Alkitab Mobile SABDA
[VER] : [SASAK]     [PL]  [PB] 
 <<  Wahyu 3 >> 

1"Tipaq malaẽkat jemaah lẽq Sardis, tulis maraq niki: Niki manik lẽman Ie saq bedowẽ kepituq Roh Allah dait kepituq bintang nike. Tiang nenaoq selapuq saq side pade laksaneang. Side pade teparan idup, padahal side pade matẽ!

2Keranaq nike, pade ures, dait teguqang napi saq masih araq lẽq side pade sendẽqman selapuqne bis matẽ. Sẽngaq Tiang ndait bahwe napi saq side pade laksaneang, ndẽq sopoq juaq saq sempurne lẽq arepan Allah.

3Keranaq nike, pade inget malik lẽq napi saq sampun teajahang tipaq side pade laẽq dait napi saq sampun side pade dengah. Laksaneang nike dait pade tobat lẽman dose-dosende. Lamun side pade ndẽq bejage-jage, Tiang gen dateng tipaq side maraq maling; dait side pade ndẽq gen nenaoq piran waktune Tiang dateng.

4Laguq lẽq tengaq-tengaq side pade saq araq lẽq Sardis masih araq dengan saq jagaq adẽq kelambine tetep bersi. Ie pade gen lampaq bareng-bareng kance Tiang kadu kelambi putẽq, sẽngaq ie pade pantes lẽq hal nike.

5Tipaq ie pade saq menang gen tekaduang jubah putẽq. Aran ie pade ndẽq gen Tiang apus lẽman kitab kehidupan. Dait lẽq arepan Bapa Tiang serte malaẽkat-malaẽkat-Ne Tiang gen ngaku bahwe ie pade dowẽn Tiang.

6Sai bedowẽ kentok, harus ie dengahang napi saq temanikang siq Roh Allah tipaq jemaah-jemaah!"

7"Tipaq malaẽkat jemaah lẽq Piladelpia, tulis maraq niki: Niki manik lẽman Ie Saq Suci dait Saq Kenaq. Ie saq negel kunci saq teẽpẽang siq Daud; lamun Ie bukaq, ndẽq araq sopoq dengan juaq saq bau ngimpet malik, dait lamun Ie ngimpet, ndẽq sopoq dengan juaq saq bau bukaq.

8Tiang nenaoq napi saq side pade laksaneang: Pade serioq, Tiang sampun bukaqang side pade lawang, saq ndẽq bau teimpet siq sai juaq. Tiang nenaoq bahwe kekuatande cume sekediq, laguq side pade turut manik Tiang dait side pade ndẽq nilas aran Tiang.

9Pade inget niki: Dengan-dengan saq jari umat Belis nike, penduste-penduste saq ngaku diriqne Yahudi padahal ndẽq, gen Tiang paksaq dateng dait sujut lẽq julunde. Dait ie pade gen nenaoq bahwe Tiang ngasihin side.

10Sẽngaq side pade sampun turut manik Tiang adẽq tetep tekun, Tiang ẽndah gen ngelindungin side pade lẽman jaman kesusahan saq gen nimpe seantẽro dunie. Hal nike gen telaksane jari cobe selapuq dengan lẽq gumi.

11Tiang gen becat dateng! Jagaq solah-solah napi saq side pade ẽpẽang, adẽq ndẽq araq sopoq dengan juaq saq ngerebut mahkote side pade.

12Dengan saq menang, gen Tiang jariang teken saq utame lẽq dalem Gedẽng Suci Allah Tiang, dait ie gen ndot lẽq taoq nike selaẽq-laẽqne. Pesẽngan Allah Tiang dait aran kote Allah Tiang -- nike Yerusalem baru saq gen turun lẽman sorge, lẽman Allah Tiang -- gen Tiang tulis lẽq diriq dengan nike. Aran Tiang saq baru ẽndah gen Tiang tulis lẽq ie.

13Sai bedowẽ kentok, harus ie dengahang napi saq temanikang siq Roh Allah tipaq jemaah-jemaah!"

14"Tipaq malaẽkat jemaah lẽq Laodikia, tulis maraq niki: Niki manik lẽman Amin, Saksi saq setie dait kenaq, sumber selapuq hal saq tecipteang siq Allah.

15Tiang nenaoq napi saq side pade laksaneang; Tiang nenaoq side pade ndẽq nyet dait ẽndah ndẽq beneng. Solahan lamun side pade nyet atao beneng!

16Laguq side pade anget-anget kungkuq; beneng ndẽq, nyet ẽndah ndẽq. Keranaq nike side pade gen Tiang utaqang sugul lẽman cangkem Tiang.

17Side pade bebase, 'Tiang pade sugih dait selapuq cukup; tiang pade ndẽq kurang napi-napi!' Laguq side pade ndẽq nenaoq berembẽ melarat dait berembẽ sedihne keadaande! Side pade miskin, bekelombas, dait bute.

18Keranaq nike Tiang nasẽhatin side pade adẽq beli emas lẽman Tiang, nike emas saq tulẽn, adẽq side pade jari sugih. Beli ẽndah kelambi putẽq lẽman Tiang adẽq side pade bekelambi dait ngilipang keadaan side pade saq bekelombas dait merilaq. Dait beli ẽndah minyak jari teolẽs lẽq penentengde adẽq side pade tao nyerioq.

19Dengan-dengan saq Tiang kasihin, ie pade saq Tiang peringet dait Tiang empuk, keranaq nike side pade harus rẽdeang angende dait tobat lẽman dose-dosende.

20Silaq pade serioq! Tiang nganjeng lẽq julu lawang dait beketok. Lamun araq dengan saq dengah suare Tiang dait bukaqang lawang, Tiang gen tame jari bedait kance ie; Tiang gen bekelor bareng ie, dait ie bekelor bareng kance Tiang.

21Ie pade saq menang, gen Tiang ijinang tokol lẽq tahte Tiang bareng kance Tiang, pade maraq Tiang mẽsaq ẽndah sampun menang dait mangkin tokol bareng Bapa Tiang lẽq tahte-Ne.

22Sai bedowẽ kentok, harus ie dengahang napi saq temanikang siq Roh Allah tipaq jemaah-jemaah!"


  Share Facebook  |  Share Twitter

 <<  Wahyu 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel