pade peringet side pade secare keras, bahwe Tuhan gen ngukum dengan-dengan saq miaq kesalaqan-kesalaqan maraq nike.

7Allah ngemanikang ite, ndẽqne jari gawẽq napi saq najis, laguq napi saq suci.

8Dengan saq nolaq pengajahan niki, ndẽqne nolaq manusie, laguq nolaq Allah saq ngicanin Roh-Ne saq suci tipaq side.

9Ndẽqne perlu malik tiang pade nulis tipaq side mengenai kasih lẽq semeton-semeton, sẽngaq side mẽsaq sampun berajah saling kasihin lẽman Allah.

10Dait hal niki sampun side pade nyatayang tipaq selapuq semeton seiman lẽq selapuq wilayah Makedonia. Laguq, nasẽhat tiang pade lẽq semeton senamian, adẽq side pade sayan pacu-pacu malik ngelaksaneang hal nike.

11Pade berusahe idup tenang dait ndaq turut campur urusan dengan lain. Side pade harus begawẽan boyaq napkah mẽsaq, pade maraq pesen tiang pade laẽq lẽq side.

12Lamun side pade idup maraq nike, side pade ndẽq beharep lẽq sai-sai, dait dengan-dengan lain gen hormat lẽq side pade.

13Semeton senamian, tiang pade melẽt adẽq side pade nenaoq saq setetune mengenai dengan-dengan saq sampun ninggal; adẽq side pade ndẽq bedukecite maraq dengan-dengan lain saq ndẽq bedowẽ pengharepan.

14Sẽngaq lamun ite percaye bahwe Deside Isa sampun ninggal dait idup malik, make ite percaye ẽndah bahwe Allah gen ngidupang malik dengan saq sampun ninggal lẽq dalem Deside Isa, dait ngumpulang ie pade bareng-bareng kance Ie.

15Mengenai hal nike, niki manik Tuhan saq tiang pade mẽlẽ sampẽang lẽq side: Lẽq waktu Junjungan Saq Mulie Deside Isa rauh, ite saq masih idup ndẽq gen senjuluq dengan-dengan saq sampun ninggal.

16~Eraq sewaktu araq tande, lẽq waktu datu malaẽkat gen bekuih siq suare saq belẽq dait terompẽt Allah tepuniqang, make Junjungan Saq Mulie Deside Isa mẽsaq gen turun lẽman sorge, dait ie pade saq sampun ninggal lẽq dalem Almasih gen juluan teidupang.

17Sesampun nike, ite saq masih idup waktu nike gen bareng-bareng teangkat kance ie pade ojok awang-awang jari bedait kance Tuhan lẽq derike. Terus ite gen ndot kance Tuhan selaẽq-laẽqne.

18Keranaq nike, side pade harus saling hibur siq ucapan-ucapan niki.


  Share Facebook  |  Share Twitter

 <<  1 Tesalonika 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel