Dual PanelPasal na Marhajabuan ampa na So Marhajabuan
1Tapi pasal na sinuratkon nasiam, on ma balosku: Dear do bani dalahi, ulang manjamah naboru.
2Tapi laho manlembangi parriah-riahon, dear ma ganup dalahi adong parinangonni sandiri, anjaha ganup naboru adong paramangonni sandiri.
3Idalankon paramangon ma hawajibanni bani parinangonni, sonai homa parinangon dompak paramangonni.
4Seng saguru bani parinangon in angkulani, tapi bani paramangonni do; sonai homa, seng saguru bani paramangon angkulani, tapi bani parinangonni do.
5Ulang ma marsipadaohan nasiam, anggo seng humbani dos ni riah anjaha marpanorang, ase sompat martonggo; dob ai marsipadohoran ma use, ase ulang ilajou sibolis in nasiam, halani seng tahan mangorom.
6Tapi huhatahon pe sonai, na mambere partimbangan do ahu, sedo na mamarentah.
7Huparsinta do ase ganup jolma songon ahu on, tapi bani ganup do adong silayak-layak humbani Naibata, na sada sonon, na sada nari sonin.
8Tapi on ma hatangku bani na so mompo ampa bani naboru na mabalu: “Dear ma bani sidea, totap songon ahu on.”
9Tapi anggo seng tarrajai sidea diri ni sidea, marhajabuan ma; ai dearan do marhajabuan humbani na garang.
Pasal na Marsirang-sirang
10Bani na dob marhajabuan huparentahkon ma, sedo ahu tene, tapi Tuhan do: Seng bulih sirang naboru ai humbani paramangonni,
11tapi anggo domma sirang, ulang be laho, atap mardomu ma use bani paramangonni hinan. Anjaha dalahi pe, seng bulih sirangkononni parinangonni.
12Bani na legan ai ahu mangkatahon, sedo Tuhan in: Anggo adong sada sanina na marparinangon na so porsaya, anggo marosuh do uhur ni naboru ai rap pakonsi, ulang ma isirangkon ia.
13Anjaha anggo seng porsaya halahoan ni sada naboru, anggo marosuh do dalahi ai rap pakonsi, ulang ma itadingkon ia.
14Ase gabe pansing do dalahi na so porsaya ai marhitei parinangon ai, anjaha gabe pansing do naboru na so porsaya ai marhitei sanina ai. Ambit lang, butak ma niombah nasiam, tapi tongon pansing do sidea.
15Tapi anggo isirangkon na so porsaya ai dirini, paturut ma sirang. Seng sangkut sanina atap botou na dob Kristen bani na sonai ai, tapi bani pardameian do idilo Naibata nasiam.
16Ai sonaha ma ibotoh ham inang, atap na tarpaluah ham do paramangonmu? Ham bapa, ai sonaha ma ibotoh ham, atap na tarpaluah ham do parinangonmu?
17Tapi ganup ma marpalahou domu hubani na binere ni Tuhan bani, domu hubani pandilo ni Naibata bani. Lanjar in do bani ganup kuria in hutaurhon.
Na Marsunat Atap na So Marsunat,; Jabolon Atap na So Jabolon,; Seng Dong Ubahni ibagas Kuria
18Anggo domma tarsunat sada halak tardilo, ulang ma ipaubah ai; na so tarsunat, sanggah tardilo ia, ulang ma ipasunatkon dirini.
19Ai na marsunat atap na so marsunat seng adong harga ni ai, tapi na mandalankon titah ni Naibata do.
20Ganup ma totap songon sanggah na tardilo ai ia.
21Anggo jabolon ham sanggah na tardilo ai, ulang ma haru uhurmu pasal ai. Tapi anggo boi do maluah ham, dearan ma maluah.
22Ai jabolon na tardilo ibagas Tuhan in, halak na maluah do ai bani Tuhan in; sonai homa, halak na maluah na tardilo ai, jabolon ni Kristus do.
23Harga do nasiam itobus, ulang ma ra nasiam parjabolonon ni jolma.
24Ganup ma nasiam sanina, sonin ia tardilo, sonai ma ia totap i lobei ni Naibata.
Pasal na So Marhajabuan
25Ia pasal anak boru, seng adong bangku parentah ni Tuhan in. Tapi pingkiranku ma huhatahon songon sada halak hatengeran, halani idop ni Tuhan in.
26Ninuhurhu, mangidah hasunsahan na masa sonari, dear ma sada halak totap ia songon sisonari ai.
27Domma sangkut ham bani sada naboru? Ulang pindahi dalan sirang! Seng sangkut ham bani sada naboru? Ulang pindahi naboru!
28Anggo mompo ham, seng mardousa ham ijai, anjaha anggo laho anak boru seng mardousa ia. Tapi marhasunsahan do halak sisonai bani daging, anjaha sihol do uhurhu maluah nasiam hunjai.
29Tapi on do na huhatahon, nasiam sanina: Pondok mando panorangni. Sonon ma hu lobeian on: Songon na so marparinangon ma na marparinangon,
30anjaha na tangis songon na so tangis, anjaha na marmalas ni uhur songon na so marmalas ni uhur, anjaha na mamboli songon na so marnah,
31anjaha na mamorluhon dunia on songon na so mamorluhon, ai na laho salpu do ruhut ni dunia on.
32Tapi sihol do uhurhu ulang sunsah nasiam. Isarihon na so marhajabuan do na porlu bani Tuhan in, ai ma, sonaha mambahen rosuh ni Tuhan in.
33Tapi na marparinangon mansarihon na porlu i dunia on, sonaha ia boi mambuat uhur ni parinangonni, jadi mardua uhur do ia.
34Anjaha puang-puang na so marparamangon pakon anak boru isarihon do na porlu bani Tuhan in, ai ma sonaha ase pansing sidea bani angkula age bani tonduy. Tapi na dob marparamangon isarihon do na porlu i dunia on, sonaha ase boi ia mambuat uhur ni paramangonni.
35Tapi huhatahon pe sonin, ase marguna do bani nasiam, sedo na laho manidingi nasiam, tapi ase porman do nasiam anjaha totap bani Tuhan in, seng manirpang-nirpang.
36Tapi anggo hurang patut do iahap sada halak paturutonni sonin boruni, na dob anak boru, na dob torasan, anggo maningon do laho, ipasaud ma rosuhni ai; seng mardousa ia ijai, marhajabuan ma sidea.
37Tapi barang ise na dob martotap ni uhur, sedo na tarpaksa, tapi humbani rosuhni do sura-surani ai, anjaha domma iputuskon ai ibagas uhurni torus manramotkon boruni ai, dear do pambahenni ai.
38Ase, atap ise na palaho boruni na dob anak boru, dear do pambahenni ai, tapi dearan do pambahen ni na so palahohonsi.
Pasal na Mabalu
39Sangkut do naboru na dob laho sadokah manggoluh paramangonni, tapi anggo matei paramangonni, maluah ma ia anjaha boi laho atap bani ise harosuh ni uhurni, asal ma ibagas Tuhan in.
40Tapi ninuhurhu, sonangan ma ia, anggo sonai totap ia, anjaha porsaya do ahu adong do homa bangku Tonduy ni Naibata.