Alkitab Mobile SABDA
[VER] : [SASAK]     [PL]  [PB] 
 <<  2 Timotius 2 >> 

1Timotius, bije tiang! Side harus jari kuat siq rahmat lẽq dalem Deside Isa Almasih.

2Napi saq sampun side dengah lẽman tiang lẽq julu luwẽq saksi percayeang hal nike tipaq dengan-dengan saq bau tepercaye dait ẽndah saq ceket ngajah dengan lain.

3Side harus milu menderite sebagẽ prajurit Deside Isa Almasih saq solah.

4Sopoq prajurit saq kenyeke bejuang, ndẽqne gen piaq diriqne rẽpot siq urusan-urusanne mẽsaq, sẽngaq ie mẽlẽ nyenengang komendanne.

5Sopoq dengan saq jari pemaẽn olah rage ndẽqne gen jari juare lẽq dalem sopoq pertandingan, lamun ie ndẽq taat lẽq aturan-aturan.

6Petani saq sampun lelah begawẽan, ie saq paling penembẽq berhak mauq hasil tetaletanne.

7Pikirang napi saq tiang sampẽang nike, sẽngaq Tuhan gen ngicanin side kesanggupan jari ngerti selapuqne.

8Ingetang niki: Kabar Solah saq tiang beriteang, nike kabar mengenai Deside Isa Almasih, keturunan Daud; nike Almasih saq sampun idup malik lẽman ninggal.

9Lantaran tiang nyampẽang Kabar Solah nike, tiang jari menderite; malahan jangke terantẽ maraq sopoq penjahat. Laguq Manik Allah ndẽqne bau terantẽ.

10Keranaq nike tiang sabar nanggung selapuqne nike demi kepentingan dengan-dengan saq sampun tepilẽq siq Allah, adẽq ie pade ẽndah mauq keselametan saq teicanin langan Deside Isa Almasih, dait saq tebarengin siq kemuliean saq kekel.

11Mule kenaq ucapan niki, "Lamun ite sampun ninggal ngiring Ie, ite ẽndah gen idup ngiring Ie.

12Lamun ite tetep tekun, ite ẽndah gen mrẽntah ngiring Ie. Lamun ite nilas Ie, Ie ẽndah gen tilas ite.

13Lamun ite ndẽq setie, Ie tetep setie, sẽngaq Ie ndẽq gen bau nilas diriq-Ne mẽsaq."

14Side harus ingetang dengan-dengan mengenai selapuqne niki. Nasẽhat ie pade lẽq arepan Allah, adẽqne ndaq begejuh mengenai istilah-istilah. Nike ndẽq araq manpaatne, malahan cume piaq kaco dengan-dengan saq dengah.

15Side harus berusahe pacu-pacu adẽqne teakuq siq Allah jari dengan saq patut begawẽan lẽq Ie. Pade berusahe adẽq side ndẽq ilaq lẽq pegawẽande, laguq kenaq-kenaq entan ngajahang mengenai kebenaran.

16Jaoqin raosan-raosan saq ndẽq araq manpaatne dait saq ndẽq suci. Raosan-raosan saq maraq nike cume miaq dengan sayan jahat.

17Ucapan-ucapan dengan-dengan nike becat gati ngelontoq maraq penyakit kangker saq ganas. Lẽq antare ie pade termasuk Himenus dait Piletus.

18Ie pade sampun nyimpang lẽman kebenaran, dait miaq iman separo dengan jari kaco. Basen ie pade bahwe idup malik lẽman kematẽan sampun telaksane.

19Laguq dasar kuat saq tepiaq siq Allah ndẽqne bau tegerik. Lẽq atasne tetulis maraq niki, "Tuhan kenal kance dengan-dengan saq jari dowẽ-Ne", dait, "Dengan-dengan saq nyebut pesẽngan Tuhan, ie harus jaoqang diriqne lẽman kejahatan."

20Lẽq dalem balẽ saq belẽq araq macem-macem perabotanne. Araq saq tepiaq lẽman perak atao emas, laguq araq ẽndah saq lẽman kayuq atao tanaq. Araq saq tekadu jari maksut saq mulie, dait araq ẽndah saq tekadu jari maksut saq kurang mulie.

21Dengan saq persiq diriqne lẽman selapuq saq jahat, dengan nike gen tekadu jari maksut saq mulie. Ie jari dowẽ saq husus dait bemanpaat umaq majikanne. Ie tesiepang jari tekadu umaq sebilang pegawẽan saq solah.

22Keranaq nike, jaoqin hawe napsu dengan bajang, usaheang keadilan, kesetiean, kasih dait kedamẽan bareng-bareng kance ie pade saq beharep tipaq Tuhan siq atẽ saq suci.

23Ndaq milu bedebat kance dengan bodo saq ndẽq nenaoq napi-napi. Side nenaoq bahwe selapuqne nike cume nimbulang pegejuhan.

24Dengan saq begawẽan tipaq Tuhan ndẽqne patut besiaq; ie harus tao bebatur kance selapuq dengan, dait bau ngajah dengan secare solah dait sabar.

25Ie harus secare lemah lembut ngajah dengan-dengan saq girang ngelawan; mudah-mudahan Allah ngicanin kesempatan lẽq dengan-dengan nike adẽqne betobat lẽman dose-dose ie pade dait nenaoq kebenaran.

26Siq care nike ie pade jari sadar malik, dait lepas lẽman kuase Belis saq sampun jeret ie pade dait maksaq ie pade turut kemẽlẽqne.


  Share Facebook  |  Share Twitter

 <<  2 Timotius 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel