Alkitab Mobile SABDA
[VER] : [SIMALUNGUN]     [PL]  [PB] 
 <<  1 Petrus 2 >> 

Gabe Batu na Manggoluh i Rumah ni Naibata

1Ai pe, ambukkon nasiam ma sagala hajahaton, sagala pangoto-otoion, hasipahulah-hulahon, subil ampa sagala tukas-tukas.

2Songon dakdanak na baru tubuh, horahan ma nasiam bani tadah partonduyon na pitah, ase lambin magodang nasiam halani ai anjaha maluah,

3anggo na tongon ma domma idai nasiam dear layak ni Tuhan in.

4Hu Bani ma nasiam roh, batu na manggoluh in, na niambukkon ni jolma tongon, tapi na pinilih anjaha na maharga bani Naibata.

5Sai ra ma nasiam paulion songon batu na manggoluh, jadi rumah partonduyon ampa hamalimon na mapansing, laho mamboan galangan partonduyon, harosuh ni uhur ni Naibata, marhitei Jesus Kristus.

6Ai tarsurat do bani Surat in, “Tonggor ma, hupatibal do i Sion sada batu parsuhi na pinilih anjaha na maharga, sabonar seng tarbador na porsaya Bani.”

7Anjaha harga do Ia bani nasiam na porsaya. Tapi bani na so porsaya: Batu na niambukkon ni tuhang ai, ai ma na gabe batu parsuhi ai,

8anjaha batu partolsuan ampa batu parsangsian. Ai tartolsu do sidea hujai, halani seng porsaya sidea bani hata in, age pe hujai do sidea namin ipasirsir.

9Tapi marga na pinilih do nasiam, harajaon hamalimon, bangsa na mapansing, bangsa ni Naibata sandiri, ase iambilankon nasiam dear ni hauhuron-Ni, na dob mandilo nasiam humbani na golap hu haliharon-Ni, na gok halongangan in.

10Hinan seng bangsa ni Naibata nasiam, sonari nani bangsa-Ni ma, hinan seng dapotan idop ni uhur nasiam, sonari nani dapotan idop ni uhur ma.

Manggoluh songon Juakjuak ni Naibata ibagas Haganup

11Nasiam na hinaholongan, huojur ma nasiam songon panginsolat ampa halak dagang: Horom nasiam ma hisap-hisap pardagingon, na marlawan dompak tonduy.

12Marpangabak na madear ma nasiam i tongah-tongah ni sipajuh begu-begu, ase anggo adong na pahata-hata nasiam songon parjahat, gabe ipasangap sidea Naibata bani ari parroh-Ni, dob ididah sidea horja nasiam na madear in.

13Unduk ma nasiam dompak sagala paraturan na tinotapkon ni jolma halani Tuhan, age dompak raja, parkuasa sigijangan,

14age dompak siparrajai, ai ma sinuruh-Ni, laho maminsang sibahen na jahat, tapi laho mamuji sihorjahon na madear.

15Ai on do rosuh ni uhur ni Naibata, sihol ma marhitei horja na madear pasipon nasiam haotoon ni halak na hurang uhur,

16songon halak na bebas, tapi ulang ma napakei habebason ai, laho manrungkub na masambor, songon juakjuak ni Naibata ma tene.

17Hormat ma nasiam bani haganup, marholong ni uhur bani hasoman, mabiar bani Naibata anjaha pasangap ma raja.

Siusihan do Jesus na Marsitaronon

18Unduk ma nasiam juakjuak bani tuan nasiam, marhasoman biar, ulang pitah dompak paruhur na dear ampa na basar, tapi dihut do dompak paruhur na jungkat.

19Ai idop ni uhur do ai, anggo tahan halak manaron na marsik ampa pambahenan na so patut, halani ingat ia bani Naibata.

20Ai aha ma sipujion ijai, porini sabar pe nasiam hona lonsingan anggo halani salah nasiam do? Tapi anggo sabar nasiam manaron halani pambahenan na madear, ai ma na hinarosuhkon ni Naibata.

21Ai hujin do nasiam tardilo, ai Kristus pe manaron na marsik do halani nasiam, mambere siusihan bani nasiam, ase iirikkon nasiam bokas ni nahei-Ni.

22Seng dong dousa ihorjahon, anjaha seng dong jumpah akal-akal ibagas pamangan-Ni.

23Seng manrisai Ia sanggah na hona risa; seng asup-asup Ia sanggah manaron na marsik, tapi iondoskon do ai bani Panguhum na pintor in.

24Iporsan do dousanta ibagas angkula-Ni hubani hayu ai, ase matei hita bani dousa, gabe manggoluh bani hapintoron. Anjaha marhitei ugah-Ni ai do malum nasiam.

25Ai songon biribiri na kahou do nasiam ijia, tapi domma idompakkon nasiam nuan Parmahan anjaha Sijaga tonduy nasiam in.


  Share Facebook  |  Share Twitter

 <<  1 Petrus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel