Dual PanelBagah-bagah pakon Lumba-lumba ni Naibata
1Dob ipajongjong Raja Salomo Rumah ni Jahowa pakon rumah bolon ai ampa haganup na legan, na pinarsintani paulionni,
2ipataridahkon Jahowa ma diri-Ni hu bani Raja Salomo paduahalihon, songon na dob pinatalarni diri-Ni bani i Gibeon.
3Dob ai nini Jahowa ma hu bani, “Domma Hutangihon tonggo pakon pangindoanmu, na sinombahkonmu Bangku; domma Hupapansing rumah on, na pinajongjongmon, bahen ianan ni goran-Ku ronsi sadokah ni dokahni; sai dompak jai do mata pakon uhur-Hu tongtong.
4On pe, anggo marparlahou do ho i lobei-Hu, songon parlahou ni bapamu, si Daud, hun bani gok pakon pintor ni uhurmu, ihorjahon ho romban hu bani na Hutitahkon bam, anjaha iramotkon ho aturan-Ku pakon uhum-Hu,
5jadi pajonamon-Ku ma paratas ni harajaonmu manggomgom halak Israel sadokah ni dokahni, songon na dob Hubagahkon hu bani bapamu si Daud, ningku, ʻSeng anjai rotap hunbam sada halak i lobei-Hu, na hundul bani paratas ni Israel.ʼ
6Tapi anggo marbalik hanima hun bani na mangirikkon Ahu, ho pakon ginomparmu, anjaha seng iramotkon hanima titah-Ku pakon aturan-Ku, na dob Hupajongjong i lobeinima, tapi laho hanima mambalosi naibata na legan anjaha marsombah hujai,
7jadi siapkonon-Ku ma Israel hun tanoh, na dob Huberehon bani sidea; anjaha rumah, na dob Hupapansing bani goran-Ku, padaohon-Ku ma in hun lobei ni bohing-Ku; gabe umpama pakon salig-salig ma Israel i tongah-tongah ni sagala bangsa.
8Gabe gugunan batu ma rumah on; ganup halak na mamontas hunjin gabe longang ma anjaha manrisai, nini sidea ma, ʻMase ma sonon ibahen Jahowa hu bani tanoh on pakon hu rumah on?ʼ
9Dob ai nini ma, ʻHalani na tinadingkon ni sidea do Jahowa, Naibata ni sidea ai, na mangarahkon ompung ni sidea luar hun Tanoh Masir, gabe marpangunsandeian sidea bani naibata na legan, marsombah sidea hujai anjaha ibalosi; halani ai do ase iparoh Jahowa ganupan on hu bani sidea.ʼ”
Sibere-bere ni si Salomo hu bani Raja Hiram
10Jadi dob salpu na dua puluh tahun ai sadokah ai ma ipajongjong Raja Salomo rumah na dua ai, ai ma Rumah ni Jahowa pakon rumah bolon ai,
11anjaha si Hiram, raja hun Tirus do na mamberehon hu bani Raja Salomo hayu ares pakon ingul ampa omas, barang sadiha nini uhurni ijia ma ibere Raja Salomo hu bani Raja Hiram dua puluh huta i Nagori Galilea.
12Dob ai bingkat ma Raja Hiram hun Tirus laho manorih huta ai, na dob binere ni Raja Salomo hu bani, hape lang ipangan uhurni ai.
13Jadi nini ma, “Huta aha ma, na dob bineremu on bangku, saninangku?” Halani ai igoran ma ai nagori Kabul ronsi sadari on.
14Anjaha itongoskon Raja Hiram ma bani Raja Salomo saratus dua puluh talenta omas.
Horja Rodi na Binahen ni si Salomo
15Sonon do ruhut ni panrodion, na tinampeihon ni Raja Salomo, laho paulihon Rumah ni Jahowa, rumah bolon, Milo, tembok ni Jerusalem pakon na patoguhkon Hazor, Megiddo pakon Geser.
16Ai tangkog do sapari Parao, raja ni Masir manaluhon Geser, lanjar isurbuy bani apuy; ibunuhi do halak Kanaan, na marianan i huta ai, ibere ma huta ai bahen parpaingkatni bani boruni, parinangon ni Raja Salomo.
17Dob ai ipajongjong Raja Salomo ma use huta Geser pakon Bet-Horon parbornoh.
18Baalat pakon Tamar i halimisan na i tanoh Juda,
19ambahni ai sagala huta panimpanan, na adong bani si Salomo, huta partumpuan ni gareta porang pakon huta ni bala siparhuda, pakon sagala na hinarosuhkon ni Raja Salomo sipajongjongon ni i Jerusalem, i Libanon pakon bani haganup tanoh, na ginomgomanni ai.
20Sagala halak na tading hun bani halak Amori, Heti, Peresi, Hewi, pakon Jebusi, na so hun bani halak Israel,
21pakon ginompar ni sidea, simasima ni sidea i tanoh in, na so siap hinan ibahen halak Israel, hu bani sidea ma itampeihon Raja Salomo horja rodi ronsi sadari on.
22Tapi anggo hu bani halak Israel seng dong itampeihon raja Salomo horja rodi, gabe tentara do sidea, gabe gamot-gamot, kopala, puanglima, kopala ni bala pargareta pakon bala siparhuda.
23On ma kopala, na mambobahon horja na hinatahon ni raja Salomo: lima ratus lima puluh halak, na mangonjapkon halak simbuei ai mangkorjahon horjani bei.
24Jadi dob tangkog boru ni Raja Parao hun huta ni Raja Daud, masuk hu rumahni, na dob pinajongjong ni raja ai bani, mintor ipajongjong Raja Salomo ma Milo.
25Tolu hali ibagas satahun igalangkon Raja Salomo galangan situtungon pakon galangan pardameian i atas ni anjapanjap, na dob pinajongjongni ai bani Jahowa, anjaha manutung dahupa do homa ia i lobei ni Jahowa. Sonai ma pandobkonni bani rumah panumbahan ai.
Parkapalon ni Si Salomo
26Isuruh Raja Salomo do homa na paturei kapal i Ezion-Geber, dohor hu Elat, i topi laut ni Sigerger, i tanoh Edom.
27Dob ai isuruh Raja Hiram ma juakjuakni siparhorja i kapal, halak na somal i laut, mangkasomani juakjuak ni si Salomo;
28jadi laho ma sidea hu Opir, anjaha iboan sidea ma hunjai omas ompat ratus dua puluh talenta, ipadas sidea ma ai bani Raja Salomo.