Dual PanelSi Daud pakon si Goliat
1Jadi ipatumpu halak Palistim ma balani sihol marporang, anjaha martumpu ma sidea i Soko, na i tanoh Juda, anjaha marsaran ma sidea i holangkolang ni Soko pakon Aseka, dohorhon Epes-Damim.
2Si Saul pe pakon halak Israel martumpu ma, anjaha marsaran ma sidea i habungan Ela, marugas ma sidea marporang laho manjumpahkon halak Palistim.
3Jongjong do halak Palistim bani dolog na salopah anjaha halak Israel jongjong bani dolog na salopah nari, habungan do holangkolangni.
4Dob ai luar ma hun bani parsaranan ai sada puanglima, na margoran si Goliat, hun huta Gat, onom asta santopap do ganjangni.
5Adong do tangkuluk tombaga i atas uluni, bajuni baju marsisik; borat ni bajuni lima ribu sekel tombaga do.
6Panutup ni naheini tombaga do, anjaha adong do tanja tombagani i holangkolang ni sasapni.
7Suhul ni podangni nasa basikah; borat ni mata ni tanjani onom ratus sekel do, anjaha siboban gantar-gantarni mardalan i lobeini.
8Jongjong ma ia ijai, anjaha dilo-dilo ma ia hu bani bala ni halak Israel, nini ma dompak sidea, “Mase ma luar nasiam marugas laho marporang? Ai lang halak Palistim do ahu, anjaha nasiam juakjuak ni si Saul? Pilih nasiam ma sada halak, anjaha suruh ma ia tuad hu bangku.
9Anggo mangasup ia marsilawanan pakon ahu anjaha talu ahu ibahen, jadi jabolon nasiam ma hanami, tapi anggo talu ia hubahen anjaha matei ia hubunuh, jadi jabolonnami ma nasiam, anjaha pambalosi ma nasiam bennami.
10Ambahni ai nini halak Palistim ai do, domma huapasi sadari on bala ni halak Israel; suruh nasiam ma sada halak bangku, ase marsilajouan hanami.”
11Jadi dob ibogei si Saul pakon ganup halak Israel hata-hata ni halak Palistim ai, gabe gobir ma sidea anjaha mabiar tumang.
12Anggo si Daud ai ma anak ni sada halak Efrata, na i Betlehem-Juda, na margoran si Isai anjaha ualuh do anakni. Domma sayur matua ia bani goluh ni si Saul.
13Laho do anak ni si Isai, hatolusi sibanggalan ai hu parporangan mangirikkon si Saul; ia goran ni anak na tolu ai, na laho hu parporangan ai, on do: Si Eliab, bunga tubuhni, paidua si Abinadab, anjaha paitolu si Samma.
14Sianggian do anggo si Daud; jadi dob laho na tolu halak sibanggalan ai mangirikkon si Saul,
15mulak do sipata si Daud hun rumah ni si Saul laho marmahan biri-biri ni bapani i Betlehem.
16Ia halak Palistim ai, sai roh do ia ganup sogod pakon bodari jongjong mangapasi, ompat puluh ari dokahni.
17Nini si Isai ma dompak si Daud anakni ai, “Buat ma bani abangmu saefa hun bani gandum na pinahpah on pakon ruti na sapuluh on, anjaha boan ma ai podas hu bani abangmu hu parsaranan ai.
18Boan ma homa keju na sapuluh kibul on bani pambobai ni sisaribu. Torih ma barang na jorgit-jorgit do abangmai, anjaha boan ma hun bani sidea sada tanda.”
19Tapi anggo si Saul pakon sidea ampa ganup halak Israel i habungan Elah do marporang dompak halak Palistim.
20Ipagirah si Daud ma patarni ai bingkat, anjaha iondoskon ma biri-biri ai hu bani sada halak siparjaga; ibuat ma siboanonni ai, dob ai laho ma ia, songon na hinatahon ni si Isai hu bani; jadi das ma ia hu parsaranan ai, tudu sanggah luar bala ai marbaris anjaha mansurakkon surak porang.
21Jadi marsiatur balani bei ma halak Israel pakon halak Palistim banjei-banjei, padompak-dompak.
22Dob ai iondoskon si Daud ma barang na binoanni ai bani halak sijaga ugas-ugas, anjaha marlintun ma ia hu ianan ni bala ai; daskonsi ia hujai, isungkun ma saninani pasal hajorgiton ni sidea.
23Sanggah na marsahap ai ia pakon sidea, tonggor ma, tangkog ma puanglima ai, halak Palistim na hun huta Gat ai, na margoran si Goliat, hun tongah-tongah ni bala ni halak Palistim, anjaha ipangkatahon ma hata songon na sain dokah, anjaha ibogei si Daud do ai.
24Ganup halak Israel, dobkonsi iidah sidea dalahi ai, maporus bei do hun lobeini anjaha mabiar tumang.
25Dob ai nini dalahi-dalahi ni halak Israel ma, “Iidah ham do halak na tangkog ai? Na sihol mangapasi halak Israel do ia ase tangkog. Barang ise na mamunuhsi, bayak tumang ma ia bahenon ni raja in, anjaha bereonni ma boruni hu bani anjaha paluahonni ma ginompar ni bapani hun bani rodi i tongah-tongah ni halak Israel.”
26Nini si Daud ma dompak dalahi-dalahi na jongjong i lambungni ai, “Aha do bahenon hu bani halak na mamunuh halak Palistim ai, anjaha na padaohkon habadoron ai hun bani halak Israel? Ai ise ma halak Palistim na so marsunat ai, ase apasanni bala ni Naibata na manggoluh in?”
27Dob ai nini halak na mabuei ai ma hu bani songon hata nongkan, “Sonai ma bahenon hu bani halak na mamunuhsi.”
28Jadi ibogei si Eliab abangni ai ma parsahapanni ai pakon halak ai, gabe manringis tumang ma si Eliab dompak si Daud, nini ma hu bani, “Mangaha ho roh hujon, anjaha hu bani ise do iondoskon ho biri-biri na otik ai i halimisan? Hubotoh do hatoalonmu pakon hinajahat ni uhurmu, ai sihol mangidah na marporang in do ase roh ho.”
29Nini si Daud ma mambalosi, “Ai aha dong na hubahen on? Ai lang bulih diri marsahap pala sangkababah?”
30Dob ai marhusor ma ia hun bani laho hu bani na legan, lanjar sonai do isungkun; jadi ibalosi halak na buei ai ma songon nongkan ai.
31Jadi dob ibogei sidea hata na hinatahon ni si Daud ai, ipadas sidea ma ai hu bani si Saul, gabe isuruh ma na mangalopisi.
32Nini si Daud ma dompak si Saul, “Ulang ma pala gobir uhur ni atap ise halani halak ai; laho pe jabolonmu on manlawan halak Palistim ai.”
33Tapi nini si Saul ma dompak si Daud, “Seng mangasup ho mandorab halak Palistim ai laho mangimbangsi, ai parana ope ho, tapi anggo ia halak na somal marporang do hun bani sietek-etekonni.”
34Dob ai nini si Daud ma dompak si Saul, “Somal do jabolonmu on marmahan biri-biri ni bapani; anggo roh singa barang gipul mambuat biri-biri hun bani hulanan ai,
35huayak ma ia anjaha hubogbog, anjaha hupaluah ma biri-biri ai hun babahni; jadi anggo sihol jongjong ia mandorab ahu, hutangkap ma gumisni anjaha hubunuh ma ia.
36Age singa ai barang gipul ai ibunuh jabolonmu on do; maningon sonai do bahenon hu bani halak Palistim na so marsunat ai, halani na dob niapasanni bala ni Naibata na manggoluh in.”
37Ambahni ai nini si Daud ope, “Jahowa na dob paluahkon ahu hun bani sisilon ni singa ampa gipul, paluahon-Ni do ahu hun bani tangan ni halak Palistim ai.” Dob ai nini si Saul ma dompak si Daud, “Laho ma ho, sai ihasomani Jahowa ma ho!”
38Dob ai isorungkon si Saul ma pakeianni hu bani si Daud, inahkon ma tangkuluk tombaga hu atas ni uluni, anjaha ibahen ma ia marbaju partahanan.
39Isolotkon si Daud ma podangni hu bani pakeianni ai, anjaha ilajou ma mardalan, ai seng ongga ope ilajou sonai. Dob ai nini si Daud ma dompak si Saul, “Seng tarbahen ahu mardalan mamakei na sonon, ai seng ongga ope hulajou.” Jadi itanggali si Daud ma ai hun bani.
40Dob ai ibuat ma tungkotni, anjaha ipilih ma lima batu na landit hun bani bah banggal ai, anjaha inahkon ma ai hubagas hadang-hadanganni; ibuat ma umbalangni, anjaha idohori ma halak Palistim ai.
41Roh ma halak Palistim ai mandohori si Daud, anjaha halak na mamboan gantar-gantarni ai i lobei ni.
42Jadi sanggah na mangkawah halak Palistim ai, iidah ma si Daud, gabe mapas ma uhurni mangidahsi, ai parana ope ia, magerger do huyumni anjaha jenges rupani.
43Dob ai nini halak Palistim ai ma dompak si Daud, “Ai baliang do gatni ahu, ase roh ho mamboan tungkot hu bangku?” Dob ai iapasi halak Palistim ai ma si Daud marhitei naibatani.
44Nini halak Palistim ai do hu bani si Daud, “Roh ma ho hu bangku, ase hubere dagingmin hu bani manuk-manuk na i awang-awang pakon hu bani binatang na i ladang.”
45Tapi nini si Daud ma dompak halak Palistim ai, “Ia ho da, roh do ho hu bangku mangunsagahkon podang pakon tanja ampa gantar-gantar; tapi anggo ahu roh do hubam mangunsagahkon goran ni Jahowa Zebaot, Naibata ni bala ni halak Israel, na niapasanmin.
46Ondoskonon ni Jahowa ma ho sadari on hubagas tanganku, ase hubunuh ho, anjaha husirang ulumin hunbam; anjaha bereonku do bangkei ni bala ni halak Palistim sadari on hu bani manuk-manuk na i awang-awang pakon hu bani binatang na i ladang, ase ibotoh ganup tanoh on adong do Naibata ni Israel,
47ase ganup tumpuan on mananda, na so pala marhitei podang barang tanja Jahowa pamonangkon, ai Jahowa do simada parporangan, anjaha ondoskonon-Ni do hanima hubagas tangannami.”
48Jadi hoseihonsi halak Palistim ai, anjaha miut laho manjumpahkon si Daud namin, mintor mangolos ma si Daud hu ianan pardoraban ai manjumpahkon halak Palistim ai.
49Ipoluk si Daud hadang-hadanganni ai, ibuat ma sada batu hunjai, anjaha iumbalangkon ma ai, gabe ihonai ma pardompakan ni halak Palistim ai; masuk ma batu ai hubagas pardompakanni, jadi tompas ma ia dabuh hu tanoh.
50Sonai ma italuhon si Daud halak Palistim ai marhitei umbalang pakon batu, ihonai do halak Palistim ai, gabe matei ma ia, age pe seng dong podang ibagas tangan ni si Daud.
51Dob ai marlintun ma si Daud anjaha jongjong ma ia i atas ni halak Palistim ai; ibuat ma podangni, anjaha iumpat ma ai hun bani sarungni, ibunuh ma ia anjaha itampul ma uluni. Jadi dob iidah halak Palistim, na dob matei do puanglima ni sidea ai, maporus bei ma sidea.
52Mintor roh ma halak Israel pakon Juda lanjar marsurak-surak, anjaha iayak sidea ma halak Palistim ai das hu Gat pakon hu horbangan ni Ekron, gabe radag ma bangkei ni halak Palistim ai i dalan laho hu Saaraim das hu Gat pakon Ekron.
53Mulak ma halak Israel hun bani na mardakdak halak Palistim ai, anjaha itaban sidea ma parsaranan ni sidea ai.
54Dob ai ibuat si Daud ma ulu ni halak Palistim ai, anjaha iboan ma ai hu Jerusalem, tapi anggo sinjatani ai itibalhon ma ibagas lampolamponi.
55Sanggah iidah si Saul si Daud luar manjumpahkon halak Palistim ai, nini ma dompak si Abner pambobai ni bala ai, “Anak ni ise do anak garama ai, ambia Abner?” Nini si Abner ma mambalosi, “Songon sintongni mangggoluh ham, rajanami, seng hubotoh.”
56Dob ai nini raja ai ma, “Papangkei ma barang anak ni ise do anak garama ai.”
57Jadi dob mulak si Daud hun bani na mamunuh halak Palistim ai, iarahkon si Abner ma ia hulobei ni si Saul, anjaha ibagas tanganni do ulu ni halak Palistim ai.
58Nini si Saul ma hu bani, “Anak ni ise do ho, anak parana?” Jadi nini si Daud ma mambalosi, “Anak ni jabolonmu, si Isai, par Betlehem ai do ahu.”