Dual Panel1Terus malaẽkat kelime niup terompẽtne, dait tiang serioq sopoq bintang geriq lẽman langit ojok gumi. Bintang nike teicanin kunci jurang maut.
2Make bintang nike bukaq jurang maut nike, terus sugul pendet lẽman dalemne maraq pendet lẽman keren saq belẽq. Jelo dait awang-awang jari peteng siq pendet lẽman jurang nike.
3Terus lẽman dalem pendet nike sugul balang-balang saq turun ojok gumi. Balang-balang nike teicanin kuase saq pade maraq saq teicanin tipaq teledu.
4Ie pade tebalaq nyẽdaq pupaq, atao leloloan, atao tetaletan-tetaletan lainne. Ie pade cume kanggo nyerang dengan-dengan saq lẽq telakarne ndẽq araq tande sẽgel lẽman Allah.
5Balang-balang nike ndẽq teijinang nyematẽq dengan-dengan nike, laguq cume nyiksaq ie pade sengonẽq lime bulan. Sakit lantaran siksaqan balang-balang nike pade maraq sakitne tesenget siq teledu.
6Sengonẽq lime bulan nike, dengan-dengan nike berusahe adẽqne iniq ninggal, laguq ie pade ndẽq iniq ninggal; ie pade melẽt ninggal, laguq maut jaoq lẽman ie pade.
7Rue balang nike maraq jaran saq siep lalo perang. Lẽq otak balang-balang nike araq penggitan maraq rue mahkote emas. Mue balang-balang nike pade maraq mue manusie.
8Bulu balang-balang nike maraq bulu dengan nine, dait gigine pade maraq gigi singe.
9Dade balang-balang nike maraq tetutup siq kelambi besi. Suare kelẽtẽkne pade maraq suare pasukan kerẽte-kerẽte jaran saq luwẽq saq kenyeke nyerbu perang.
10Ie pade bedowẽ ẽlong dait senget maraq teledu. Dait lẽq dalem ẽlongne nike araq kekuatan jari nyiksaq manusie sengonẽq lime bulan.
11Ie pade bedowẽ raje saq mrẽntah ie pade, dait raje nike malaẽkat jurang maut. Dalem base Ibrani aranne Abadon; dait dalem base Yunani Apolion (saq artine "Penyẽdaq").
12Celake saq penembẽq sampun liwat. Sesampun nike araq due celake malik saq gen dateng.
13Beterus malaẽkat saq keenem niup terompẽtne. Make tiang dengah suare dateng lẽman keempat bucu mẽje taoq kurban saq tepiaq lẽman emas saq araq lẽq arepan Allah.
14Suare nike bemanik tipaq malaẽkat saq keenem nike, "Lepas keempat malaẽkat saq tetaliq lẽq dẽkẽt Kokoq Eprat, kokoq saq belẽq nike!"
15Keempat malaẽkat nike telepas. Ie pade sampun tesiepang husus umaq jam, jelo, bulan, dait taun nike jari nyematẽq sepertelu lẽman selapuq umat manusie.
16Tiang dengah bahwe jumlah pasukan-pasukan saq kadu jaran nike araq satak jute luwẽqne.
17Dait dalem penyerioqan tiang, tiang serioq jaran-jaran nike dait penunggang-penunggangne. Penunggang-penunggangne kadu kelambi besi saq bewarne bẽaq toaq dait biru maraq batu nilam, dait kuning maraq urirang. Otak jaran-jaran nike maraq otak singe, dait lẽman biwihne sugul api, pendet, dait urirang.
18Sepertelu lẽman umat manusie ninggal siq telu bencane nike; api, pendet, dait urirang saq sugul lẽman biwih jaran-jaran nike.
19Kekuatan jaran-jaran nike araq lẽq biwihne dait lẽq ẽlongne ẽndah. ~Elong-ẽlongne maraq ulah saq bedowẽ otak. Siq ẽlongne nike, jaran-jaran nike nyiksaq manusie.
20Laguq sise umat manusie saq ndẽq ninggal siq bencane-bencane nike ndẽqne tobat lẽman perbuatanne mẽsaq. Ie pade ndẽq mẽlẽ engkah nyembah roh-roh jahat dait berhale-berhale emas, perak, tembage, batu dait kayuq saq ndẽq iniq gitaq atao dengah atao lampaq.
21Ie pade ẽndah ndẽq mẽlẽ tobat lẽman perbuatan-perbuatan nyematẽq dengan, ilmu-ilmu sẽhẽr, gawẽq perbuatan saq cabul dait memaling.