Dual Panel1Mule kenaq ucapan niki, "Dengan saq melẽt jari pengawas jemaah, setetune ie melẽtang sopoq pegawẽan saq solah."
2Keranaq nike pengawas jemaah harus dengan saq ndẽq bedowẽ cacat cele, semame lẽman sopoq senine, tao nahen diriqne, bijaksane, bedowẽ tate kerame; demen bẽng dengan nyodoq lẽq balẽne, dait ceket ngajah dengan;
3ndaq dengan saq girang bowos, atao girang sili. Sebalikne, ie harus gerasaq, demen bedamẽ dait ndẽqne tejariang panjak siq kẽpẽng.
4Ie harus tao ngatur keluargene secare solah, dait didik bije-bijene jari taat dait hormat lẽq ie.
5Sẽngaq lamun dengan ndẽq tao ngurus keluargene mẽsaq, berembẽ ie bau ngurus jemaah Allah?
6Pengawas jemaah ndẽqne kanggo dengan saq baruq betobat, sẽngaq laun ie jari sombong dait kene hukuman Belis.
7Ie harus dengan saq solah aranne lẽq masyarakat; sẽngaq lamun ndẽqne maraq nike, ie gen tehine siq dengan, sehingge ie geriq ojok dalem siasat Belis.
8Pelayan jemaah ẽndah, harus dengan saq solah dait tulus; ndẽq kanggo dengan saq girang bowos siq anggur atao dengan saq mentingang kẽpẽng.
9Ie pade harus taat lẽq rahasie iman saq sampun tenyatayang siq Allah, dait selapuqne nike harus telaksaneang siq angen saq tulus.
10Ie pade harus teuji bejulu, dait lamun ternyate ie mule ndẽq bedowẽ cacat cele, baruq ie bau jari pelayan lẽq dalem jemaah.
11Senine ie pade harus ẽndah dengan saq solah, ndẽqne dengan saq girang pitnah dengan. Ie pade harus tao nahen diriqne dait jujur lẽq dalem selapuq hal.
12Pelayan jemaah harus bedowẽ cume sopoq senine. Ie harus tao ngurus bije-bijene dait keluargene.
13Dengan-dengan saq solah entane jari pelayan lẽq dalem jemaah, gen tehormatin dait jari sayan bani ngeraos mengenai iman ie pade tipaq Almasih.
14Tiang beharep gen bau jangoq side lẽq waktu saq ndẽq ngonẽq malik. Timaq maraq nike, tiang tulis surat niki tipaq side,
15adẽq lamun tiang telat dateng, side sampun nenaoq berembẽ ite harus idup sebagẽ keluarge Allah, nike jemaah Allah saq idup. Jemaah niki saq jari pilar dait dasar kebenaran.
16Ndẽq araq sopoq dengan juaq saq tao nilas, berembẽ belẽqne rahasie ibadahte: Ie saq sampun nyatayang diriq-Ne lẽq dalem wujut manusie, dait tenyatayang kenaq siq Roh Allah, dait tesaksiang siq pare malaẽkat. Beritene teumumang lẽq antare bangse-bangse saq ndẽq kenal Allah, dait Ie tepercaye lẽq dalem dunie dait teangkat ojok dalem kemuliean.