Dual Panel1Sebilang Imam Agung tepilẽq lẽq antare manusie, dait tetetepang jari ngewakilin manusie lẽq urusan ie pade kance Allah. Tugasne jari ngaturang persembahan dait kurban lantaran dose.
2Imam Agung nike bau paham ie pade saq jahat dait sesat, lantaran ie mẽsaq luwẽq kelemahan.
3Dait, lantaran ie mẽsaq lemah, make ie harus ngaturang kurban, ndẽqne cume lantaran dose-dose umat, laguq lantaran dose-dosene mẽsaq ẽndah.
4Dait ndẽq araq sopoq dengan juaq saq bait kehormatan nike umaq diriqne mẽsaq, laguq ie temanikang siq Allah pade maraq Harun.
5Maraq nike ẽndah Almasih. Ie nẽnten mulieang diriq-Ne mẽsaq jari Imam Agung. Allah mẽsaq saq ngangkat Ie. Manik Allah tipaq Ie, "Deside Bije saq asalne lẽman Tiang, lẽq jelo niki Tiang sampun jariang Deside Bije Tiang."
6Pade maraq lẽq ayat saq lain Allah bemanik ẽndah, "Deside Imam selaẽq-laẽqne, menurut aturan Imam Melkisedek."
7Sewaktu Almasih idup lẽq dunie niki, Ie bedo'e dait sanget siq-Ne tunas lẽq Allah, saq sanggup nyelametang Ie lẽman ninggal. Dait lantaran kesolẽhan-Ne Allah mirengang Ie.
8Deside Isa nike Bije saq asalne lẽman Allah, laguq timaqne maraq nike, Ie berajah jari taat langan penderitean-Ne.
9Make sesampun Ie tesempurneang, Ie jari sumber keselametan saq kekel tipaq selapuq dengan saq taat lẽq Ie,
10dait Allah ẽndah nyatayang Ie jari Imam Agung, menurut aturan Imam Melkisedek.
11Mengenai kedudukan Deside Isa jari Imam Agung, masih luwẽq saq perlu tiang pade sampẽang lẽq side, laguq sengke jari jelasang hal nike, sẽngaq side pade ndẽq iniq becat ngerti.
12Setetune sampun waktune side jari guru, laguq nyatene side pade masih perlu berajah lẽman dengan lain mengenai hal-hal saq paling dasar lẽman pengajahan Allah. Side pade ndẽqman mampu nerimaq keloran saq tegẽng; side pade masih harus nginem susu doang.
13Dengan saq masih nginem susu, artine ie masih bebẽaq; ie ndẽqman bedowẽ pengalaman mengenai napi saq kenaq dait napi saq salaq.
14Keloran saq tegẽng nike umaq dengan dẽwase saq sampun bedowẽ pengalaman, tao bẽde-bẽdeang mbẽ saq solah dait mbẽ saq jahat.