Alkitab Mobile SABDA
[VER] : [SIMALUNGUN]     [PL]  [PB] 
 <<  1 Korintus 6 >> 

Pasal na Marpakara

1Anggo adong humbani nasiam na marpakara dompak hasomanni, pag do ia pauhumkon dirini bani halak sipargeduk, anjaha sedo bani halak na mapansing?

2Ai lang ibotoh nasiam, halak na pansing do na sihol manguhum dunia on? Jadi, anggo nasiam do na manguhumi dunia on, ai lang talup do homa nasiam manguhumi parkara na sonin etekni?

3Ai lang ibotoh nasiam, malekat pe uhumonta do? Lambin pasal pargoluhon ari-ari on ma lang?

4Hape anggo adong parkara nasiam pasal pargoluhan ari-ari, mase ma ipauhumkon nasiam in bani halak na madorun bani kuria in?

5Na pailahon nasiam do hatangkon, na so adong do na maruhur bani nasiam, age sahalak, na boi manguhumi sanina samah sanina?

6Na marpakara do hape sanina samah sanina, anjaha i lobei ni na so porsaya?

7Tongon, hataluon nasiam do in, anggo marpakara nasiam samah nasiam. Mase ma lang rahanan itaron nasiam na so pintor? Mase ma lang rahanan balosan nasiam hona rampas?

8Hape nasiam sandiri do mambahen na so pintor anjaha manrampasi, anjaha samah na marsanina.

9Ai lang ibotoh nasiam, na so sitean Harajaon ni Naibata do halak pargeduk? Ulang nasiam kahou! Seng sitean Harajaon ni Naibata parriah-riah atap sisombah gana-gana atap parbangkis atap na marjolmahon dalahi,

10atap panangko atap paruhur haut atap parmabuk atap panrisai atap panrampok pe.

11Anjaha sisonai do nasiam deba lobei. Tapi domma nasiam iburihi, domma ipapansing, domma ipintori marhitei goran ni Tuhan Jesus Kristus ampa marhitei Tonduy ni Naibatanta.

Lumba-lumba Dompak Habutakon

12Haganup do bulih bangku, tapi seng haganup marguna. Haganup do bulih bangku, tapi seng bulih palopasonku diringku patundukon ni atap aha pe.

13Bani boltok do sipanganon anjaha boltok bani sipanganon, tapi rap parontihonon ni Naibata do in. Tapi anggo angkula in, ulang bani parriah-riahon, bani Tuhan ma in, anjaha bani angkula in do Tuhan.

14Naibata do na dob papuho Tuhan in, anjaha papuhoon-Ni do age hita marhitei hagogohon-Ni ai.

15Ai lang ibotoh nasiam pagori ni Kristus do angkula nasiam? Mintor pakeionku ma pagori ni Kristus in gabe pagori ni boru jalang? Lang ale!

16Ai lang ibotoh nasiam, na padomu dirini bani boru jalang, na gabe sada angkula do ai? Ai nini do, “Na gabe sada daging do na dua ai.”

17Tapi na padomu dirini bani Tuhan in, gabe sada tonduy do ia pakon-Si.

18Maporus ma nasiam humbani parriah-riahon! Sagala dousa na hinorjahon ni jolma, i darat ni angkulani do ai, tapi na manriah-riah, bani angkulani do ia na mardousa ai.

19Ai lang ibotoh nasiam, angkula nasiam do rumah ni Tonduy Na Pansing, na adong ibagas nasiam, na dob jinalo nasiam humbani Naibata, anjaha sedo nasiam simada nasiam?

20Ai harga do nasiam itobus, halani ai pasangap nasiam ma Naibata marhitei angkula nasiam.


  Share Facebook  |  Share Twitter

 <<  1 Korintus 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel