Dual PanelSipabalion do Siparriah-riah hun Kuria
1Tongon, tarbogei do, masa parriah-riahon bani nasiam, anjaha gari bani sipajuh begu-begu parriah-riahon na sonai seng masa, ai ma, pala iparjolma parinangon ni bapani.
2Anjaha sonai pe, ipagijang nasiam do diri nasiam. Ai lang dearan ma namin marpusok ni uhur nasiam, ase ipabali hun tongah-tongah nasiam na mangkorjahon na sonai?
3Anggo ahu, age pe daoh pamatangku, i tongah-tongah nasiam do mangihutkon partonduyon; domma songon na i tongah-tongah nasiam ahu mandabuh uhum bani na mangkorjahon sisonai ai,
4ibagas goran ni Tuhan Jesus. Anggo martumpu nasiam, anjaha tonduyhu rap pakon nasiam, marhasoman hagogohon ni Tuhanta Jesus,
5padason ma halak na sonai bani setan, laho mangagou dagingni, andohar maluah tonduyni bani ari ni Tuhan Jesus.
6Seng dear pangenjengon nasiam in. Lang ibotoh nasiam, otik pe na migar in, iigari do ganup niagu in?
7Borsih ma padarat nasiam na migar na dob dokah in, ase na niagu na baru nasiam, halani seng niigaran nasiam. Ai domma ibunuh Biri-biri Paskah banta, in ma Kristus.
8Ai pe marpesta ma hita, ulang marhitei na migar na dob madokah, ulang marhitei na migar hajahaton atap hasamboron, tapi marhitei ruti na so niigaran ma ibagas hasusion ampa hasintongan.
Lumba-lumba Pasal Parsaoran pakon Hasoman na Sambor Parlahouni
9Domma husuratkon bani nasiam, na so bulih saor nasiam pakon parriah-riah.
10Seng huhatahon ganup parriah-riah na i dunia on atap paruhur haut atap panrampok atap sisombah gana-gana; ambit sonai, maningon mandarat ma nasiam hun dunia on.
11On do tene na huhatahon bani nasiam bani surat in. Ulang ma saor nasiam bani halak na margoran sanina, hape parriah-riah do, atap bani paruhur haut atap sisombah gana-gana atap sipanrisai atap siparmabuk atap sipanrampok. Gari rap mangan pakon halak sisonai ai seng bulih.
12Ai mase ma uhumonku na i darat ni kuria? Ai lang nasiam siuhumi na ibagas kuria?
13Na i darat, Naibata do na manguhumi ai. Padarat nasiam ma siparjahat in hun tongah-tongah nasiam!