Alkitab Mobile SABDA
[VER] : [SIMALUNGUN]     [PL]  [PB] 
 <<  1 Samuel 23 >> 

Si Daud i Kegila pakon i Halimisan Sip

1Dong ma na patugahkon hu bani si Daud, “Tonggor ma, iporang halak Palistim do Kegila, anjaha iayob sidea do sagala pardogeian.”

2Jadi isungkun si Daud ma Jahowa, “Bulih do ahu laho manaluhon halak Palistim?” Dob ai nini Jahowa ma hu bani si Daud, “Laho ma ho, taluhon ma halak Palistim anjaha paluah ma Kegila.”

3Tapi nini hasoman-hasoman ni si Daud ai ma hu bani, “Tonggor ma, gari ijon, i tanoh Juda, mabiar do hita, lambin naha ma anggo laho hita hu Kegila laho mandorab bala ni halak Palistim?”

4Jadi iulaki si Daud ma sahali nari manungkun Jahowa, gabe ibalosi Jahowa ma ia, nini ma, “Misir ma ho laho hu Kegila, ai Ahu sandiri do na mangondoskon halak Palistim hubagas tanganmu.”

5Dob ai laho ma si Daud pakon hasomanni ai hu Kegila, iporang sidea ma halak Palistim ai, anjaha iboan ma pinahan ni sidea; talu tumang do sidea ibahen, gabe maluah ma par-Kegila ai ibahen si Daud.

6Sanggah na maporus si Abyatar, anak ni si Ahimelek marayak si Daud hu Kegila, iboan do baju epod ai ibagas tanganni.

7Dob ai tarbogei ma hu bani si Saul na roh ai si Daud hu Kegila. Jadi nini si Saul ma, “Domma iondoskon Jahowa ia hubagas tanganku; ai domma ihurungkon dirini marhitei na masuk ia hubagas sada huta na marhorbangan anjaha na marpating-pating.”

8Jadi idilo si Saul ma ganup bangsa ai laho marporang, tuad hu Kegila, laho mangkubu si Daud pakon hasomanni ai.

9Tapi dob ibotoh si Daud, na dob isura-surahon si Saul mambahen na so madear bani, jadi nini ma dompak Malim Abyatar: “Boan hujon baju epod in!”

10Dob ai nini si Daud ma, “Ham Jahowa, Naibata ni Israel: Domma torang ibogei jabolonmu, sihol roh si Saul hu Kegila, laho parsedahon huta in halani ahu.

11Tumaram do ondoskonon ni par-Kegila ahu hu tanganni? Tumaram do si Saul tuad, songon na dob binogei ni jabolon-Mu on? Ham Jahowa, Naibata ni Israel, patugah Ham ma hu bani jabolon-Mu on.” Jadi nini Jahowa ma, “Roh do ia!”

12Dob ai nini si Daud ma use, “Tumaram do ondoskonon ni par-Kegila ahu pakon hasomankin hubagas tangan ni si Saul?” Jadi nini Jahowa ma, “Ondoskonon ni sidea do!”

13Dob ai misir ma si Daud rap pakon hasomanni sionom ratus halak ai, itadingkon ma Kegila, anjaha lajang ma ia hujai-hujon. Dob ipatugah halak hu bani si Saul, domma maluah si Daud hun Kegila, seng be saud ia laho.

14Jadi tading i parbatar-bataran ma si Daud i halimisan, i pardologan ni halimisan Sip. Ipindahi si Saul do ia ganup ari, tapi seng ibere Naibata ia hubagas tanganni.

15Tapi mabiar do si Daud, halani na dob bingkat si Saul sihol mamunuhsi. Ia si Daud i halimisan Sip do, i Hores.

16Tapi bingkat ma si Jonatan, anak ni si Saul, laho ma ia marayak si Daud hu Hores, anjaha ipatotap ma uhurni ibagas Naibata.

17Nini ma hu bani, “Ulang ma ho mabiar, ai seng tumaram jumpah tangan ni bapa, si Saul in ho, maningon ho do bangkit gabe raja manggomgom halak Israel, anjaha ahu raja paduahon; bapa, si Saul pe torang do in ibotoh.”

18Jadi marpadan ma sidea na dua i lobei ni Jahowa; tading i Hores do anggo si Daud, tapi mulak do si Jonatan hu rumahni.

19Dob ai tangkog ma halak Sip marayak si Saul hu Gibea, nini ma, “Ai lang marponop do si Daud i lambungnami i atas dolog, i Hores, bani buntu-buntu Hakila, na hampit dangsina ni Jesimon?

20On pe, anggo marosuh do uhurmu, ham rajanami, sai tuad ma ham, ase iondoskon hanami ia hubagas tangan ni raja in.”

21Nini si Saul ma, “Sai ipasu-pasu Jahowa ma nasiam, halani holong do uhur nasiam mangidah ahu.

22Laho ma nasiam, papangkei nasiam ma use, ase ibotoh anjaha iidah nasiam torang ianan parsaranan ni naheini, anjaha ise na dob mangidahsi ijai; ai adong do na patugahkon bangku halak siparakal do ia.

23Pindahi anjaha papangkei nasiam ma sagala ianan parponopan, atap ija ia marponop, anjaha mulak ma nasiam hu bangku, anggo domma tontu, ase huirikkon nasiam. Anjaha anggo i nagori ai do ia, sai na jumpah ahu do ia i tongah-tongah ni na marribu-ribu i Juda.”

24Dob ai misir ma sidea, i lobei sidea ma si Saul hu Sip. Tapi anggo si Daud ampa hasomanni ai i halimisan Maon do, bani tanoh hanopan hampit dangsina ni Jesimon.

25Dob ai bingkat ma si Saul pakon balani ai mangindahisi. Adong ma na patugahkon ai bani si Daud; halani ai laho ma ia hu dolog batu na i halimisan Maon ai. Dob ibogei si Saul ai, iayaki ma si Daud hu halimisan Maon.

26Mardalan ma si Saul bani salopah ni dolog ai anjaha si Daud ampa hasomanni bani na salopah nari ni dolog ai. Mangolos do namin si Daud maporus hun lobei ni si Saul, hape roh ma si Saul ampa balani ai manghubu si Daud ampa hasomanni ai sihol manangkapsi.

27Tapi roh ma sada suruhan marayak si Saul, nini ma, “Podas ma ham roh, ai domma masuk halak Palistim hu tanohta.”

28Dob ai mulak ma si Saul hun bani na mardakdak si Daud ai, bingkat ma ia mamorang halak Palistim ai. Halani ai do ase isobut halak goran ni ianan ai: Dolog batu parbansahan.

29(24-1) Dob ai tangkog ma si Daud hunjai, lanjar marianan i dolog-dolog ni Enggedi.


  Share Facebook  |  Share Twitter

 <<  1 Samuel 23 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel