Dual PanelSi Obaja, Juakjuak ni si Ahab, Pajumpah pakon si Elias
1Dob ai bani labang-labang ni ari roh ma use hata ni Jahowa hu bani si Elias, ai ma patolutahunkon, nini ma, “Laho ma ho, pataridahkon ma dirimu hu bani si Ahab, ai sihol tongosonku ma udan hu tanoh in.”
2Dob ai laho ma si Elias pataridahkon dirini hu bani si Ahab, tapi masa do ijia lohei maningting i Samaria.
3Dob ai idilo si Ahab ma si Obaja, siramotkon rumahni. Tapi marhabiaran tumang do si Obaja mangidah Jahowa,
4ai sanggah na siniapkon ni si Isebel nabi ni Jahowa, ibuat si Obaja do saratus halak nabi, anjaha iponopkon ma sidea lima-lima puluh halak ibagas sada liang, anjaha ipasirsir do ruti pakon bah bani sidea.
5Nini si Ahab ma hu bani si Obaja, “Siari hita ma tanoh on mangindahi bah tubuh pakon bah anak-anak andohar jumpah hita poyon-poyon, ase manggoluh huda pakon halode on, ase ulang tarpaksa siap deba hun bani pinahan in.”
6Jadi ibagi sidea ma tanoh ai sisiaranni; sahalak si Ahab mardalan bani dalan na sada, anjaha sahalak si Obaja mardalan bani dalan na sada nari.
7Jadi sanggah i tongah dalan si Obaja, tonggor ma, pajumpah ma ia pakon si Elias; dob itanda si Obaja ia manrogop ma ia, anjaha nini ma, “Ham do in hape, ham tuannami Elias?”
8Ibalosi ma ia, “Ahu ma da. Laho ma ho, patugah ma bani tuanmu, ʻTonggor ma, domma ijon si Elias.ʼ”
9Jadi nini ma, “Aha gakni dousangku, ase ondoskononmu jabolonmu on hu tangan ni si Ahab, laho mamunuh ahu?
10Songon sintongni manggoluh Jahowa, Naibatamu, seng dong bangsa barang harajaon, na so tinongos ni tuanku suruhanni hujai laho mangindahi ham; anggo ihatahon sidea, ʻSeng ijon iaʼ gabe ipabija raja ai ma harajaon barang bangsa ai, paboa na so jumpah sidea ham.
11Hape sonari ihatahon ham, ʻLaho ma ho, patugah ma hu bani tuanmu: Tonggor ma, ijon do si Elias.ʼ
12Lahohonsi holi ahu hun bamu, ra usungon ni Tonduy ni Jahowa ma ham barang huja lang hubotoh; jadi anggo domma hupatugah hu bani si Ahab, hape lang jumpahsi ham, tontu bunuhonni ma ahu, age pe sai marhabiaran do ahu jabolonmu on mangidah Jahowa hun bani hadakdanakonku nari.
13Ai lang dong do na patugahkon hu bani tuannami, na hubahen sanggah na binunuh ni si Isebel nabi ni Jahowa, ai ma na huponopkon ai nabi ni Jahowa, saratus halak, lima-lima puluh halak ibagas sada liang, anjaha hupasirsir bani sidea ruti pakon bah?
14Hape sonari ihatahon ham, ʻLaho ma ho patugah bani tuanmu: Tonggor ma, ijon do si Eliasʼ; maningon bunuhonni do ahu.”
15Dob ai nini si Elias ma, “Songon sintongni manggoluh Jahowa Zebaot, anjaha ahu jongjong i lobei-Ni, maningon patalaronku do diringku hu bani sadari on.”
16Dob ai laho ma si Obaja manjumpahkon si Ahab, anjaha ipatugah ma barita ai hu bani; jadi laho ma si Ahab manjumpahkonsi.
Si Elias Pajumpah pakon si Ahab
17Jadi dob pajumpah si Ahab pakon si Elias, nini si Ahab ma hu bani, “Domma ijon hape ham siagou Israel?”
18Nini ma mambalosi, “Seng ahu na mangagou Israel, ham do pakon ginompar ni bapamu, marhitei na tinadingkon nasiam titah ni Jahowa laho mangirikkon baal.
19On pe, suruh ham ma na patumpuhon ganup halak Israel marayak ahu, hu Dolog Karmel rap pakon ganup nabi ni Baal, na ompat ratus lima puluh halak ai, pakon nabi ni sombahon Ashera, na ompat ratus halak ai, na mangan bani meja ni si Isebel.”
Si Elias i Dolog Karmel
20Dob ai isuruh si Ahab ma na maningtingkon ai hu bani ganup halak Israel, anjaha ipatumpu ma homa ganup nabi ai hu Dolog Karmel.
21Dob ai ipadohor si Elias ma hu bani ganup bangsa ai, nini ma, “Sadia dokah nari sai mengkat-engkat nasiam angkup bei? Anggo Jahowa do Naibata, Ia ma irikkon nasiam; tapi anggo baal do, ia ma irikkon nasiam.” Tapi sangkababah hata pe lang ibalosi bangsa ai ia.
22Dob ai nini si Elias ma hu bani bangsa ai, “Sahalak ahu mando na tading nabi ni Jahowa; tapi nabi ni baal ompat ratus lima puluh halak nari.
23Bere nasiam ma bennami dua lombu jonggi, paturut ma ipilih sidea sada lombu jonggi bani sidea, itoktoki ma ai lanjar itampeihon bani soban ai, tapi ulang inahkon apuy hujai; tapi ahu ma na patorsatorsahon lombu jonggi na sada nari ai, anjaha manampeihon ai bani soban ai, anjaha lang pe hunahkon apuy hujai.
24Dob ai dilo nasiam ma goran ni naibata nasiam, ahu pe hudilo ma goran ni Jahowa. Anjaha Naibata na marbalos marhitei apuy, ai ma Naibata na sintong.” Dob ai sahata ma ganup bangsa ai mambalosi, “Dear ma ai!”
25Dob ai nini si Elias ma hu bani nabi ni baal ai, “Pilih nasiam ma bani nasiam sada lombu jonggi, anjaha parlobei ma nasiam patureihon ai, ai buei do nasiam; anjaha dilo nasiam ma goran ni naibata nasiam, tapi ulang nahkon nasiam apuy hujai.”
26Ibuat sidea ma lombu jonggi, na binere bani sidea ai, ipaturei sidea ma ai, anjaha ipadilo-dilo sidea ma goran ni baal hun bani sogod nari das tongah arian, sai nini sidea do, “Ham baal, balosi hanami!” Tapi seng dong sora, barang na mambalosi. Jadi marinjaki ma sidea inggot ni anjapanjap, na pinauli ni sidea ai.
27Jadi dob tongah ari ipahiri-hiri si Elias ma sidea, nini ma, “Pagogoh nasiam ma sora nasiam dilo-dilo, ai naibata do ia, ra sanggah marpingkir-pingkir do ia, barang paholangkon diri barang mardalani, barang na sanggah modom do ia, ase puho ia.”
28Dob ai ipagogoh sidea ma sora ni sidea dilo-dilo, anjaha irariki ma angkulani marhitei podang pakon tanja mardingat hasomalan ni sidea, pala sab daroh angkula ni sidea.
29Jadi dob salpu tongah ari, gabe siaran ma sidea das bani panorang panggalangonkon bani galangan sipanganon, tapi seng dong sora barang na mambalosi barang na manangihon.
30Dob ai nini si Elias ma hu bani ganup bangsa ai, “Padohor nasiam ma hu bangku!” Jadi ipadohor ganup bangsa ai ma hu bani, anjaha ipadear si Elias ma anjapanjap ni Jahowa, na dob majomba ai.
31Ibuat si Elias ma sapuluh dua batu, mangihutkon bilangan ni marga ni anak ni si Jakob, haondosan ni hata ni Jahowa na ijia, sanggah na hinatahon-Ni, “Maningon si Israel do goranmu.”
32Ipaturei ma sada anjapanjap bani goran ni Jahowa hun bani batu ai, anjaha ihurak ma sada bondar inggot anjapanjap ai, hira-hira dua tumba bonih bolagni.
33Iatur ma soban ai, itoktoki ma lombu jonggi ai, anjaha itampeihon ma ai bani soban ai.
34Dob ai nini ma, “Goki nasiam ma ompat gusi bah, anjaha useihon nasiam ma ai bani galangan situtungon ai pakon bani soban ai.” Jadi ibahen ma sonai. Nini ma use, “Bahen nasiam ma sonari paduahalihon.” Jadi ipaduahali sidea ma. Ihatahon use ma, “Bahen nasiam ma sonari patoluhalihon.” Jadi ipatoluhali sidea ma.
35Pala mardalan bah ai inggot anjapanjap ai, bondar ai pe gok bah do.
36Jadi dob jumpah panorang panggalangonkon bani galangan sipanganon, ipadohor Nabi Elias ma, anjaha nini ma, “Ham Jahowa, Naibata ni si Abraham, si Isak pakon si Israel, sai pabotohkon Ham ma sadari on, paboa Ham do Naibata i Israel, anjaha ahu do juakjuak-Mu, anjaha marhitei hata-Mu do hubahen ganupan on.
37Sai balosi Ham ma ahu, Ham Jahowa, balosi Ham ma ahu, ase ibotoh bangsa on, Ham do Naibata, alo Jahowa, anjaha sai pasuang Ham ma uhur ni sidea.”
38Dob ai madabuh ma apuy ni Jahowa, anjaha bois ma ipangan galangan situtungon, soban, batu pakon tanoh ai, anjaha idilat do homa pakon bah na ibagas bondar ai.
39Jadi dob iidah ganup bangsa ai ai, manrogop ma sidea, nini ma, “Jahowa do Naibata na sintong, Jahowa do Naibata na sintong!”
40Dob ai nini si Elias ma hu bani sidea, “Tangkapi nasiam ma nabi ni baal in, ulang adong na maluah hun bani sidea age sahalak!” Jadi itangkapi ma sidea. Dob ai itogu si Elias ma sidea tuad hu Bah Kison, lanjar itampuli ma sidea ijai.
41Dob ai nini si Elias ma hu bani si Ahab, “Tangkog ma ham mangan anjaha minum, ai domma hubogei sora ni udan na doras.”
42Jadi dob tangkog si Ahab laho mangan pakon minum, tangkog ma si Elias hu atas ni Dolog Karmel; manrogop ma ia hu tanoh, anjaha ibahen ma bohini hu holangkolang ni towodni.
43Dob ai nini ma hu bani suruhanni, “Tangkog ma ho, tatap ma dompak laut.” Jadi tangkog ma ia manatap, anjaha nini ma, “Seng dong age aha.” Dob ai ihatahon si Elias ma use, “Laho ma ho use!” Jadi laho ma suruhan ai, pitu hali sonai.
44Papituhalihon nini ma, “Tonggor ma, sada hombun na etek-etek songon tangan ni jolma manaik hun laut.” Dob ai nini si Elias ma, “Tangkog ma ho, hatahon ma hu bani si Ahab, ʻPasang ma garetamu anjaha tuad ma ham, ase ulang haolatan ham ibahen udan.ʼ”
45Dob ai seng sadiha dokah nari mamirong ma langit ai ibahen hombun pakon haba-haba, gabe roh ma udan, doras tumang. Ipasang si Ahab ma garetani anjaha laho ma hu Jesreel.
46Jadi roh ma tangan ni Jahowa manogu si Elias; igonditi ma binongeini anjaha marpojong ma ia i lobei ni si Ahab das hu Jesreel.